Bõk Anjo Ion Aitwerõk Ko Ilo Jerbal In Kwalok Nan Jen Em Ñan Em
“Kim ar beranlok ilo am Anij bwe kimin konono ñõn kom gospel an Anij ilo niknik elap.”—1 TES. 2:2.
1. Ta melejoñ ko Jeremiah ear wõnmaiki, im ewi wãwen ear maroñ in anjo ion men kein?
JEREMIAH ear juõn armij einwõt kij. Ke Jehovah ear kejelãik e kin jerbal eo an ñan erom “juõn ri kanan ñõn ri ailiñ ko,” ear lamõj im ba: “O Iroij Anij, ijaje ta eo in ba, kinke ña ij ajiri wõt.” Meñe eindein, ilo an liki Jehovah ear bõk jerbal eo. (Jer. 1:4-10) Iumin elõñlok jen 40 yiõ ko, Jeremiah ear wõnmae ro ejelok air itoklimo, rar karmijeteik e, rar kajirere kake e, im bareinwõt rar lej ñan e. (Jerm. 20:1, 2) Jet ien, ear lemnak in bõjrak jen jerbal eo an. Bõtab, ear wõnmanlok wõt im keañ kin ennan eo ñan armij ro ejelok air itoklimo. Ilo kajur eo an Anij, Jeremiah ear kõtõbrak men eo ejamin kar kõmmane ilo kajur eo an make.—Read Jeremiah 20:7-9.
2, 3. Ewi wãwen ri karejar ro an Anij rainin rej jelmae aitwerõk ko einwõt ko Jeremiah ear iioni?
2 Elõñ ian ri karejar ro an Anij rainin remaroñ melele kin eñjake ko an Jeremiah. Ke jaar lemnak kin kwalok nan jen em ñan em, jet iad jaar lemnak, ‘Ijjab maroñ kõmmane men in.’ Bõtab, ke jaar kile bwe kar ankilan Jehovah bwe jen keañ kin news eo emõn, jaar anjo ion ad mijak im jino boub wõt ilo jerbal in kwalok nan. Meñe eindein, elõñ iad jaar jelmae wãwen ko ilo mour eo ad me ear kõmman bwe en bin, meñe iumin jidik ien, ñan wõnmanlok im kwalok nan. Emol bwe ebwe an bin ñan jino kwalok nan jen em ñan em im wõnmanlok im kõmmane ñan jemlokin.—Mat. 24:13.
3 Ta elañe etto am kar katak Bible ibben Ri Kennan ro an Jehovah im bed ilo kwelok ko an congregation, ak kwoj ãliklik ñan jino kwalok nan jen em ñan em? Ak ta elañe kwoj juõn Ri Kennan emwij an baptais im kwoj lo bwe ebin am bõk kunam ilo jerbal in jen em ñan em, meñe ewõr am maroñ ñan kõmman men in? Kwomaroñ liki bwe armij ro jen wãwen ko otemjej rej bõk anjo ion aitwerõk in kin jerbal in kwalok nan jen em ñan em. Kin jibañ eo an Jehovah, kwomaroñ bareinwõt.
Beranlok
4. Ta eo ear kamaroñ ri jilek Paul ñan an konono ilo beran kin news eo emõn?
4 Emol kwoj kile bwe jitõbõn Anij eo ej kõtõbrak jerbal in kwalok nan ibelakin lal, im jab ikijen kajur ak meletlet in armij. (Zech. 4:6) Ej bareinwõt mol men in kin jerbal in kwalok nan eo an kajjojo Ri Christian ro. (2 Kor. 4:7) Lemnak kin ri jilek Paul. Ilo an kememej juõn ien ke ri jumae ro rar mõn e im missionary eo mõttan, ear jeje: “Ke emwij kaiñtan im kokkure kim i Pilippai, . . . kim ar beranlok ilo am Anij bwe kimin konono ñõn kom gospel an Anij ilo niknik elap.” (1 Tes. 2:2; Jerb. 16:22-24) Emaroñ bin ibbed ñan lemnak bwe ear wõr ien ko me kwalok nan ear juõn aitwerõk ibben juõn ri kwalok ekijejeto einwõt Paul. Bõtab, einwõt kij otemjej, Paul ear aikwij in atartar ion Jehovah bwe en konono ilo beran kin news eo emõn. (Read Dri Epesõs 6:18-20.) Ewi wãwen jemaroñ anõke joñok eo an Paul?
