Kwalok Itoklimo eo Am —Ilo Am Reito-Reitak Ibelakõm
1 Jehovah Anij im Jesus Christ rej bed imantata ilo air kile aikwij ko an armij im lelok jibañ ñan ir. (2 Kron. 16:9; Mark 6:34) Ilo ad jerbal in kwalok nan, ñe jej kile men ko armij ro rej itoklimo im inebata kaki, jenaj maroñ ukõt wãwen eo jej kwalok kin news eo emõn.
2 Kwon Lale Tibdik in Men ko: Jesus ear lale men ko ibelakin. (Mark 12:41-43; Luk 19:1-6) Eindein, ñe jej kebak kejam in juõn em im lo kainõknõk ko an kabuñ, nan ko rej eddeb ion wa ko, ak kein ikkure ko ilo melan in mweo, jemaroñ kõmman katak ko remõn ñan ad kwalok ilo bolemen kin news eo emõn.
3 Wãwen turin mejen im kõmman ko an remaroñ kalikar kin eñjake ko an. (Ken. 15:13) Bõlen an kar luji juõn eo ejitenburu ibben ak bar juõn abañ ekaburomõjmõj ear kõmman an aikwij bõk nan in kainemõn. Emaroñ mõnõnõ in read jet eon ko rekkar ilo Bible. (Ken. 16:24) Ri mweo ej ekaiuriur in etal ke ak kajajaik juõn niñniñ ejañ? Elañe eindein, enaj emõnlok ñan itok ilo bar juõn ien. Ilo am kwalok joij im “tiriamokake dron,” jemaroñ kamakit armij eo ñan roñjake ñe jenaj bar itok.—1 Pit. 3:8.
4 Ukõt Nan ko Am: Ri jilek Paul ear lo ilo jikin kwelok in Athens juõn lokatok kar aje “Ñõn Anij Eo Je Jaje Kake.” Men in ear jelet wãwen eo ear kwalok kin news eo emõn, bwe ear ba: “Inem Eo komij kabuñ im jaje kake, E in ij kwalok ñõn kom.” Jelã kõppelak eo an Paul ear kamakit jet ian ro rar bed ñan air roñjake ennan kin Ailiñ eo im erom ri tõmak ro.—Jerb. 17:23, 34.
5 Eindein, ilo ad reito-reitak ibelakid men in enaj jibañ kij kile ta eo armij eo ej itoklimo kake im ilo wãwen in emaroñ jejjet wãwen ad ukõt ennan eo ad. Kajerbal kajitõk ko me remaroñ rejañ ri mweo ñan kwalok lemnak eo an. Lemnak kin eon ko kwomaroñ kajerbali ñan kaitoklimoen. (Ken. 20:5) Ilo ad reito-reitak ibelakid im kwalok ad itoklimo eo emol kin ro jet men in enaj jibañ kij bwe en bolemen ad jaketo-jaketak news eo emõn.