Kwalok Nan Jen Em Ñan Em​​—Etke Eaorõk Kiõ?

“Ran otemjej rar wõnmanlok wõt im katakin iloan Temple kab ilo moko imõn armij im kwalok kin Ennan eo Emmõn kin Jesus Messiah eo.”​—JERB. 5:​42.

1, 2. (a) Ta kilen kwalok nan eo armij ro rejelã kajjen Ri Kennan ro an Jehovah kake? (b) Ta eo jenaj etale ilo katak in?

MEN in ej juõn men ekkã an enañin aolep ailiñ ko loe. Ruo armij ro emõn baotokiir rej kebak juõn em im jibadõk ñan air konono ibben ri mweo kin juõn ennan ekadu jen Bible kin Ailiñ eo an Anij. Elañe ej itoklimo kin ennan eo, remaroñ lelok juõn book ej bedbed ion Bible eo im kajitõk elañe ekõnan katak Bible ilo ejelok wõnãn. Inem rej wõnmanlok ñan mweo juõn. Elañe kwoj bõk kunam ilo jerbal in, ekkã am lo bwe armij ro rej kile yuk einwõt juõn ian Ri Kennan ro an Jehovah meñe kwo jañin jino konono ibbeir. Aet, armij ro rejelã kajjen Ri Kennan ro an Jehovah kin air kwalok nan jen em ñan em.

² Jej kajerbal elõñ kõl ko ñan ad kajejjet nan in jiroñ eo Jesus ear letok ñan kwalok im kõmman ri kalor ro. (Mat. 28:​19, 20) Jej kennan ilo jikin wia ko, ilo kãbon in ial ko, im ilobwilij ilo jikin ko jet. (Jerb. 17:​17) Jej kennan ibben elõñ ikijen telephone im ikijen letter ko. Jej konono kin mol ko an Bible ibben ro jej iion ir ilo makitkit ko ad kajjojo ran. Bareinwõt ewõr juõn ad Web site emelim ñan ad kajerbale (juõn jikin lale ilo computer eo), ijo jemaroñ lo melele ko rej bedbed ilo Bible eo ilo elõñlok jen 300 kajin ko.a Kõl kein aolep rej bõktok tõbrak ko remõn. Bõtab, ilo elõñ jikin ko, wãwen eo elap me jej kajerbal ñan kajededlok ennan eo emõn ej ikijen ad kwalok nan jen em ñan em. Ta bedbed in kilen jerbal in kwalok nan in? Ewi wãwen men in ear oktak im juõn kõl elap an armij ro an Anij kajerbale ilo ran kein? Im etke elap an aorõk kiõ?

Kilen Kwalok Nan

3. Ta nan in jiroñ ko kin jerbal in kwalok nan Jesus ear lelok ñan ri jilek ro, im ta eo men in ej kalikar kin wãwen rar aikwij kwalok?

³ Kõl eo ñan kwalok nan jen em ñan em ewõr bedbedin ilo Jeje ko ilo Bible. Ke Jesus ear jilkinlok ri jilek ro an ñan air kwalok, ear jiroñ ir: “Im ilo jabrewõt jikin kwelok elap ak erik kom naj dreloñ ie, komin kajitõk wõn eo emõn iloan.” Ewi wãwen air naj kar bukõt ro rej tellokiir? Jesus ear jiroñ ir bwe ren illok ñan moko imõn armij ro, ej ba: “Im ñe komij dreloñ iloan jabrewõt im komin yokyokwe e. Im elañe emõn mweo, ami ainemõn en ber ion.” Rar aikwij ke kõttar mae ien juõn armij ej kirlok ir ñan mweo imwiir? Lale nan kein an Jesus: “Im jabrewõt eo e jamin bõk kom, im jab roñ nan ko ami, ñe komij ilok jen mweo ak jikin kwelok eo, komin jojen bõñõlñõl jen neimi.” (Mat. 10:​11-​14) Nan in jiroñ kein rej kalikar bwe ke ri jilek ro “rej ilok, im etal ilo jikin kwelok ko, im kwalok gospel,” rar aikwij bõk buñten nee eo mokta ñan lolok armij ro ilo moko imwiir.​​—Luk 9:6.