5. Ta juõn wãwen me jemaroñ beranlok ñan kwalok nan?
5 Juõn wãwen jej beranlok ñan kwalok nan ej ikijen jar. Juõn pioneer ear ba: “Ij jar bwe imaroñ konono ilo liki, ij jar bwe imaroñ tõbar buruen armij ro, im ij jar bwe imaroñ lo lañliñ ilo jerbal in kwalok nan. Ilo mol, men in ej jerbal eo an Jehovah, jab ad, inem jejjab maroñ kõmman jabdewõt men elañe ejelok jibañ jen e.” (1 Tes. 5:17) Kij aolep aikwij wõnmanlok wõt im jar bwe jitõb kwojarjar eo an Anij en jibañ kij ñan kwalok nan ilo beran.—Luk 11:9-13.
6, 7. (a) Ta vision eo Ezekiel ear bõke, im kar ta melelen? (b) Ta katak eo ri karejar ro an Anij rainin rej bõke jen vision eo an Ezekiel?
6 Book in Ezekiel ej kwalok bar juõn men me emaroñ jibañ kij ñan konono ilo beran. Ilo juõn vision, Jehovah ear lelok ñan Ezekiel juõn booklemlem im ewõr jeje iloan im bareinwõt ilikin kin “nan in buromõj na ie, bareinwõt nan in ñũr im liejlol” im ear ba ñan e bwe en kañe, ilo an ba: “Kwe armij drien mij, kwon kañ book limlim in ij lewõj ñõn yuk. Kwon kobrak lojeõm kake.” Ta melelen vision in? Ezekiel en kar bõk ñan buruen ennan eo ear aikwij in keañ kake. Ilo kõkkar, enaj kar erom mõttan, im jelet buruen. Ri kanan eo ear wõnmanlok im ba: “Iar kañe im etõñal einwõt honey.” An keañ kin ennan eo an Anij iman mejen armij kar juõn menin lañliñ—einwõt edjoñe honey—ñan Ezekiel. Ear watõke juõn jerammõn elap ñan jutak kin Jehovah im ñan kajejjet jerbal in jen Anij, meñe ear melelen bwe ear aikwij kwalok juõn ennan ekajur ñan armij ro rejjab mõnõnõ in roñjake.—Read Ezekiel 2:8–3:4, 7-9.
7 Ewõr ilo vision in juõn katak eaorõk ñan ri karejar ro an Anij. Kij bareinwõt ewõr juõn ennan ekajur jej aikwij kwaloke ñan armij ro me ejjab ien otemjej rej kamolol kin jibadbad ko ad. Bwe jen wõnmanlok im watõk bwe jerbal in kwalok nan eo an Ri Christian ej juõn jerammõn jen Anij, jej aikwij wõnmanlok im read im katak Nan eo an Anij. Elañe manit in katak ko ad ejjab mũlal ak ej jakkeini ad kõmmane, ejamin bwe ñan bõk ilo burued Nan eo an Anij. Kwomaroñ ke kakõmõnmõnlok wãwen eo im an ekkeini am katak Bible ibbam make? Kwomaroñ ke kalaplok am kalmenlokjen kin men eo kwoj readi?—Sam 1:2, 3.
Jino Bwebwenato ko kin Bible
8. Ta kõl eo ear jibañ jet ri kwalok ro kin Ailiñ eo ñan air jino bwebwenato kin Bible ilo jerbal in kwalok nan jen em ñan em?
8 Ñan elõñ ri kwalok ro, men eo ebintata kin jerbal in kwalok nan jen em ñan em ej ien eo moktata kwoj iion ri mweo. Emol, ilo jet territory ko, ej juõn melejoñ ñan jino juõn bwebwenato. Ñe rej konono ibben armij ro ilo moko imwiir, ej emõn ibben jet ri kwalok ro elañe rej jino ennan eo air kin jet nan ko rekkar inem lelok juõn tract ñan ri mweo, einwõt kar kõlajrak kake ilo box eo. Title in tract eo ak pija ko raibujuij remaroñ kareel ri mweo bwe en kõtlok kij ñan kwalok ilo tu kadu kin unin jej lolok im ñan kajutak juõn kajitõk. Bar juõn kilen kebak ri mweo ej ikijen ad kwalok jilu ak emen tract ko reoktak jen don im kajitõk ibben bwe en kãlet juõn iair me ej kaitoklimoen. Emol bwe, ejjab mejenkajjik eo ad in bwe jen lelok wõt tract ko ak ñan kajerbali ilo kajjojo em, jen an eindein jekõnan jino bwebwenato ko kin Bible me ej tellok ñan air katak Bible eo.
