Kwalok Nan Ikijen Kajerbal Telephone me Ewõr Tõbrak Ie
1 Mejenkajjik eo ad einwõt Ri Kennan ro an Jehovah ejjab ñan ad bõk kunad wõt ilo jerbal in kwalok kin news eo emõn ak bareinwõt ñan jibadõk aolep armij joñan ad maroñ kin ennan in Ailiñ eo. (Jerbal 10:42; 20:24) Ke jerbal eo jen em ñan em ej wõnmanlok einwõt wãwen eo elaptata ñan jibadõk armij, jej kile bwe meñe kajerbal wãwen in ebolemen ñan kwalok nan jejjab maroñ wõt in lo aolep armij. Inem ñan ‘kajejit jerbal eo ad,’ jej kajerbal kõl ko jet bareinwõt—ekoba kwalok nan ikijen kajerbal telephone—ñan bukõt ro rej einwõt sheep.—2 Tim. 4:5.
2 Ilo elõñ jikin ko, armij rej jokwe ilo apartment ko ebin an ro jet deloñ iloan, ilo em ko elõñlok jen juõn family ej jokwe ie, ak ilo jikin ko kwoj aikwiji juõn key ñan deloñ iloan kejam in worwor eo, ijo ebin ad kwalok nan jen em ñan em ñan jibadõk armij. Meñe ilo territory ko ijo jemaroñ kwalok nan jen em ñan em ie, elõñ armij rejako jen mweo imwiir. Bõtab, elõñ ri kwalok ro rej lo tõbrak in jibadõk armij rein ilo air kajerbal telephone. Ilo juõn jibboñ ke rar kwalok nan jen em ñan em, ruo ri belele ro rar iion ratimjuõn moko ejako armij ro ie. Elikin air jeblak ñan Kingdom Hall eo, rar bukõt mwõkein ilo reverse directory eo ak juõn book eo ej kõlajrak number in telephone ko ikijen kajerbal address. Rar kajerbal telephone number kein im iion ralitõk ian armij ro rar jako!
3 Kwoj abwin ke in kobaik kwalok nan ikijen telephone ilo jerbal in kwalok nan eo am? Juõn brother ej kamol: “Ijjab kõnan bwe jabdewõt armij ren telephone iõ ilo mweo imõ ñan wiakake jabdewõt men, inem ewõr ibba juõn lemnak nana ikijen wãwen in ñan kwalok nan.” Bõtab, elikin an telephone lok ñan ruo wõt armij, ear ba: “Elukkun emõn ibba! Iar jab lemnak enaj kar maroñ eindein, ak elukkun emõn ibba! Armij rejoij ñe rej konono ilo telephone eo, im jabdewõt men kwoj aikwiji rej bed ebak iturõm. Elap an bolemen!” Ear eindein lemnak an juõn sister: “Iar jab lukkun mõnõnõ kin kwalok nan ikijen kajerbal telephone. Ilo mol, iar jab kõnan kõmmane. Ak iar kajeoñ in kõmmane im lo bwe ear lap an wõr tõbrak. Ewõr 37 bar jeblak ko jen aõ kar kwalok nan ikijen kajerbal telephone im elõñ Bible study ko jen aõ maroñ lale!” Elañe kwoj mõnõnõ ñan am kajeoñ kwalok nan ikijen kajerbal telephone, kwe bareinwõt kwomaroñ lo tõbrak.
4 Kõmman Karõk ko kin Kwalok Nan Ikijen Kajerbal Telephone: Jerbal in kwalok nan an congregation eo ej bed iumin tel eo an service overseer eo. Ekkar ñan aikwij eo, kumi in elder ro remaroñ jitõñ bar juõn elder ak juõn ministerial servant eo ewõr an maroñ ñan jerbal ibben ñan karõk jerbal in kwalok nan ikijen kajerbal telephone. Eo ej lale territory ko ej aikwij bareinwõt bõk kunan, kinke e eo ej lelok territory ko im kejbãrok juõn record kake. Bareinwõt, circuit overseer eo enaj itoklimo in jelã kin wõnmanlok eo an program eo.
5 Elañe ewõr jet jikin ko ilo territory eo am me kwojjab maroñ jerbale ikijen kwalok nan jen em ñan em, ren kõmman territory ko me rej jerbale ikijen kajerbal telephone. Brother eo ej bõk eddo eo en kõmman juõn lajrak in address ko me renaj kajerbali einwõt territory rot kein, im kajjojo iair en jab lukkun lap bwe en ekeini air jerbale. Aolep map in territory ko me ewõr jikin rot in ren kakõlleiki im je bwe jikin in kar karõke ñan kwalok nan ie ikijen kajerbal telephone.
