Kwon Kwalok kin Nan in Anij Ilo Beran
1 Einwõt Christian ri karejar ro, jej jelã bwe ejjab aolep renaj mõnõnõ in roñjake ñe jej kwalok nan. (Mat. 10:14) Bõtab, jejjab kõtlok an jet jab mõnõnõ in roñjake en kabõjrak kij jen ad kwalok kin news eo emõn. (Ken. 29:25) Ta eo ej jibañ kij bwe jen kwalok wõt kin Nan in Anij ilo beran?
2 Ri jilek Paul ear melele kin aorõkin “an kanuij emõn [an] jela Kraist Jisõs.” Men in ear kamakit e ñan an kwalok nan kin “tõmak ekajur.” (Pil. 3:8; 1 Tes. 1:5, New World Translation) Meñe jet rar watõk ennan eo ear kwalok kake bwe emõjno im ejettokjen, ear jelã bwe “ej kajur an Anij ñõn lomor iben ro otemjej rej tõmak.” (Rom 1:16) Kin men in, meñe ear jelmae jumae, ear wõnmanlok wõt im “beran im konono ilo Iroij.”—Jerbal 14:1-7; 20:18-21, 24.
3 Unjen Kajur eo Ad: Ear jab ikijen kajur eo an make Paul ear maroñ beran im kwalok nan. Ilo an konono kin e make im Silas, Paul ear je: “Ke emwij kaiñtan im kokkure kim i Pilippai, . . . kim ar beranlok ilo am Anij bwe kimin konono ñõn kom gospel an Anij ilo niknik elap.” (1 Tess. 2:2; Jerbal 16:12, 37) Bareinwõt, ke ear bed ilo kalbuj ilo Rome, Paul ear kajitõk bwe ro jet ren jar kin e bwe en maroñ wõnmanlok im kwalok kin news eo emõn bwe en ‘beran in konono kake.’ (Ep. 6:18-20) Ilo an atartar ion Jehovah im jab e make, Paul ear maroñ konono kin nan eo an Anij ilo beran.—2 Kor. 4:7; Pil. 4:13.
4 Ejja wãwen dein rainin. Juõn brother eo ear bin an kwalok kajjen make einwõt juõn ian Ri Kennan ro an Jehovah ilo jikin jerbal eo an im ñan kwalok nan ilo jabdewõt ien emõn tok ear jar kin men in im ear jino an kwalok nan. Juõn ri jerbal mõttan ear jab mõnõnõ in roñjake ilo jinoin, ak ke ear roñ kin kejatdikdik eo kin jerkakbiji, men in ear tellok ñan juõn Bible study. Jen ien in manlok, brother eo ear kortokjen jabdewõt ien emõntok ñan an kwalok nan. Ilo jikin jerbal eo an tokelik, iumin 14 yiõ ko ear jibañ 34 armij ro ñan air baptais. Jemaroñ liki bwe Jehovah enaj bareinwõt kakajur kij ‘ñan kwalok wõt kin nan eo an kin elap beran.’—Jerbal 4:29.