Bukõt Ro Remõn Retellokiir
1 Nan in jiroñ ko an Jesus ñan kajejjet jerbal in kwalok nan ej letok juõn aitwerõk ñan kij. Ear ba: “Ilo jabrewõt jikin kwelok elap ak erik kom naj dreloñ ie, komin kajitõk wõn eo emõn iloan.” (Mat. 10:11) Ilo ran kein ke ejeja an armij bed ilo moko imwiir, ewi wãwen emaroñ keie ad bukõt ro remõn?
2 Etale Territory Eo Am: Jino ilo am etale territory eo am. Ñããt eo ekkã an armij bed ilo moko imwiir? Ia eo jemaroñ lo ir ie ilo ran? Ewõr ke juõn ran ilo juõn week ak juõn ien ilo ran eo ñe rej mõnõnõ in karuwainenetok armij ro rej lolok ir? Ilo am ukõt ien jerbal in kwalok nan eo am bwe en ekkar ñan manit im wãwen ko an armij ro ilo territory eo ilo bukwon eo emaroñ jibañ yuk ñan kõtõbrak tokjen eo emõntata.—1 Kor. 9:23, 26.
3 Elõñ ri kwalok ro rar lo tõbrak in iione armij ro ilo jota. Jet ri mweo rej kakije ilo ien eo im elaplok air mõnõnõ in roñjake. Ñe ien ran ekadu lok ilo alliñ ko ilo ien bio, kwalok nan ilo jota ikijen kajerbal telephone (ijo rej kamelimi) emaroñ bolemen. Jerbal ilo jikin business im ilo jikin ko ilobwilij rej bareinwõt wãwen ko ñan jibadõk armij kin news eo emõn.
4 Ilo juõn alliñ ke ear laplok jerbal in kwalok nan, juõn congregation ear karõk ñan kwalok nan ilo elikin raelep in Saturday im Sunday im ilo jotenin Wednesday im Friday. Rar bareinwõt karõk ñan kwalok nan ikijen kajerbal telephone im ñan jerbal ilo jikin business. Kinke karõk kein rar kõmman bwe ren lukkun kijejeto kin jerbal in kwalok nan, congregation eo ear bebe ñan wõnmanlok kaki.
5 Tiljek in Bar Jeblak: Elañe ebin lo armij ilo mweo ilo territory eo am ñe kwoj bar jeblak, ilo jemlokin kajjojo ien kwoj lolok e, ekoba ien lolok eo moktata, kajeoñ in kõmman juõn karõk ñan bar jeblak. Inem, kwon tiljek in kajejjet appointment eo am. (Mat. 5:37) Elañe ekkar, kwomaroñ kajitõk kin number in telephone eo an ri mweo. Men in emaroñ bareinwõt jibañ yuk ñan bar iion armij eo.
6 Jibadbad ko ad retiljek ñan bukõt ro remõn im ñan kaddeklok itoklimo eo air enaj bõktok kajerammõn eo an Jehovah.—Ken. 21:5.