6 Kwomaroñ bõk number in telephone ko jen ia? Emaroñ wõr juõn reverse directory eo ej kõlajrak number in telephone ko ikijen address ko ilo public library eo. Elañe juõn apartment me ebin an ro jet deloñ ie ewõr juõn air make lajrak in telephone, bõlen kwomaroñ bõk number ko jen e. Elañe jab, eokwe bõlen kwomaroñ bõk etan armij ro rej jokwe ie jen lajrak eo ej bed ilo lobby eo inem bukõte ilo book in telephone eo.
7 Elder ro remaroñ bõk kunair ilo jerbal in ilo air karõk bwe ro ewõr air iminene in kwalok nan ikijen kajerbal telephone ren kamineneik ro jet, bõlen ikijen program in Pioneers Assist Others (Pioneer ro Rej Jibañ Armij Ro Jet). Jen ien ñan ien, mõttan eo ilo Service Meeting ikijen aikwij eo an congregation eo remaroñ kajerbale ñan kalaplok tõbrak eo kin wãwen in ñan kwalok nan.
8 Ñe elder ro rej lolok ro rejjab maroñ dioj jen mweo imwiir bõlen kin air nañinmij ak remõjno kin air ritto, remaroñ rejañ rein ñan bõk kunair ilo kwalok nan ikijen kajerbal telephone. Bõlen elder eo emaroñ kwalok kilen ilo an telephone lok ñan jet number ko ñe ri kwalok eo ej lale. Inem ri kwalok eo emaroñ bõk kunan ilo an make telephone lok ñan juõn armij. Elõñ ro rar jino ilo wãwen in rej kajerbal jet minute ko kajjojo ran ilo jerbal in, im ej lukkun emõn ibbeir.
9 Nan in Rejañ ko ñan Lo Tõbrak: Ke Jesus ear jilkinlok ri kalor ro an ñan kwalok nan, ear “jilkinlok ir karuolok.” (Luk 10:1) Etke? Ear jelã bwe ilo air jerbal ibben don renaj maroñ katak jen don im kõketak don. Men in ej mol bareinwõt ilo kwalok nan ikijen kajerbal telephone. Ilo ami jerbal ibben don, kwomaroñ katak jen don, bwebwenato kin tokjen ko rar walok, im kwalok nan in rejañ ko kin ta eo kom maroñ kõmmani ilo bwebwenato eo juõn. Meñe ilo ien eo ñe juõn ej konono ilo telephone, kwomaroñ jibañ don bukõte kamelele ko rekkar.
10 Bwe en emõn am lemnak im kalmenlokjen, jijet ilo jikin eo ijo kwomaroñ likit book ko am—Bible, book in Reasoning (Kõmmanwa), Jen Kõmmõne brochure eo, magazine ko, im men ko eierlok wõt—imam. Jeje jet ennan ko, im likiti ijo kwomaroñ loi. Kwon bojak in kejbãrok juõn record ejimwe im bolemen, ekoba ran eo im awa eo bwe kwon jelã ñããt eo kwomaroñ bar iione.
11 Ekkã an armij ekkõl ñe rejjab kile ainikien ilo telephone eo. Inem kwon kwalok jitõbõn mãnãn, joij, im jelã kilen. Ri mweo emaroñ kajerbal ainikiõm wõt ñan jelã kin kain armij rot kwe im ewi joñan am mol. Kwon ainemõn im konono jen buruõm. En jab mõkaj am konono im en alikar am kennan im en bwe ainikiõm bwe armij eo en maroñ roñ ta eo kwoj ba. Kõtlok bwe en wõr ien an ri mweo konono. Kajerbal aolepen ãt ko etam, im ba bwe kwoj jokwe ilo bukwon eo. Jejjab kõnan bwe armij eo en lemnak bwe jej wiakake mweiuk ikijen kajerbal telephone. Jen am ba bwe kwoj telephone lok ñan aolep ri jokwe ro ilo juõn em ak apartment, ba bwe kwar itoklimo in konono ibben.
12 Ennan ko Ñan Kajerbal Telephone: Elõñ ian nan in ijjino ko rej walok ilo peij 9-15 ilo book in Reasoning jemaroñ ukõti ñan kwalok nan ikijen kajerbal telephone. Kwomaroñ ba: “Ij telephone wõj ñan yuk kinke ijjab maroñ make iwõj im lolok yuk. Unin iar telephone yuk ej ñan lale lemnak eo am kin juõn kajitõk ekaitoktoklimo.” Inem kwalok kajitõk eo.