4. Tu ia ilo Bible ej konono kin jerbal in kwalok nan jen em ñan em?

⁴ Bible eo ilo alikar ej kwalok bwe ri jilek ro rar kwalok nan jen em ñan em. Ñan wanjoñok, Jerbal 5:​42 ej ba kin rein: “Innem ran otemjej rar wõnmanlok wõt im katakin iloan Temple kab ilo moko imõn armij im kwalok kin Ennan eo Emmõn kin Jesus Messiah eo.” Enañin 20 yiõ ko tokelik, ri jilek Paul ear kakememej maan ro reritto ilo congregation eo ilo Ephesus: “I ar jab drebij jen kom jabrewõt men in kakajuror, a I ar kwalok ñõn kom, im katakin kom ilo bwilij, im jen mweo ñõn mweo.” Paul ear lolok ke elder rein mokta jen air kar erom ri tõmak? Alikar bwe ear, kinke ear katakin ir, ibwiljin men ko jet, “ukwelok ñõn Anij, im tõmak ar iroij Jisõs Kraist.” (Jerb. 20:​20, 21) Ikijen an kamelele kin Jerbal 20:​20, book eo etan Robertson’s Word Pictures in the New Testament (Book in kamelele kin Kallimur eo Ekãl ikijen kajerbal wanjoñok ko an Robertson) ej ba: “Ej juõn men elap tokjen ñan ad jelã bwe ri kwalok in elaptata ian ri kwalok ro ear kwalok jen em ñan em.”

Juõn Jar in Tarinae in Locust ilo Ran Kein

5. Ewi wãwen kanan eo an Joel ear pijaik jerbal in kwalok nan eo?

⁵ Jerbal in kennan eo kar kõmmane ilo ebeben eo jinoin ear pijaik jerbal eo elaplok naj kõmmane ilo ran kein ad. Ri kanan Joel ear kõkkar kin jerbal in kwalok nan eo an Christian ri kabit ro ñan juõn jorrãn elap ej walok jen menin mour ko redik, ekoba locust ko. (Joel 1:4) Ilo air wõnmanlok einwõt juõn jar in tarinae, locust ko rej anjo ion jabdewõt men ebin, rej deloñ iloan moko, im kañ jabdewõt men ej bed iman ial eo air. (Read Joel 2:​2, 7-9.) Ej juõn pija ak kamelele elap an alikar kin an armij ro an Anij kate im let ilo air bõk manlok jerbal in kwalok nan eo ilo ran kein! Im kõl eo elaptata Christian ri kabit ro im “s̃ip” ro mõttair rej kajerbal ilo air kajejjet kanan in ej jerbal in kwalok nan jen em ñan em. (Jon 10:​16) Ewi wãwen kij, Ri Kennan ro an Jehovah, jaar bõk kilen kwalok nan in?

6. Ilo 1922, ta nan in rejañ eo kar lelok ñan kwalok nan jen em ñan em, ak ewi wãwen an kar jet emmakit?

⁶ Jen 1919 manlok, kar lukkun kalikar eddo eo an kajjojo Ri Christian ñan air bõk kunair ilo jerbal in kennan eo. Ñan wanjoñok, juõn katak kar naetan “Service Essential” (Jerbal eo Elap an Aorõk) ilo Watch Tower in August 15, 1922, ear kakememej Christian ri kabit ro kin aorõkin “air niknik in bõklok ennan eo emwij jeje kake ñan armij ro im kennan ñan ir ilo kejam ko air, kennan bwe ailiñ in lañ ebak.” Ennan ko kin wãwen kwalok kar likit ilo Bulletin eo (kiõ ej Ad Jerbal Ñan Ailiñ Eo). Meñe eindein, ilo jinoin ear dik wõt oran ro im rar kwalok jen em ñan em. Jet rar makoko in jerbale wãwen in. Rar kwalok elõñ abõnõnõ ko, ak kar lukkun abañ eo ej eñin bwe jet rar watõk ir make bwe reutiej ñan air kwalok nan jen em ñan em. Ke ear laplok air kalikar kin aorõkin jerbal in kwalok nan, elõñ ian rein jidik kin jidik rar ellok jen air kobalok ibben dolul eo an Jehovah.

