Kõmanman Emõn im Lelok ñan Ro Jet
1 Dorcas “eobrõk kin jerbal ko remõn im mweien tiriamo ko.” (Jerbal 9:36, 39) Jitõb in joij eo an ear kõmman bwe armij ro rar jelã kajjen im Jehovah Anij ren jimor yokwe e. Dri Hibru 13:16 ej ba: “A komin jab meloklok kin kõmõnmõn emõn im lelok ñõn ro jet, bwe kin men in katok ko eirwõt Anij ej buñburuen.” Ewi wãwen jemaroñ kõmanman emõn im lelok ñan ro jet rainin?
2 Juõn wãwen ro jet remaroñ bõk tokjen jen kij ej ikijen ad lelok ‘mweied.’ (Ken. 3:9) Jabawõt ko ad ñan jerbal eo ibelakin lal ej kõmman bwe ren maroñ kalek Kingdom Hall ko, Assembly Hall ko, im ra ko ibelakin lal. Joij eo ad ear kõmman bwe elõñ million armij ro ren maroñ bõk tokjen jen nan in katak ko jen Anij im kamao ko ilo jitõb rekõketak.
3 Lelok Kainemõn: Ñe ewalok juõn jorrãn, armij ro an Jehovah rebojak in “jerbale emõn” ñan ri tõmak ro mõttair im bareinwõt ñan ro rejjab bed ilo nukin tõmak. (Gal. 6:10) Elikin juõn chemical plant (jikin kõmman uno) ilo France ear bõkkolok, ruo ri belele ro me rar jokwe iturin jikin eo ear ba: “Christian ro jeim im jatim rar mõkaj im itok ñan jibañ karreoik apartment eo am im ko an ro jet bareinwõt. Ro ri turim rar lukkun bwilõñ in lo elõñ armij rar itok ñan jibañ.” Bar juõn sister ear kobaik: “Elder ro rar itok ñan jibañ kim. Rar itok ñan kõketak kim. Ilo mol, eñin men eo kim ar aikwiji, elaplok jen jibañ ko kin mweiuk.”
4 Meñe elõñ wãwen ko jemaroñ kõmanman emõn ñan ro ri turid, wãwen eo emõntata jemaroñ jibañ ir ej ikijen ad kwalok jelãlokjen eo eaorõk kin mol eo, eo ekoba “kejatrikrik kin mour in drio” me Jehovah make ear kallimur kake. (Taitõs 1:1, 2) Ennan eo ilo Bible ej bõktok kainemõn eo emol ñan ro rej buromõj kin wãwen ko ilo lal in im kin jab wãppen eo air make. (Mat. 5:4) Jen kõmanman emõn im lelok ñan ro jet ñe ej ilo maroñ in peiõm bwe kwon kõmmane.—Ken. 3:27.