13 Jemaroñ kajerbal ennan eo mokta iumin unin tel eo “Crime/Safety (Kowadoñ/Kejbãrok jen Men in Uwõta ko) ilo wãwen in: “Yokwe. Eta in _____. Ij jokwe ilo bukwon in. I kõnan kamol ñan yuk bwe ijjab wiakake jabdewõt men ak bõk juõn ekkatak. Ij telephone wõj kinke ij itoklimo kin wãwen jemaroñ ainemõn jen men in uwõta ko. Elõñ kowadoñ ko rej walok ibelakid, im ej jelet mour ko ad. Kwoj lemnak ke bwe enaj wõr juõn ien ñe aolep armij renaj maroñ etetal in boñ im eñjake air jokane? [Kõtlok an uak.] I kõnan read wõj kin ta eo Anij ear kallimur bwe enaj kõmmane.”
14 Kajju im tilmaake juõn katak kin Bible ñe jej telephone ear walok ilo tokjen ko remõn. Kwomaroñ kwalok kilen katak iumin jet wõt minute ko. Ba bwe kwo kõnan lolok armij eo ilo mweo imõn ñan wõnmanlok ilo katak eo, ak elañe armij eo e makoko, ba bwe kom maroñ wõnmanlok kin katak eo ilo telephone ilo bar juõn ran.
15 Ñe kwoj kajemlok juõn bwebwenato, lemnak kin juõn men me enaj tellok ñan am maroñ lolok armij eo ilo mweo imõn ak ñan jilkinlok ñan e juõn book ak magazine ilo post office. Elañe armij eo e makoko in lewõj address eo an, ba bwe kwoj mõnõnõ in bar telephone lok ñan e. Kwomaroñ aikwij konono ibben elõñ alen mokta jen an mõnõnõ in kõtlok am lolok e ilo mweo imõn.
16 Kwon Bõk Buñten Nee eo Mokta: Juõn sister 15 yiõ dettan ear ijjino jerbal in kwalok nan eo an ilo jibboñ ilo an telephone lok ñan juõn armij. Ear konono ibben juõn kõrã eo ear mõnõnõ in bõk Knowledge book eo. Ke sister eo ear bõklok book eo ñan mweo imen, kõrã eo ear kõnan jelã ewi wãwen sister eo ear bõk number in telephone eo an, ke ejjab bed ilo lajrak eo ilo book in telephone eo. Sister eo ear bwid an jibede number ko! Kõrã eo ear mõnõnõ in katak im kiõ ej juõn ri kwalok ejañin baptais.
17 Juõn sister ear bõk juõn telephone territory ak ear jab jerbale iumin jilu week ko kin an kar mijak. Ta eo ear kaberan e ñan an jinoe? Ear kememej katak eo ilo January 22, 1997, magazine in Awake! etan “When I Am Weak, Then I Am Powerful (Ñe I mõjino, Inem I Kajur).” Kar ikijen juõn Ri Kennan eo ej kwalok nan ikijen kajerbal telephone meñe ear wõr joñan an maroñ kõmmane kin an wõr jorrãn ko ilo enbwinin. Sister eo ear ba: “I ar jar ñan Jehovah im kajitõk kin kajur. Iar kajitõk ibben ñan letok nan ko rejejjet ilo ennan eo aõ.” Ta kar tokjen eo ilo ran eo mokta ilo an kwalok nan ikijen kajerbal telephone? Sister eo ej ba: “Jehovah ear uake jar eo aõ. Armij ro rar eoroñ iõ, im iar karõk ñan bar jeblak ibbeir.” Tokelik kwalok nan eo an ilo kajerbal telephone ear walok ilo juõn Bible study. Ej kajemlok: “Bar juõn alen Jehovah ear katakin iõ ñan liki e im jab ilo ña make.”—Ken. 3:5.
18 Kwalok kin mol eo ikijen kajerbal telephone ear erom juõn wãwen ewõr tõbrak ñan kwalok kin news eo emõn. En emõn am kebojak, im bõk kunam kin aolepen buruõm. Kwon jab ebwer elañe armij rejjab uak ilo emõn ilo ien ko mokta ñe kwoj kõmmane. Jar kin tel eo an Jehovah, im keidi men ko kwar je ibben ro jet me rej kwalok nan ilo wãwen in ekairujruj. Kin juõn kõnan ñan jab likjap in kebak aolep armij ro ilo territory eo ad, jen kajejjet jerbal eo ad kin juõn eñjake in ekaiuriur.—Rom 10:13, 14.