7. Ilo yiõ ko ilo 1950, ta eo ear alikar bwe ear juõn menin aikwij?

⁷ Iloan yiõ ko tokelik im manlok, jerbal in kwalok nan eo ear laplok wõt. Bõtab, ear alikar, bwe rar aikwij kalaplok air kamineneik kajjojo armij ilo jerbal in kwalok nan jen em ñan em. Ñan wanjoñok, lale wãwen eo ilo America. Ilo yiõ ko jinoin ilo 1950, 28 percent in Ri Kennan ro ilo ailiñ in rar kõmman jerbal in kwalok nan eo ikijen air leto letak handbill ko wõt ak jutak iturin ial ko kin magazine ko. Elaplok jen 40 percent rar jakkeini air kwalok nan, ilo air kõtlok bwe elõñ alliñ ko ren ellã ilo air jab kwalok nan. Ta eo rar maroñ kõmmane ñan jibañ aolep Ri Christian ro emwij air wujleplok air mour ñan kwalok nan jen em ñan em?

8, 9. Ta program in kaminene eo ear jino ilo 1953, im ta tõbrak ko rar walok?

⁸ Ilo kar juõn international convention eo ear walok ilo New York ilo yiõ eo 1953, ear lap air konono kin jerbal in kwalok nan jen em ñan em. Brother Nathan H. Knorr ear kejelã bwe jerbal eo elaptata ñan aolep Christian overseer ro kar ñan jibañ aolep Ri Kennan ro bwe ren ekkeini air kwalok nan jen em ñan em. “Aolep,” ear ba, “rej aikwij maroñ kwalok kin ennan eo emõn jen em ñan em.” Juõn program in kaminene ear walok ibelakin lal ñan tõbar mejenkajjik in. Ro im rejañin kar kwalok nan jen em ñan em kar bõk kaminene in ñan kebak armij ilo moko imwiir, kameleleik ir jen Bible, im uake kajitõk ko air.

⁹ Tõbrak ko rar walok jen program in kaminene in rar kanuij lap. Iloan wõt joñoul yiõ ko, oran ri kwalok ro ibelakin lal in ear laplok 100 percent, oran eo ñan bar jeblak ibben armij ro rar itoklimo ear laplok 126 percent, im oran ri katak Bible ro ear laplok 150 percent. Rainin, enañin joñan in jiljilimjuõn million ri kwalok ro kin Ailiñ eo rej kwalok nan kin ennan eo emõn ibelakin lal. Eddeklok in ekabwilõñlõñ ej juõn kein kamol kin kajerammõn eo an Jehovah kin kate ko an armij ro an ilo jerbal in kwalok nan jen em ñan em.​​—Ais. 60:22.

Kakõlleik Armij ro ñan Lomor

10, 11. (a) Ta vision eo kar lelok ñan Ezekiel, einwõt kar jeje ilo Ezekiel chapter 9? (b) Ewi wãwen an vision in jejjet kitien ilo ran kein ad?

¹⁰ Aorõkin jerbal in kwalok nan jen em ñan em jemaroñ lo ilo vision eo kar lelok ñan ri kanan Ezekiel. Ilo kar vision eo, Ezekiel ej lo jiljino emaan ro elõñ kein mõnmõn ilo peiir im bareinwõt leo kein kajiljilimjuõn ej kõnak nuknuk linen im ibben kein jeje ilo ibin. Kar jiroñ leo kein kajiljilimjuõn ñan an “etale aoleben jikin kwelok” eo im “kakõlleik dremõn jabdrewõt armij eo einebata im buk buruen kin aoleb men kein rekajjõjõ rej walok ie.” Elikin jerbal in kakõlle in, lõmaro jiljino im rej bõk kein mõnmõn ko kar jiroñ ir bwe ren mõn aolep ro ejelok kakõlle ibbeir.​​—Read Ezekiel 9:​1-6.