9. Etke eaorõk bwe en emõn am kebojak?
9 Jekdon kain kõl rot eo kwoj kajerbale, elañe ej emõn am kebojak, enaj jibañ yuk ñan am bojak im kijejeto ilo jerbal in kwalok nan jen em ñan em. Juõn pioneer ear kile: “Elaplok aõ lañliñ elañe emõn aõ kebojak. Ej kõmman aõ kõnan konono ibben armij kin ennan eo iar keboje.” Bar juõn pioneer ear ba, “Ke ij jelã kobban book im magazine ko me ikõnan lilok, ij kijoror ñan kajerbali.” Meñe ewõr tokjen ñan eliji men eo kwonaj ba ilo ejelok ainikien, elõñ rar lo bwe elaplok an jibañ ñan kamelmele ennan eo renaj kwalok kake ilo juõn ainikien ellaj. Air kõmman men in ej jibañ ir ñan lelok men eo emõntata ñan Jehovah.—Kol. 3:23; 2 Tim. 2:15.
10. Ta eo ri tel eo emaroñ kõmmane bwe en keie im wõr tokjen kwelok eo kin jerbal in kwalok nan?
10 Kwelok ko rekeie kin jerbal in kwalok nan rej jibañ bwe jen lañliñ im bolemen ilo jerbal in kwalok nan jen em ñan em. Elañe unin tel in ran eo ej kwalok kin jerbal in kwalok nan, emaroñ readi im etale ilo tu kadu. Bõtab, brother eo ej tel ilo kwelok eo ñan kwalok nan ej aikwij in lale bwe en bwe ien eo ñan etale ak kwalok kilen wãwen kwalok eo me ekkar ilo territory eo ak etale jet kamelele ko rekeie me remaroñ kajerbali ilo jerbal in kwalok nan ilo ran eo. Men in enaj laplok an jibañ ro rej bed bwe en keie wãwen air kwalok nan. Ñe ej emõn air kebojak lok iman, elder ro im ro jet me rej tel ilo kwelok in kwalok nan remaroñ kõtõbrak men in im kajemlok wõt kwelok eo ilo ien eo ejejjet.—Rom 12:8.
Men eo Jemaroñ Kõtõbrake Ikijen Ad Roñjake
11, 12. Ewi wãwen roñjake ilo tiriamo emaroñ jibañ kij ñan tõbar buruen armij kin news eo emõn? Kwalok jet wanjoñok ko.
11 Kebojak ilo emõn im juõn itoklimo elap kin ro jet rej men ko remaroñ jibañ kij ñan jino bwebwenato ko ilo Bible im ñan tõbar buruen armij ro ilo jerbal in kwalok nan. Juõn wãwen me jej kwalok itoklimo rot in ej ikijen wãwen eo jej roñjake. Juõn overseer eo ej ito-itak ear kile: “Ñe jej meanwõd im kwalok ad mõnõnõ in roñjake, elap an men in kareel armij ñan air kõnan roñjake news eo emõn im ej juõn wãwen ekanuij emõn ñan kwalok itoklimo eo emãnãn.” Ilo ad lukkun roñjake im kwalok tiriamo kin men ko juõn ri mweo ej ba kaki, men in emaroñ kamakit e ñan an mõnõnõ in bwebwenato kin Bible, einwõt wanjoñok eo ilal enaj kwalok kake.
12 Ilo juõn letter rar kwaloke ilo newspaper eo etan Le Progrès, ilo Saint-Étienne, France, juõn kõrã ear bwebwenato kin lolok eo an ruo armij me rar kallallal ion kejam eo an ejjab to tokelik jen an kar eñtan kin mij eo an ledik eo nejin eo kar jilu wõt an alliñ. “Emõkaj aõ kar kile bwe rej ro uan Ri Kennan ro an Jehovah,” ear jeje. “Ilo wãwen joij iar bojak in karol ir, ak iar lo juõn brochure rar leto-letak. Kar ikijen etke Anij ear kõtlok eñtan. Inem iar bebe ñan kadeloñ ir bwe in kalikar bwe ebwid katak ko air. . . . Ri Kennan ro rar bed elaplok jidik jen juõn awa. Kin tiriamo elap rar roñjake iõ, im ke rar etal, joñan an kar emõn aõ mour iar errã bwe ren bar lotok iõ.” (Rom. 12:15) Tokelik, kõrã in ear mõnõnõ ñan jino katak Bible eo. Men eo elap jemaroñ katak jen men in ej bwe men eo lio ear kememej kin lolok eo moktata, ear jab kin men ko Ri Kennan ro rar ba, ak kin wãwen rar roñjake.
