Kõmman Bible Study ko Rej Wõnmanlok Part 7:
Jar ilo Ien Katak eo
1. (a) Etke ekkar ñan kabellok im kajemlok juõn Bible study kin jar? (b) Ewi wãwen jemaroñ bõkmantak kin jar ilo juõn Bible study?
1 Bwe ri katak Bible ro ren kõmman wõnmanlok ko ilo jitõb, kajerammõn eo an Jehovah elap an aorõk. (1 Kor. 3:6) Kin men in, ej juõn men ekkar bwe jen kabellok im kajemlok katak eo kin jar. Ekkã ad maroñ kõmmane men in jen jinoin ad katak ibben armij ro elap air tõmak ilo kabuñ. Ikijen ro jet, jemaroñ aikwij lale ien eo ekkar ñan jino jar ilo ien katak. Kwomaroñ kajerbal Sam 25:4, 5 im 1 Jon 5:14 ñan jibañ ri katak eo ñan melele kin etke eaorõk jar im kwomaroñ bareinwõt kajerbal Jon 15:16 ñan kamelele kin aorõkin ad jar ñan Jehovah ikijen Jesus Christ.
2. Elañe juõn brother emwij an baptais ak juõn leo ri kwalok eo ejañin baptais ej etal ibben juõn sister ñan juõn Bible study, wõn eo en jar?
2 Wõn eo en jar ilo juõn Bible study? Elañe juõn brother emwij an baptais ej etal ibben juõn sister ñan juõn Bible study, e eo en jar, meñe sister eo emaroñ kõmmane katak eo ilo an kalibubuik bõran. (1 Kor. 11:5, 10) Ijo tu-rãjet, elañe juõn emaan ri kwalok kin Ailiñ eo im ejañin baptais ej etal ibben juõn sister ñan juõn Bible study, lio en jar. Ilo ien rot in, lio en kalibubuik bõran ñe ej jar im kõmmane katak eo.
3. Ta ko ekkar air kobaiki ilo jar ko ilo juõn Bible study?
3 Ta eo Jar eo en Kitibuji: Jar ko ilo juõn Bible study ejjab aikwij aetok, ak ren jejjet. Ijellokin air bukõt kajerammõn eo an Anij ilo katak eo im lelok kamolol kin mol ko rar katak, ekkar bwe ren lelok nebar ñan Jehovah eo ej Unjen katak ko. (Ais. 54:13) Jemaroñ bareinwõt kobaik nan ko me rej kwalok itoklimo eo ad emol kin ri katak eo im kamolol eo ad kin dolul eo me Jehovah ej kajerbale. (1 Tes. 1:2, 3; 2:7, 8) Ilo ad kajitõk kin kajerammõn eo an Jehovah kin jibadbad ko an ri katak eo ñan jerbale ta eo ej katak kake emaroñ jibañ e ñan lo aorõkin an juõn ‘ri kõmanman nan eo.’—Jem. 1:22.
4. Ta tokjen ko rej walok ñe kwoj kabellok im kajemlok Bible study eo kin jar?
4 Elõñ tokjen jar ko. Ej bõktok kajerammõn eo an Anij. (Luk 11:13) Ej kalikar kin aorõkin katak Nan eo an Anij. Ke ri katak eo ej roñjake jar ko ad, ej katak kilen jar. (Luk 6:40) Bareinwõt, jar ko me rej walok jen juõn buru eobrak kin yokwe ñan Anij im kamolol kin kadkad ko remõn kadkadin remaroñ jibañ ri katak eo ñan kaddeklok juõn kõtan ebak ibben Jehovah.
[Kajjitõk ko ñan Katak]