Kwalok Am Kamolol
1 Meñe jej bed ilo “ien ko renana,” elõñ un ko unin ñan ad kamolol Jehovah. (2 Tim. 3:1) Men eo elaptata iair ej men in letok eo eaorõk kin Nejin ilo etad. (Jon 3:16) Bareinwõt, meñe ro rej bed ilo kabuñ waan rej kwuli ilo jitõb, kij jej lañliñ kin juõn buñ pelok in ekan ko lor jitõb. (Ais. 65:13) Jej mõttan juõn dolul in jimjãn jimjatin ibelakin lal im jej jerammõn bwe ewõr kunad ñan kajededlok kabuñ eo emol. (Ais. 2:3, 4; 60:4-10, 22) Ewi wãwen jemaroñ kwalok ad kamolol ñan Jehovah kin aolep jerammõn ko ear lutõk iod?—Kol. 3:15, 17.
2 Jerbal ilo Lañliñ im kin Juõn Buru Eyu: Ke ear bwebwenato kin lelok in men ko lor kanniek, ri jilek Paul ear je: “Anij ej yokwe eo e mõnõnõ in lelok.” (2 Kor. 9:7) Kakabilek in ej bareinwõt jerbal ñan jerbal eo ad ñan Anij. Kamolol ej alikar ilo kijejeto eo ad kin mol eo, lañliñ eo ad ilo kwelok ko an Christian, kijejeto eo ad ilo jerbal in kwalok nan, im mõnõnõ eo ad ñan kajejjet ankil an Anij.—Sam 107:21, 22; 119:14; 122:1; Rom. 12:8, 11.
3 Ilo Israel eo etto Kien eo ear jab kalikar joñan air lelok jet men in katok ko. Kajjojo ri kabuñ ear maroñ kwalok kamolol eo an ilo an lelok “einwõt an maroñ, ekar ñõn jerammõn an Jeova am Anij” ear lelok ñan e. (Dut. 16:16, 17) Eindein rainin, juõn buru eobrak kin kamolol enaj kamakit kij ñan kõmman joñan wõt ad maroñ ilo jerbal in kwalok kin Ailiñ eo im kõmman ri kalor ro. Alliñ ko ilo summer ekkã air letok ien ko remõn ñan ad kwalok ad kamolol. Jet rej kortokjen ien air kakije jen jikin jerbal eo ak jen school im an aetoklok ien ran ñan kalaplok ien air kajerbale ilo jerbal in kwalok nan, im ñan auxiliary pioneer bareinwõt. Kwomaroñ ke kalaplok jerbal in kwalok nan eo am ilo summer in?
4 Lutõklok kin Kamolol: Juõn wãwen eaorõk jej kwalok ad kamolol ñan Jehovah ej ikijen jar. (1 Tess. 5:17, 18) Nan eo an Anij ej rejañ kij ñan “ba kom mol im lõñlok kake.” (Kol. 2:7) Meñe jej lukkun boub ak bed iumin ijjibed ko, ien otemjej jej aikwij kobaik kamolol ilo jar ko ad ran otemjej. (Pil. 4:6) Aet, ikijen jerbal in kwalok nan im bareinwõt jar, jej kõmman bwe “ej ke bareinwõt ñõn elõñ kamolol Anij.”—2 Kor. 9:12.