“En Bareinwõt Laplok Buruemi”
1 Ilo dolul in jimjãn jimjatin an Christian, kij kajjojo ewõr eddo eo ibbed ñan kalaplok jitõb in mãnãn eo ilo congregation eo. (1 Pit. 1:22; 2:17) Jitõb in mãnãn rot in ej walok ñe jej kõmman bwe en ‘laplok buruõd’ ñan don. (2 Kor. 6:12, 13) Etke eaorõk bwe en emõn ad jelã kajjen ro jeid im jatid maan im kõrã?
2 Jimjera eo Ej Kajurlok: Ke ej emõnlok ad jelã kajjen ri tõmak ro mõttad, enaj laplok ad kaorõk tõmak, kijenmij, im kadkad ko jet kadkadiir. Likjap ko air renaj diklok aorõkiir ñan kij. Ñe ej emõn ad jelã kajjen don, enaj emõnlok ad bojak in kõketak im kainemõn don. (1 Tess. 5:11) Jemaroñ erom juõn “kein kakajur” ñan don ñan jumae kilan ko renana an lal eo an Satan. (Kol. 4:11, New World Translation) Ilo lemnak kin ran kein eliktata im rebin, elap ad kamolol bwe ewõr ro jeram remõn ibwiljin armij ro an Jehovah!—Ken. 18:24.
3 Ro jeram rebak remaroñ juõn unjen kakajur im kainemõn ejej uan ñe jej jelmaik melejoñ ko relap. (Ken. 17:17) Juõn Ri Christian kõrã eo ear tarinaik eñjake ko kin an ejelok tokjen ej kememej: “Ear wõr ro jera me rar ba men ko remõn kin ña ñan jibañ iõ anjo ion lemnak ko renana ekar wõr ibba.” Ro jerad rot in rej juõn jerammõn jen Jehovah.—Ken. 27:9.
4 Kwalok Am Itoklimo kin Ro Jet: Ewi wãwen jemaroñ kõmman bwe en laplok buruõd ñan ri tõmak ro mõttad? Ijellokin ad yokyokwe tok ro jet ilo kwelok ko an Christian, kõmman juõn jibadbad ejej uan ñan bwebwenato ibbeir. Ilo am jab kajinet kin men ko air make, kwalok am itoklimo kake ir. (Pil. 2:4; 1 Pit. 4:15) Bar juõn wãwen ñan kwalok am itoklimo kake ro jet ej ilo am kirtok ir ñan mõñã ibbam. (Luk 14:12-14) Ak kwomaroñ karõk ñan jerbal ibbeir ilo jerbal in kwalok nan. (Luk 10:1) Ke jej bõk buñten nee ko mokta bwe en emõnlok ad jelã kajjen ro jeid im jatid, jej kowõnmanlok burukuk ilo congregation eo.—Kol. 3:14.
5 Ekkã ke ad kãlet ro mõttad ian ro dettair wõt kij ak ro rej itoklimo kin ejja men ko wõt jej itoklimo kaki? Jen jab kõtlok bwe men kein ren kõmman joñan jimjera eo ad ilo congregation eo. David im Jonathan im bareinwõt Ruth im Naomi rar ejaake lukluk in jimjera ko rekajur meñe ear oktak dettair im iminene ko air. (Ruth 4:15; 1 Sam. 18:1) Kwomaroñ ke kalaplok jimjera eo am? Ilo am kõmmane men in emaroñ bõktok jerammõn ko kwar jab kõtmene kaki.
6 Ilo ad kõmman bwe en laplok buruõd kin ro jet, jej kõketak don im kowõnmanlok ainemõn ilo congregation eo. Bareinwõt, Jehovah make ej kajerammõn kij kin yokwe eo jej kwaloke ñan ro jeid im jatid. (Sam 41:1, 2; Hib. 6:10) Etke kwojjab kõmman bwe en mejenkajjik eo am ñan jelã kajjen elõñ brother im sister ro joñan wõt am maroñ?
[Kajjitõk ko]
1. Ta eddo eo ewõr ibben kajjojo?
2. Etke eaorõk ñan kaddeklok jimjera ibben ri tõmak ro mõttad?
3. Ewi wãwen ad maroñ juõn unjen kakajur ñan ro jet?
4. Ewi wãwen emaroñ emõnlok ad jelã kajjen ro jet ilo congregation eo?
5. Ta eo ej juõn wãwen ñan kalaplok jimjera ro ad?
6. Ta jet ian tokjen ko kin ad kõmman bwe en laplok buruõd ñan ro jeid im jatid?