Kilen bwe En Em̦m̦anl̦o̦k Wõt Ad Kwal̦o̦k Naan​—Kwal̦o̦k Itoklimo

Unin an Aorõk Kõl In: Jijej ear kea kõn kajjojo armej im ear kwal̦o̦k an itoklimo kake er. Ñan waanjoñak, juon iien ke ear itõn kõmour juon em̦m̦aan ejarroñroñ, ear kile bwe em̦m̦aan in ejook jidik. Kõn men in, Jijej ear bõke jãn ijo elõñ armej ie. (Mark 7:31-35) Ear bar jel̦ã kõn rijjilõk ro an bwe ewõr joñan aer maroñ. Kõn men in, ear jab lukkuun lel̦o̦k elõñ mel̦el̦e ñan er. Men in ej kaalikkar bwe Jijej ear kea im l̦õmn̦ak kõn er. (Jon 16:12, UBS) Bareinwõt, meñe Jijej ear wanlõñl̦o̦k im pãd ijo jikin ilañ ak ear jab bõjrak jãn an l̦õmn̦ak kake ro jet. (2 Ti. 4:17, UBS) Kõj rũkal̦ooran Kũraij im kõn men in jen l̦oore joñak in an. (1 Pi. 2:21; 1 Jon 3:16, 18, UBS) Enaaj l̦apl̦o̦k ad lo tõprak ilo jerbal in kwal̦o̦k naan ñe jej l̦õmn̦ak kõn armej eo jej kwal̦o̦k naan ñan e. Jemaroñ l̦õmn̦ak kõn ta ko ej inepata kaki, men ko rem̦m̦an ippãn, im wãween ko ippãn. Armej eo enaaj m̦õn̦õn̦õl̦o̦k in roñjake kõj ñe ej kile bwe jejjab baj kwal̦o̦k naan wõt ñane im lel̦o̦k an bok, ak jej bar kwal̦o̦k ad itoklimo im kea kõn e.