‘Kõmõn Men Otemjej kin Gospel’
1. Ta eo juõn dri kwalok kin Ailiñ eo en kar mõnõnõ in kõmõne ñõn ro jet, im etke?
1 Dri Jilik Paul ear eñjake erro eo iben ñõn kwalok gospel eo ñõn ro jet. (1 Kor. 9:16, 19, 23) Ilo ejja wãwen in, ar kõnan bwe ro jet ren bõk mour in drio, ej kamakit kij ñõn kamaat ar maroñ ñõn kwalok gospel eo ñõn ir.
2. Ta oktõk ko jenaj mõnõnõ in kõmõni ilo ar kwalok nan, im etke?
2 Kwalok Nan Ijoko im ilo Ien ko Jemaroñ Lo Armij Ro: Juõn dri añwõr emõn ej dror eo ak ok eo an, jab ilo jabrewõt ien ak jikin eo ekõnan, ak ej añwõr ijo im ilo ien eo ejela enaj lo elõñ iik ko ie. Kij bareinwõt, einwõt “dri añwõr armij” jenaj aikwij karõk ar kwalok nan bwe jen lo armij ilo territory eo ar, im ilo wãwen in jenaj kalaplok ar mõnõnõ in aini “jabdrewõt kain eek.” (Mat. 4:19; 13:47, UBS) Jemaroñ ke lolok armij ro ilo jota ñõn imoko imwiir im kwalok nan ibeir ak ilo jabrewõt jikin kwoj iion ir ie ilo jiboñ? Mejenkajik eo an Paul kar ‘bwe en let an kennan kin nuuj eo emõn kin joij an Anij,’ im ear kate wõt bwe en kajejit men in.—Jerb. 17:17; 20:20, 24, NW.
3, 4. Ewi wãwen jemaroñ jibõñ aolep armij ro ilo ar kwalok nan, im ta tõbrõk ko jenaj loi?
3 Ukot Wãwen Am Kwalok ñõn Kajejit Aikwij Eo: Ekajju wãwen an dri añwõr ro añwõr bwe en bo iik ko rekõnan. Ewi wãwen ar maroñ eindrein ilo ar kwalok nan kin Ailiñ eo bwe en emõn ñõn armij ro ilo territory eo ar? Ilo joij, jemaroñ bõkmantak juõn men enañin aolep armij ro rej inebata kake, inem lukkun roñjake ñe rej kwalok lemnok ko air kin men in. (Jem. 1:19) Ñõn tur burueir, jemaroñ kajitõk kin ewi wãwen air lemnok. (Ken. 20:5) Ilo wãwen in jenaj maroñ jela ñõn ukot ennan eo ar ekkar ñõn aikwij eo ibeir bwe en maroñ tõbar burueir. Paul ear erom “men otemjej ñõn armij otemjej.” (1 Kor. 9:22) Ki eo ñõn ar maroñ tõbar buruen armij ro ej ilo ar jela kilen ukot wãwen ar kwalok nan ekkar ñõn aikwij ko an kajuju armij.
4 Ej juõn menin kamõnõnõ elap ñõn lelok “nan ko remmõn, nan in ainemmõn!” (Ais. 52:7, UBS) Jen kate in ‘kõmõn men otemjej kin gospel,’ bwe jen tõbar elõñlok armij ro.—1 Kor. 9:23.