¹¹ Jej melele bwe ilo jejjet in kitien kanan in, leo ej “nuknuk linen” ej jutak kin bwen Christian ri kabit ro. Ikijen jerbal in kwalok nan im kõmman ri kalor ro, kumi in ro emwij kabiti ir rej likit ilo kõkkar kakõlle eo ion ro rej erom mõttan ‘sheep ro jet’ an Christ. (Jon 10:​16) Ta kakõlle eo? Ej kein kamol eo, einwõt ñe kar kalikar ilo demair, bwe sheep rein rej ri kalor ro an Jesus Christ emwij wujleplok air mour im baptais, im rar kõnak kadkad eo ekãl kadkadin Christ. (Ep. 4:​20-​24) Rein rej einwõt sheep rej erom juõn wõt bwij ibben Christian ri kabit ro im rej rejetak ir ilo jerbal eo aorõk ñan kakõlleik ro jet.​​—Rev. 22:17.

12. Ewi wãwen vision eo an Ezekiel ej kalikar aorõkin ad wõnmanlok wõt im bukõt ro rej einwõt sheep?

¹² Vision eo an Ezekiel ej kalikar kin etke ej juõn menin ekaiuriur ñan ad wõnmanlok wõt im bukõt armij ro rej ‘inebata im buk.’ Ej kitibuj mour an armij. Ejjab to, jar in tarinae eo an Jehovah ilañ, eo ej jutak ikijen emaan ro jiljino me ewõr kein mõnmõn ibbeir, renaj kokkure ro im ejelok kakõlle eo ibbeir. Ikijen ien ekajet in ej itok wõt, ri jilek Paul ear jeje bwe Iroij Jesus, ibben “enjel ro an kajur eo an,” renaj bõktok “irenwõne ñõn ro re jab bokake gospel an ar Iroij Jisõs.” (2 Tes. 1:​7, 8) Lale bwe naj ekajete armij ro ekkar ñan uak eo air ñan ennan eo emõn. Kin men in, kennan lok kin ennan eo an Anij ej aikwij wõnmanlok im laplok wõt ñan jemlokin. (Rev. 14:​6, 7) Men in ej letok juõn eddo elap ion aolep ri karejar ro an Jehovah me emwij air wujleplok ir.​​—Read Ezekiel 3:​17-​19.

13. (a) Ta eddo eo Paul ear eñjake, im etke? (b) Ta eddo eo kwoj eñjake kin armij ro ilo territory eo am?

¹³ Ri jilek Paul ear eñjake eddo eo an make ñan an kwalok ennan eo emõn ibben ro jet. Ear jeje: “Ña dri muri ñõn ro dri Grik, im ñõn ro dri pegan; ñõn ro re meletlet im ñõn ro re jab meletlet. Ein drein, einwõt aõ maroñ, I pojõk bwe in kwalok gospel ñõn komeo komij ber i Rom.” (Rom. 1:​14, 15) Kin an kamolol kin tiriamo eo kar kwalok ñan e, Paul ear eñjake bwe ej an eddo ñan an kajeoñ jibañ ro jet ñan air bõk tokjen jen joij eo an Anij einwõt an kar bõk tokjen jene. (1 Tim. 1:​12-​16) Ej einwõt ñe ear muri ñan kajjojo ro ear iion ir, juõn muri eo emaroñ kõllãiki ikijen wõt an kwalok kin news eo emõn ibben armij eo. Kwoj eñjake ke bwe kwo muri ñan armij ro ilo territory eo am?​​—Read Jerbal 20:​26, 27.

14. Ta un eo elaptata unin ad jerbal in kwalok nan jen em ñan em?

¹⁴ Meñe lomoren mour an armij ro eaorõk, ewõr juõn un elaplok kin jerbal in kwalok nan jen em ñan em. Ilo kanan eo kar jeje kake ilo Sam 113:​3, 4, Jehovah ej keañ: “Jen tak al ñõn tulok eo an, ren kamõnõnõ etan Jeova. Jeova e utiej ilõñin ro dri ailiñ ko otemjej, im An aibujuij ilõñin lõñ ko.” Ilo an jejjet kitien kanan in, ri karejar ro an Jehovah emwij air wujleplok ir rej kaibujuij etan ilo aolepen lal ilo air bõk manlok jerbal in kwalok nan eo air ilo ettã. (Sam 109:30; Mat. 24:​14) Lelok “katok . . . kin wijtak” ñan Jehovah ej un eo elaptata kin jerbal in kwalok nan eo ad jen em ñan em.​​—Hib. 13:15.

