Kwõj Ke M̦õn̦õn̦õ in Kõm̦m̦an Oktak?
1. Kõnke mour ilo lal̦ in ej oktakl̦o̦k wõt, ta wãween ko jej aikuj kõm̦m̦an oktak ie?
1 Lal̦ in ej ãinwõt juon tieta me eoktaktak baat ko ie, jikin ko ie, im armej ro ie. Eñin unin jãn iien ñan iien ej aikuj oktak wãween ad kwal̦o̦k naan. Jej aikuj bar kõm̦m̦an oktak ko ilo iien ko jej kwal̦o̦k naan, im wãween ad bwebwenato ippãn armej ro. Kwõj ke m̦õn̦õn̦õ in kõm̦m̦an oktak?
2. Bwe jen maroñ l̦oore doulul in an Anij, etke jej aikuj kõm̦m̦an oktak ko ilo ad kwal̦o̦k naan?
2 Wãween Ad Kwal̦o̦k Naan: Jãn kar jem̦aan in an Kũrjin ro kõm̦m̦an oktak ko. Ñan waanjoñak, ilo iien eo m̦oktata me Jijej ear jilkinl̦o̦k rũkal̦oor ro an ñan kwal̦o̦k naan, ear jiroñ er bwe ren jab ebbõk nien m̦õñã im jããn ippãer. (Matu 10:9, 10, UBS) Bõtab tokãlik, ear oktak naan in jiroñ ko an ñan rũkal̦oor ro an kõnke ear jel̦ã bwe enaaj nana an armej ro kõm̦m̦an ñan er im renaaj aikuj ilo̦k im kwal̦o̦k naan ilo jikin ko rettol̦o̦k. (Luk 22:36) Doulul in ear kõjerbale elõñ wãween ko reoktak jãn doon ilo jerbal in kwal̦o̦k ium̦win iiõ ko 100 me rej kab jem̦l̦o̦k. Ñan waanjoñak, ilo kar tõre ko etto, rar kõjerbali peba jiddik ko me etaer ej testimony card. Rar bar kõjerbal retio ko im wa ko me elõñ speaker killep ie ñan kwal̦o̦k naan. Rainin, kõnke ejeja an armej ro pãd ilo m̦oko im̦weer ilo elõñ jikin ko, doulul in ej rõjañ kõj bwe jen jab baj em̦ ñan em̦ wõt, ak jen bar kwal̦o̦k naan ilo̦bwilej im ilo jabdewõt iien em̦m̦antok. Em̦õj bar rõjañ kõj bwe jen em̦ ñan em̦ ilo jota kõnke eñin ej iien eo me ri jerbal ro rej ro̦o̦l ñan m̦oko im̦weer. Doulul in an Jeova ej kõm̦m̦an oktak ko aolep iien. Kwõj ke kate eok bwe kwõn l̦oore oktak kein?—Ezk. 1:20, 21.
3. Ñe jejel̦ã kilen ukoktak, ewi wãween men in ej jipañ kõj bwe jen jel̦ãl̦o̦k kilen kwal̦o̦k naan?
3 Wãween Ad Bwebwenato Ippãn Armej Ro: Ta ko ekkã an armej ro ilo bukwõn ko am̦ inepata kaki? Rej ke inepata kõn baam̦le ko aer, ak kõn an penl̦o̦k mour im l̦apl̦o̦k nana? Eaorõk ñan jel̦ã men kein bwe jen maroñ jel̦ã ta ko jen bwebwenato kaki ñe jej kwal̦o̦k naan ippãn armej ro. (1 Ko. 9:20-23, UBS) Ñe armej ro rej kwal̦o̦k bũrueer ñan kõj, jen jab ekkaiuriur in uwaake er im wõnm̦aanl̦o̦k wõt kõn ennaan eo me jaar kõpooje. Em̦m̦anl̦o̦k ñe jej kõm̦m̦an oktak ilo ad bõk iien ñan kajjioñ in jipañ er kõn apañ eo aer.
4. Etke jej aikuj m̦õkaj im kõm̦m̦an oktak ilo jerbal in kwal̦o̦k naan kiiõ?
4 M̦õttan jidik enaaj wal̦o̦k oktak ko rel̦l̦ap ilo lal̦ in, im eñtaan eo el̦ap enaaj jinoe. Baibõl̦ ej ba bwe “ekadu iien jãn kiiõ.” (1 Ko. 7:29) Elukkuun aorõk bwe jen m̦õkaj im jel̦ã kilen ukoktak kiiõ ilo kwal̦o̦k naan bwe en maroñ l̦ap tõprak ko jej kõm̦m̦ani ilo tõre in me ekadu iien!