13. Ewi wãwen jemaroñ ukõt wãwen ad kwalok news eo emõn ibben armij ro kajjojo jej iion ir?
13 Ñe jej roñjake ilo tiriamo, ej einwõt jej kõtlok bwe armij ro ren ba ñan kij kin etke rej aikwiji Ailiñ eo. Inem enaj emõnlok ad maroñ jaketo-jaketak news eo emõn ibbeir. Bõlen emwij am kile bwe ro rekeie air kwalok nan rej ri roñjake ro rekabel. (Ken. 20:5) Rej kwalok itoklimo emol ñan armij ro rej iion ir ilo jerbal in kwalok nan. Rej lale jab baj ãt eo etair im jikin jokwe wõt ak bareinwõt men ko rej kaitoklimoiir im menin aikwij ko air. Ñe armij eo ej kwalok juõn men ej kainebataik e, rej etale im bukõte uak ko im mõkaj air bar jeblak ñan kwalok men ko rej loi. Einwõt ri jilek Paul, rej ukõt wãwen air kwalok ennan in Ailiñ eo ekkar ñan armij ro rej iion ir. (Read 1 Dri Korint 9:19-23.) Itoklimo rot in emol ej kareel armij ro ñan news eo emõn im ekanuij emõn an kwalok kin “elap tiriamo an ar Anij.”—Luk 1:78.
Debiji juõn Lemnak Emõn
14. Ñe jej kajejjet jerbal in kwalok nan eo ad, ewi wãwen jemaroñ kwalok kadkad ko kadkadin Jehovah?
14 Jehovah ear kwalok bwe ej kaorõk kij kajjojo ikijen an letok maroñ ñan kãlet. Meñe Anij Ekajur Bõtata, ejjab iuni jabdewõt armij ñan air karejar ñan e ak ej kareel armij ro ikijen yokwe, im ej kajerammõn ro rej emmakit ilo kamolol kin menin letok eo an ekanuij in emõn. (Rom. 2:4) Einwõt ri karejar ro an, jej aikwij in bojak wõt ñan kwalok kin news eo emõn ilo wãwen eo ej tellokin Anij eo ad ej tiriamo ilo kajjojo ien jej kwalok nan. (2 Kor. 5:20, 21; 6:3-6) Ñan kõtõbrak men in, jej aikwij debij juõn lemnak emõn kin armij ro ilo territory eo ad. Ta eo emaroñ jibañ kij ñan bõk anjo ion aitwerõk in?
15. (a) Jesus ear katakin ri jilek ro an ñan kõmman ta, elañe armij ro rar karmijete ennan eo? (b) Ta eo enaj jibañ kij ñan lukkun lemnak ñan bukõte ro rej tellokiir?
15 Jesus ear jiroñ ri kalor ro an bwe jen air lukkun inebata ñe jet rar karmijete ennan eo, rar aikwij lemnak wõt ñan bukõt ro rej tellokiir. (Read Matu 10:11-15.) Ñe jej likit mejenkajjik ko redik, men in enaj jibañ kij kõtõbrak men in. Juõn brother ear keidi e make ñan juõn eo ej bukõte dekã ko raorõk iumin bũdej. Unin tel eo an ilo mour ej, “Ij kijoror in lo gold rainin.” Brother in ej keidi gold ñan juõn armij ej itoklimo kin mol eo. Mejenkajjik eo an bar juõn brother ej bwe “ilo juõn alen kajjojo week en iione juõn armij ewõr an itoklimo im bar jeblak elikin jejjo wõt ran ko ñan kaddeklok itoklimo eo an.” Jet ri kwalok ro, rej kate ir ñan kwalok juõn eon ibben kajjojo ri mweo ñe remaroñ. Ta mejenkajjik eo kwomaroñ likit me enaj emõn am kõtõbrake?
