Kõmman Bible Study ko Rej Wõnmanlok
Part 2: Kebojak ñan Kõmmane Katak eo
1 Bwe en bolemen am katakin ilo juõn Bible study ej kitibuj elaplok jen am baj bwebwenato wõt kin katak eo im lale eon ko. Jej aikwij kwalok melele eo ilo juõn wãwen me enaj jelet buruen ri katak eo. Men in ej aikwij am keboje katak eo ilo am lemnak kin ri katak ro kajjojo.—Ken. 15:28.
2 Ewi Wãwen Jemaroñ Kebojak: Jino ilo am jar ñan Jehovah kin armij eo im aikwij ko an. Kajitõk ibben Jehovah bwe en jibañ yuk ñan tõbar buruen ri katak eo. (Kol. 1:9, 10) Ñan melele unin tel eo ilo alikar, bõk ien ñan lemnak kin title in katak eo ak katak eo, unin tel ko redik, im jabdewõt pija ko. Kajitõkin yuk make, ‘Ta mejenkajjik eo elap ilo katak in?’ Men in enaj jibañ yuk ñan lemnak kin point ko relap ñe kwoj kõmmane katak eo.
3 Lukkun eliji katak eo jen paragraph ñan paragraph. Bukõt uak ko ñan kajitõk ko emwij jei, im kakõlleik wõt nan ko raorõk. Etale ewi wãwen eon ko ej wõr kõtair ñan point ko relap ilo paragraph eo, im kãlet eon ko kwonaj readi ilo ien katak eo. Emaroñ juõn men in jibañ ñan je kamelele ko rekadu kin eon ko itõrerein peij eo ilo book eo. Ri katak eo en kile ilo alikar bwe men eo ej katak kake ej jen Nan eo an Anij.—1 Tess. 2:13.
4 Kõmman bwe Katak eo En Jejjet ñan Aikwij ko an Armij eo: Jeltokin, etale katak eo ilo am lemnak kin aikwij ko an ri katak eo. Kajeoñ in lemnak lok iman kin kajitõk ko enaj kajitõk kaki im point ko me renaj bin an melele kaki im bõki. Kajitõkin yuk make: ‘Ta eo ej aikwij melele kake ak jerbale bwe en kõmman wõnmanlok ilo jitõb? Ewi wãwen I maroñ tõbar buruen?’ Inem kõmmane katak eo ekkar ñan wãwen kein. Jet ien, kwomaroñ lo aikwij eo ñan keboj juõn wanjoñok, juõn kamelele, ak juõn lelkan in kajitõk ko ñan jibañ ri katak eo ñan melele kin juõn point ak eon. (Nih. 8:8) Ak bõprae am kobaik melele ko jet me rejjab lukkun kalikarlok unin tel eo. Juõn elij ilo tu-kadu ilo jemlokin katak eo enaj jibañ e ñan kememej point ko relap.
5 Elap ad lañliñ ñe ro rekãl rej kwalok leen wãnik ñan nebar eo an Jehovah! (Pil. 1:11) Ñan jibañ ir tõbare mejenkajjik in, en emõn am kebojak kajjojo ien kwoj kõmman juõn Bible study.