Jej Kaorõk Jerammõn Ko Ad!
1 Ilo aolepen bed eo an armij, Jehovah ear lelok elõñ kain jerammõn ko ñan ro kar ri karejaran. Ear lelok jerammõn ko ñan ir jekdon elañe ej maan ak kõrã, joñan dettair, ak utiejiir. (Luk 1:41, 42; Jerb. 7:46; Pil. 1:29) Ta jerammõn ko ej letok ñan kij rainin?
2 Jet ian Jerammõn ko Ad: Ewõr jerammõn eo ibbed ikijen ad katak kin Jehovah. (Mat. 13:11, 15) Kaibujuij Jehovah ikijen ad uak ilo ien kwelok ko ej bar juõn jerammõn jej kaorõke. (Sam. 35:18) Ñe ewõr ien ñan ad uak, jej lukkun mõnõnõ in kõmmane. Eindein, elañe jej watõk katak ko kajjojo ilo congregation eo einwõt juõn jerammõn, jenaj mõnõnõ in kõmmani kin aolepen ad maroñ. Jej ke bõk kunad ien otemjej kin jerammõn eo ñan karreo Kingdom Hall eo bwe en erreo im emõn wõt?
3 Meñe elõñ million armij rej kajitõk elañe jar ko air Anij ej roñjaki, jej lañliñ kin jerammõn eo bwe Eo eutiej bõtata ilo aolepen lal ej roñjake jar ko ad. (Ken. 15:29) Jehovah e make ej roñjake jar ko an ro ri karejaran. (1 Pit. 3:12) Ejjab letok joñan ñan ad maroñ kebake e. Ej juõn menin letok eaorõk ibbed, ñan ad maroñ jar “ilo ien ko otemjej”!—Ep. 6:18.
4 “Ri Jerbal Ibben Anij”: Juõn ian jerammõn ko ad emõntata ej ñan kwalok kin news eo emõn kin Ailiñ eo an Anij einwõt “dri jerbal iben Anij.” (1 Kor. 3:9) Ej juõn jerbal me ej bõktok juburu im lañliñ. (Jon 4:34) Jehovah ejjab aikwij kajerbal armij ñan kõtõbrak jerbal in, ak kin an yokwe kij ear letok jerbal in. (Luk 19:39, 40) Ilo an kõmmane menin, Jehovah ear jab jabde an lelok jerammõn in ñan jabdewõt. Ro rej bõk kunair ilo jerbal in kwalok nan rej aikwij kajejjet im kejbãrok jet men ko rej menin aikwij ilo jitõb. (Ais. 52:11) Jej ke kwalok bwe jej lukkun kaorõk jerammõn in ikijen ad kõmman bwe en mõttan makitkit ko ad aolep week?
5 Jerammõn ko jen Jehovah rej kõmman bwe en mweie mour ko ad. (Ken. 10:22) Jen jab kajettokjeir! Ikijen ad kwalok bwe jej lukkun mol ad kaorõk jerammõn ko ad, jej kamõnõnõik Jemed ilañ, Ri Letok “men in letok emõn im wãppen otemjelok.”—Jem. 1:17.