16. Ewõr ta un ko unin ñan ad wõnmanlok im kwalok nan?
16 Tõbrak eo kin jerbal in kwalok nan jen em ñan em ejjab wawa wõt ion wãwen armij ro ilo territory eo rej emmakit. Emol bwe, jerbal in kwalok nan eaorõk ilo lomoren armij ro emol burueir, bõtab ebar wõr karõk ko jet raorõk. Jerbal in kwalok nan eo an Ri Christian ej kabellok juõn ien emõn bwe jen kwalok yokwe eo ad ñan Jehovah. (1 Jon 5:3) Ej kamaroñ kij ñan bõprae ad bõk ruõn kin bõtõktõk. (Jerb. 20:26, 27) Ej kakkõl armij ro renana bwe “auõ in ekajet eo An [Anij] emottok.” (Rev. 14:6, 7) Ilõñin men otemjej, ikijen kwalok nan kin news eo emõn, men in ej kaibujuij etan Jehovah ibelakin lal in. (Sam 113:3) Inem, jekdon ñe armij rej roñjake ak jab, jej aikwij in keañ kin ennan in Ailiñ eo. Aet, aolep jibadbad ko ad ñan keañ kin news eo emõn raibujuij iman mejen Jehovah.—Rom. 10:13-15.
17. Mõttan jidik armij ro renaj aikwij kile ta?
17 Meñe elõñ rainin rej kajekdon jerbal in kwalok nan eo ad, mõttan jidik enaj oktak lemnak ko air kake. (Mat. 24:37-39) Jehovah ear kallimur ñan Ezekiel bwe ñe ekajet ko ear keañ kaki rar jejjet kitieir, Ailiñ in Israel eo ej jumae enaj “jelã ke juõn ri kanan ar bed ibwiljier.” (Ezek. 2:5) Ilo ejja wãwen in lok wõt, ñe Anij ej kajejjet ekajet eo an nae jukjuk im bed in, armij ro renaj aikwij in kile bwe ennan eo me Ri Kennan ro an Jehovah rar kwalok kake ilo jikin ko ilobwilij im jen em ñan em ear itok jen Anij eo emol, Jehovah, im bwe Ri Kennan ro rar lukkun jutak kin e. Ej juõn menin jerammõn ñan bõk etan im keañ kin ennan eo an ilo ien kein rekabwilõñlõñ! Ikijen jibañ eo an, jemaroñ wõnmanlok ñan bõk anjo ion aitwerõk ko ilo jerbal in kwalok nan jen em ñan em.
Ewi Wãwen Kwonaj Uak?
• Ewi wãwen jemaroñ beranlok ñan kwalok nan?
• Ta eo emaroñ jibañ kij ñan jino bwebwenato ko kin Bible ilo jerbal in kwalok nan jen em ñan em?
• Ewi wãwen jemaroñ kwalok itoklimo eo emol kin ro jet?
• Ta eo emaroñ jibañ kij ñan debij juõn lemnak emõn kin armij ro ilo territory eo ad?
[Bo̦o̦k/Pija eo ilo peij 9]
Juõn Wãwen ñan Jino Bwebwenato ko kin Bible
Ñan jino:
◼ Elikin am yokyokwe ri mweo, kwomaroñ lelok ñan e juõn tract im ba, “Un eo unin iar lotok rainin ej ñan jaketo-jaketak juõn nan in rejañ kin unin tel in eaorõk.”
◼ Ak kwomaroñ lelok juõn tract im ba, “Iumin jidik wõt ien, ij lotok yuk rainin kinke ij itoklimo in jelã ta lemnak eo am kin unin tel in.”
Elañe ej bõk tract eo:
◼ Jen bõjrak jidik im kajitõk ibben ri mweo kin ewi an lemnak kin title eo an tract in.
◼ Kwon lukkun roñjake, im kajeoñ bõk melele kin lemnak ko an ri mweo. Ilo joij kwon kamolol e kin uak ko an.
Ñan wõnmanlok wõt kin bwebwenato eo:
◼ Kwon readi im bwebwenato kake juõn ak elõñlok jen juõn eon, im ukõt wãwen kwalok eo am ekkar ñan itoklimo ko im men in aikwij ko an armij eo.
◼ Ñe juõn armij ej kwalok an itoklimo, elañe kwomaroñ, lelok juõn book im kwalok kilen katak Bible eo. Kwon karõk ñan bar jeblak.