Men ko Relap Rej Bed Iman

15. (a) Ewi wãwen Ri Israel ro rar kalaplok jerbal eo air ke rar kabole Jericho ilo ran eo kein kajiljilimjuõn? (b) Ta eo men in ej kalikar kin jerbal in kwalok nan?

¹⁵ Ta men ko rej bed iman kin jerbal in kwalok nan? Kar jeje ilo book in Joshua kin ien eo rar kabole im kokkure Jericho, im men in ej letok juõn wanjoñok. Kememej bwe mokta jen an kar Anij kokkure Jericho, ear jiroñ Ri Israel ro bwe ren kabole jikin kwelok eo juõn alen ilo juõn ran iumin jiljino ran. Bõtab, ilo ran eo kein kajiljilimjuõn, rar aikwij kalaplok jerbal eo air. Jehovah ear jiroñ Joshua: “Komin kabol jikin kwelok eo jiljilimjuõn alen, im pris ro ren uk jilil ko. Inem e naj ein drein, ñe e aitõk air jilil kin drun jip koman, . . . armij otemjej ren lamij kin ainiken elap; im worwor in jikin kwelok eo e naj eolok.” (Josh. 6:​2-5) Emaroñ naj bar eindein, jerbal in kwalok nan eo ad enaj laplok. Ejelok bere, bwe ilo ien eo naj kokkure jukjuk im bed in kiõ, enaj mwij ad lo kennan eo elaptata kin etan Anij im Ailiñ eo ilo bwebwenato an lal in.

16, 17. (a) Ta eo enaj kõtõbrake mokta jen jemlokin “iñtan eo elap”? (b) Ta eo jenaj etale ilo katak in tok juõn?

¹⁶ Ien eo enaj itok ñe ennan eo jej kwalok kake enaj erom einwõt juõn “ainiken elap.” Ilo book in Reveles̃õn, ennan in ekajet ko rekajur rej einwõt “wut ebin, elap einwõt talent.”b Im Reveles̃õn 16:21 ej ba: “Men in kaiñtan eo an e kanuij lap.” Jejañin jelã kin ijo kunan jerbal in kwalok nan jen em ñan em ñe naj keañ kin ennan in ekajet ko eliktata an Anij. Ak jemaroñ liki bwe mokta jen an jemlok “iñtan eo elap,” etan Jehovah naj kwalok kake elaplok jen jabdewõt ien ilo bwebwenato an armij.​​—Rev. 7:​14; Ezek. 38:23.

¹⁷ Ke jej kõttar men kein relap me rej bed imad, jen wõnmanlok wõt ilo kijejeto ilo ad keañ kin ennan eo emõn kin Ailiñ eo. Ilo ad wõnmanlok kin ijo kunad, ta abañ ko jej jelmae ilo jerbal in kwalok nan jen em ñan em, im ewi wãwen jemaroñ kamadmõdi abañ kein? Kajitõk kein jenaj etale ilo katak in tok juõn.

[Kamelelel ko]

Ewi Wãwen Kwonaj Uak?

• Ta bedbed eo jen Bible eo kin kwalok nan jen em ñan em?

• Ewi wãwen kar kalikar aorõkin jerbal in kwalok nan jen em ñan em ilo ran kein?

• Etke ewõr juõn an ri karejar ro an Jehovah eddo ñan kwalok nan?

• Ta men ko relap renaj walok ilo ien ko iman?

[Pija ko ilo peij 4]

Einwõt ri jilek Paul, kwoj eñjake ke juõn eddo ñan am kwalok ñan ro jet?

[Pija ko ilo peij 5]

Brother Knorr, 1953