Juõn Nitbwil an Ri Tarinae Ro Ion Ors Me Ej Jelet Yuk
1 “Im enjel ken ka jiljino e ar jilil.” Jeltokin, “dri tõrinae rej ion ors” orair “roñoul tausan alen joñoul tausan” rej kwalok juõn ainikien elap einwõt jorur. Ejjab juõn jar in tarinae me ekkã an walok. “Im bõran ors ko einwõt bõran laiõn.” Kijeek, baat, im brimstone rej walok jen loñiir, im “lokair rej einwõt serpent ko.” Nitbwili in ilo kõkkar an jar in tarinae in ej walok ilo juõn jorrãn elap. (Rev. 9:13-19) Kwoj jelã ke ewi wãwen kwoj deloñ ilo jejjet in kitien eo an vision in kõkkar in ekabwilõñlõñ?
2 Bwen ri kabit ro im ro mõttair, sheep ro jet, rej burukuk ilo air kejelã kin ekajet ko an Anij. Men in ej walok ilo kajedmatmat eo eyu kin wãwen mij ilo jitõb eo an Christendom. Jen etale ruo wãwen ko kin vision in kanan in me ej kalikar kin etke jerbal in kwalok nan eo an ri karejar ro an Anij elukkun keie.
3 Kar Kamineneik Ir im Rebojak ñan Kwalok Ennan eo an Anij: Ikijen Theocratic Ministry School eo im kwelok ko jet an congregation eo, kar kamineneik ri karejar ro an Anij ñan konono kin ennan eo an Anij kin maroñ. Ilo air kajeoñe Jesus im ri kalor ro an, rej ilok im bukõt ro retellokiir, im kwalok nan ilo jabdewõt jikin remaroñ lo armij ro ie. (Mat. 10:11; Mark 1:16; Luk 4:15; Jerbal 20:18-20) Ear lap an keie kõl in ñan kwalok nan ilo kajerbal Bible eo!
4 Christian ri karejar ro rar jaketo-jaketak elõñ billion Bible ko, book ko, brochure ko, im magazine ko ilo air kajejjet jerbal eo eletok in Anij ñan kwalok nan. Book im magazine kein kar ukõti ilo enañin 400 kajin ko, im rej etale elõñ kain katak ko im rej kajerbal wãwen ko me rej kaitoklimoen elõñ kain armij ro. Ekeie ke am kortokjen kein jerbal kein?
5 Tel im Jurak eo Jen Anij: Vision in kanan eo ear bareinwõt kalikar bwe Anij ej rejetake jerbal eo me nitbwil eo an jar in tarinae eo ion ors ko kar kõkkar kake. (Rev. 9:13-15) Jerbal in kwalok nan eo ibelakin lal ej kõtõbrake, ejjab ikijen meletlet ak kajur eo an armij, ak ikijen jitõb eo an Anij. (Zech. 4:6, New World Translation) Jehovah ej kajerbal enjel ro ñan tel jerbal in. (Rev. 14:6) Kin men in, ijellokin jibadbad ko an Ri Kennan ro an ion lal, Jehovah ej letok jurak eo jen ilañ ñan ibertok ro ettã burueir ñan e.—Jon 6:45, 65.
6 Kinke kar katakin ir, rebojak ñan kwalok ennan eo an Anij, im rej jerbal iumin tel eo an enjel ro, armij ro an Jehovah rej juõn kajur me rejjab maroñ kabõjrake. Jen wõnmanlok im kõmmane ijo kunad ilo jejjet in kitien vision in kanan in ekairujruj.
[Kajjitõk ko]
1, 2. Ewi wãwen ri karejar ro an Anij rainin rej deloñ ilo jejjet in kitien vision in kanan eo kar je ilo Reveles̃õn 9:13-19?
3. Ta kaminene eo kwar bõke bwe en keie am konono ennan eo an Anij?
4. Ta kein jerbal ko rebellok ñan elõñ ri kwalok ro ñan kamaroñ ir ñan kajejjet jerbal eo air?
5, 6. Ta eo ej kalikar bwe armij ro an Jehovah rej bõk jurak eo jen ilañ?