Kwalok Am Itoklimo —Ilo Am Jelã Ukoktak
1 Ri jilek Paul ear likit juõn joñok emõn ilo an ukõt wãwen an kwalok kin news eo emõn ekkar ñan iminene im lemnak ko an ro rej roñjake e. (1 Kor. 9:19-23) Jej aikwij kõmman eindein. Elañe jej lemnaklok iman, ekkã ad maroñ ukõt ennan ko rej walok ilo Ad Jerbal Ñan Ailiñ Eo bwe en jejjet ñan aikwij ko an armij ro ilo jikin ko jej kwalok nan ie. Ñe jej kebak juõn em, jemaroñ lo men ko me ri mweo ej itoklimo kake im jemaroñ kobaik men kein ilo ennan eo ad. Bõtab, ewõr bar juõn wãwen jemaroñ ukõt ennan ko ilo jerbal in kwalok nan eo ad.
2 Ukõt Ennan eo Ad Ekkar ñan Ta eo Ro Jet Rej Ba: Ñe jej kwalok kin news eo emõn, ekkã ad bõkmantak juõn kajitõk bwe ri mweo en uake. Ta lemnak eo am kin uak eo? Kwoj baj kamolol wõt e ke im wõnmanlok kin ennan eo kwar keboje? Ak men eo kwoj ba ej kwalok ke bwe kwoj lemnak kin uak ko an ri mweo? Elañe kwoj kwalok an mol am itoklimo kin ta eo ro jet rej ba, kwomaroñ kajerbal kajitõk ko jet ñan lukkun jelã ta eo ej bed ilo lemnak eo air. (Ken. 20:5) Ilo wãwen in kwomaroñ kajejjet ennan in Ailiñ eo ekkar ñan men ko ri mweo ej inebata kaki.
3 Jej aikwij mõnõnõ in konono kin katak ko jet ijellokin katak eo jaar karõk in bwebwenato kake. Elañe jej jino ilo ad bwebwenato kin juõn abañ ear walok ilo news ak ri mweo ej bõkmantak juõn men ear walok ilo bukwon eo me ej jelet e, itoklimo eo ad emol ñan kabwe aikwij ko an ri mweo enaj kamakit kij ñan ukõt bwebwenato eo ad kin Bible eo ñan men ko raorõklok ibben.—Pil. 2:4.
4 Ukõt Ennan eo Ad: Ñe ri mweo ej bõkmantak juõn kajitõk, enaj emõn elañe jej wõnmanlok kin bwebwenato eo ilo bar juõn ien, elikin ad bukõt melele ko jet kin katak eo. Jemaroñ lelok book ko me elaplok air kamelele kin katak eo. Aolep wãwen kein rej kwalok itoklimo eo ad emol ñan jibañ ro jet ñan air jelã Jehovah.—2 Kor. 2:17.