Kwomaroñ ke Ukõt Schedule eo Am?
1. Etke jej aikwij ukõt schedule eo ad ñan kwalok nan?
1 Einwõt Ri Christian ro remol, emwij ad bõk nan in kir eo bwe jen “dri añwõr armij.” (Mat. 4:19) Einwõt lukkun ri eñwõd ro, tõbrakin jerbal in eñwõd armij enaj laplok elañe jej karõk ien ñan kwalok nan ñe armij rej bed ilo moko imwiir. Ilo elõñ ailiñ ko, alliñ ko rej bedotok enaj aetoklok ien ran. Elõñlok armij rej bed ilo moko imwiir ilo elikin raelep im jota. Ekkã air jab boub, im renaj mõnõnõ ñe ri lotok ro rej itok. Kwomaroñ ke ukõt schedule eo am ñan kwalok nan ilo ien kein?—1 Kor. 9:23.
2. Ta jet ian wãwen ko jemaroñ tõbar elõñlok armij kin news eo emõn?
2 Kwalok Nan ilo Jota: Ñe jej karõk lok iman ñan kwalok nan ilo jota, men in ej kamaroñ kij ñan tõbar elõñlok armij kin news eo emõn. (Ken. 21:5) Jodikdik ro remaroñ kwalok nan elikin school. Ro jet remaroñ kõmmane elikin jerbal. Jet kumi in book study ko remaroñ karõk ñan kwalok nan iumin juõn awa mokta jen ien katak.
3. Ilo wãwen et ko kwomaroñ kwalok nan ilo elikin raelep im jota ilo territory eo am?
3 Ñe jej kwalok nan jen em ñan em ilo elikin raelep ak jota jenaj maroñ konono ibben armij ro me ekkã air jako jen moko imwiir. Ilo elõñ territory ko, jerbal in kwalok nan iturin ial im ilo jikin ko jet ilobwilij remaroñ bareinwõt kõmmane ilo jota. Elõñ rej lo bwe ien eo emõntata ñan bar jeblak ibben armij ro im jino katak kin Bible eo ej ilo jota.
4. Etke eaorõk ñan kwalok lolokjen im joij ñe kwoj kwalok nan ilo jota?
4 Kwoj Aikwij Kwalok Lolokjen: Kwoj aikwij kwalok lolokjen ñe kwoj kwalok nan ilo jota. Ekkã an emõn bwe kwon kwalok nan ilo awa ko jinoin ilo jota, jen am lolok armij ñe rej bojak in kiki. (Pil. 4:5) Ñe kwoj kallallal, jutak ijo enaj bidodo air lo yuk, im kwon kalikar wõn kwe. Kwalok ilo mõkaj unin am lolok ir. Elañe ejjab emõn ien eo kwoj lolok ir, einwõt elañe family eo ej mõñã, ba bwe kwonaj itok ilo bar juõn ien. Ien otemjej kwon kwalok am joij.—Mat. 7:12.
5. Ewi wãwen jemaroñ bõprae wãwen ko rekauwatata ñe jej kwalok nan?
5 Jej aikwij bareinwõt ekkõl kin wãwen ko rekauwatata. Elañe kwoj kwalok nan ñe ej jino marok, ej men in meletlet bwe kajjojo en wõr mõttair ak ren bed ilo kumi ko. Bed ilo jikin ko emõn an meram im ejjab jenolok. Kwalok nan ilo jikin ko wõt im kwoj eñjake bwe ejjab kauwatata. Bõprae jikin ko rekauwatata ñe e marok.—Ken. 22:3.
6. Tokjen et eo juõn kwomaroñ bõke jen am kwalok nan ilo elikin raelep im jota?
6 Ñe jej kwalok nan ilo elikin raelep im jota jenaj maroñ jerbal ibben auxiliary im regular pioneer ro. (Rom. 1:12) Kwomaroñ ke ukõt schedule eo am bwe kwon maroñ bõk kunam ilo jerbal in?