Kwõmaroñ Ke Kwal̦o̦k Naan in Jota?
1. Ekkar ñan juon bok, ñããt eo rijjelõk Paul ekõn kwal̦o̦k naan jãn em̦ ñan em̦?
1 Ekkar ñan juon bok me ej kwal̦o̦k kõn m̦akũtkũt ko an armej ro etto ilo Baibõl̦, ej ba bwe rijjelõk Paul ekõn kwal̦o̦k naan im em̦ ñan em̦ “jãn 4 awa ãlikin raelep ñan ñe elukkuun boñ.” Jejjab jel̦ã ñe Paul ear karõk bwe aolep iien en kwal̦o̦k naan ilo iien in, ak jejel̦ã bwe Paul ear m̦õn̦õn̦õ in kõm̦m̦an ‘men otemjej kõn gospel’ eo. (1 Ko. 9:19-23) Men in ej kitibuj an kar karõk bwe en em̦ ñan em̦ ilo iien eo me ear maroñ tõpar elõñ armej ro.
2. Etke kwal̦o̦k naan in jota ej juon iien em̦m̦an?
2 Ri kwal̦o̦k naan ro ilo elõñ jikin ko ekkã wõt aer em̦ ñan em̦ ilo jibboñ otemjej. Ak eñin ke iien eo em̦m̦antata ñan em̦ ñan em̦ ilo jikin eo kwõj pãd ie? Juon pioneer ear ba kõn jikin eo me eklejia eo an ej kwal̦o̦k naan ie: “Elukkuun jeja armej rej pãd ilo m̦oko ñe ej raan. Ak ñe ejota, enañin aolep armej ro rej pãd im̦oko im̦weer.” Kwal̦o̦k naan ilo jota emaroñ iien eo em̦m̦antata ñan ad tõpar armej el̦aptata em̦m̦aan ro im jaketo jaketak nuuj eo em̦m̦an ippãer. Ilo iien in, ekkã wõt an armej ro jab poub im rem̦õn̦õn̦õ in bwebwenato ñe jej kwal̦o̦k naan ippãer. Em̦m̦aan ro ilo eklejia eo rej aikuj kõm̦m̦an kweilo̦k in kwal̦o̦k naan in jota el̦aññe enaaj jipañ eklejia eo.
3. Ewi wãween jemaroñ kwal̦o̦k lol̦o̦kjen̦ ñe jej kwal̦o̦k naan in jota?
3 Kwal̦o̦k Lol̦o̦kjen̦: Ñe jej kwal̦o̦k naan in jota, eaorõk bwe jen kwal̦o̦k lol̦o̦kjen̦. Ñan waanjoñak, el̦aññe kwõj lo bwe ejjab em̦m̦an iien eo ñan armej eo, bõlen ej iien an kõjota, em̦m̦an kwõn ba bwe kwõnaaj bar jepl̦aak tokãlik. El̦aññe ejok marok, kwõn jutak ijo me armej eo m̦weo emaroñ lo eok, im m̦õkaj im kwal̦o̦k kajjiem̦ im unin am̦ lol̦o̦k e. Ej bareinwõt em̦m̦an bwe kwõn jerbal ippãn juon armej ak juon kumi in ri kwal̦o̦k naan ro. Im kwõn etal ilo ial̦ ko me ewõr l̦ait ie im kwõjjab make iaam̦. En jab lukkuun boñe am̦ kwal̦o̦k naan kõnke kwõmaroñ ko̦kkure an armej ro pojak in kiki im kakkije. (2 Ko. 6:3) El̦aññe ekauwõtata ñan kwal̦o̦k naan ilo bukwõn eo ãlikin an jok marok, em̦m̦an kwõn kwal̦o̦k naan ie ilo iien eo ej emmeramram wõt.—JK. 22:3.
4. Ta jeraam̦m̦an ko jenaaj loi el̦aññe jej kwal̦o̦k naan in jota?
4 Jeraam̦m̦an Ko: El̦apl̦o̦k an kam̦õn̦õn̦õ kwal̦o̦k naan ñe jej maroñ iioon armej ro im bwebwenato ippãer. Im ñe el̦apl̦o̦k ad maroñ kõm̦m̦ane men in, enaaj l̦apl̦o̦k ad maroñ bõk kun̦aad ñan jipañ “lo̦mo̦o̦ren armej otemjej, im bwe ren item jel̦ã m̦ool” eo. (1 Ti. 2:3, 4) Kwõmaroñ ke kõm̦m̦an oktak ko ilo m̦akũtkũt ko kwõj kõm̦m̦ani bwe kwõn kwal̦o̦k naan in jota?