Kwalok Nan Jen Em ñan Em
1. Ta kajitõk ko rej walok ikijen jerbal in kwalok nan jen em ñan em, im etke?
1 “Ro rekabel in kajededlok Mol eo ilo elõñ wãwen ko rej errã bwe jerbal in leto-letak book eo MILLENIAL DAWN ikijen air jerbal jen em ñan em, ilo tõrein, ej wãwen eo ebolemen tata ñan kwalok nan kin Mol eo.” Ennan in ear walok ilo magazine in Zion’s Watch Tower ilo July 1, 1893, ear kalikar kin aorõkin jerbal in kwalok nan jen em ñan em. Armij ro ibelakin lal rej kile bwe ej men eo kein kakõllan Ri Kennan ro an Jehovah. Kinke ebinlok ad iion armij ro ilo moko imwiir ilo jet ailiñ ko, jerbal in jen em ñan em ej wõr wõt ke tokjen?
2. Ta eon ko ilo Bible rej bedbedin jerbal in kwalok nan jen em ñan em?
2 Ej Bedbed ion Bible im Raorõk: Kwalok nan jen em ñan em ewõr bedbed ion Bible. Jesus ear kaiñi 70 ri kalor ro bwe ren etal ruo ian lok ñan moko imõn armij. (Luk 10:5-7) Ejjabto elikin an Jesus mij, Bible eo ej ba kin ri kalor ro an: “Im ran otemjej iloan tempel, im ilo jikir e jab mwij air katakin im kwalok Jisõs bwe E dri Kraist.” (Jerbal 5:42) Bareinwõt ri jilek Paul ear kwalok nan jen em ñan em ilo kijejeto.—Jerbal 20:20.
3. Ta jet ian tokjen ko remõn ilo ad kwalok nan jen em ñan em?
3 Kwalok nan jen em ñan em ej kilen kwalok nan eo eaorõk ñan kajededlok news eo emõn rainin. Ej kamaroñ kij ñan “kajitõk” wõn eo emõn iloan mweo ilo juõn wãwen elet im kwon. (Mat. 10:11) Armij ro ekkã air ainemõn ilo moko imwiir. Konono ibbeir ilo am jelmae ir—roñjake ainikeir, lo wãwen turin mejeir, im lale belakiir—enaj kamaroñ kij ñan kile itoklimo im inebata ko air. Ekkã an letok ien eo emõn ñan ad wõnmanlok ilo bwebwenato eo.
4. Ewi wãwen ad maroñ kõmman bwe jerbal in kwalok nan jen em ñan em en laplok tõbrak ie?
4 Kwon Kõmman Oktak ko: Ri jilek Paul ear mõnõnõ in kõmman oktak ko “kin gospel.” (1 Kor. 9:23) Bõlen jemaroñ ukõt schedule eo ad ñan kwalok nan ñe armij ro rej bed ilo moko, einwõt elikin lok raelepen ran eo, ilo jemlokin lok week ko, ak ilo ran in kakije ko. Jei moko ejelok armij ie, im kajeoñ rol ilo bar juõn ran ilo week eo ak ilo bar juõn awa ilo ran eo.
5. Ewi wãwen ro me ewõr joñan air maroñ jerbal kin nañinmij ko ibbeir remaroñ koba ilo jerbal in kwalok nan jen em ñan em?
5 Meñe ro me ewõr joñan air maroñ jerbal kin nañinmij ko ibbeir remaroñ bõk kunair ilo kwalok nan jen em ñan em. Bõlen jemaroñ kõmman karõk ko ñan bõk rein ibbed ñan moko ebidodo etal ñani, im ilo wãwen in kõtlok bwe ren maroñ kwalok nan ilo juõn joñan emõn. Juõn sister ejjab emõn an menono ak e kijelok, ear maroñ kwalok nan ilo juõn wõt em aolep lokin jimettan awa ko. Meñe eindein, ear lukkun mõnõnõ elikin an kar bed im kwalok nan ibben kumi in ri kwalok ro.
6. Etke jej aikwij kõmman bwe jerbal in jen em ñan em en juõn men jej ekkeini ad kõmmane ilo jerbal in kwalok nan?
6 Elõñ ro rej einwõt sheep jej lo ir ñe jej jerbal jen em ñan em. Juõn ri kwalok ear kallallal ilo juõn kejam im kar ba ñane: “Deloñtok. Ijelã wõn kwe. Ej kab mwij aõ jar ñan Anij bwe en jilkintok juõn ñan jibañ iõ, inem iar roñ kallallal ilo kejam eo. Ear roñjake jar eo aõ im jilkintok yuk.” Tõbrak ko rej kamol bwe Jehovah ej kajerammõn kilen jerbal in kwalok nan in. (Mat. 11:19) Kwon kõmman bwe jerbal in jen em ñan em en juõn men kwoj keini am kõmmane ilo jerbal in kwalok nan.