Ta eo Jerbal in Kwalok Nan eo Ad Ej Kõtõbrake
1 Nan in Anij ej kwalok kin Ri Christian ro einwõt ñe rej maaj ilo anjo ilo jerbal eo an Jehovah. (2 Kor. 2:14-16) Ñe jej kwalok kin jelãlokjen eo an Anij, jerbal eo ad ej einwõt men in kaijurjur emõn ñan Jehovah. Jet armij rej reel kin news eo emõn; ro jet rej karmijeteiki. Meñe enañin aolep armij rejjab kõnan roñjake ejjab melelen bwe ejelok tõbrak ilo jerbal eo ad. Lemnak kin ta eo jerbal in kwalok nan eo ad ej kõtõbrake.
2 Kaibujuij Jehovah: Satan ej ba bwe armij rej karejar ñan Jehovah kin un ko ewõr kibbon ie. (Job 1:9-11) Jerbal in kwalok nan ej letok ñan kij juõn ien emõn ñan kamol ad tiljek ñan Anij. Elõñ ri kwalok ro rej wõnmanlok im bokake kien eo ñan kwalok nan im kõmman ri kalor ro meñe rej iion wãwen ko rebin ak armij rejjab kwalok air itoklimo. Kijenmij rot in ej kamõnõnõik buruen Jehovah!—Ken. 27:11.
3 Bareinwõt, jerbal in kwalok nan eo ad eaorõk ñan kajejjet kitien karõk eo an Anij. Ikijen kajeebeplok lal eo an Satan, Jehovah ej ba: “Ri ailiñ ko rej aikwij jelã bwe ña Jehovah.” (Ezek. 39:7) Ñan an ri ailiñ ko maroñ jelã kin men in, eaorõk bwe ri karejar ro an Anij ren kwalok kin etan im karõk ko an “ñõn ailiñ im bwij im konono im driloabjen otemjelok.”—Rev. 14:6, 7.
4 Bedbed in Ekajet: Jerbal in kwalok kin news eo emõn ej bareinwõt jerbal einwõt juõn bedbed in ekajete armij. Ri jilek Paul ear ba bwe Christ Jesus enaj bõktok idenwõne nae “ro rejaje Anij kab ro rejjab bokake Nan eo Emmõn kin ad Iroij Jesus.” (2 Tes. 1:8, 9) Armij renaj bõk ekajet ekkar ñan wãwen air uak ñan news eo emõn. Men in ej likit juõn eddo elap me ro ri karejaran Anij rej aikwij ineke! Elañe jejjab kõnan bwe en wõr ruõd kin mour eo an armij, jej aikwij kwalok kin ennan eo an Ailiñ eo.—Jerb. 20:26, 27.
5 Jibadbad ko ad ñan jibañ ro ri turid ñan bõk buñburu eo an Anij ej juõn wãwen Jehovah ej kwalok tiriamokake eo an. (1 Tim. 2:3, 4) Kinke wãwen mour ko an armij rej oktak aolep ien, ejjab bõjrak ad kebak im rejañ ir ñan bukõt Jehovah ke ej wõr wõt ien. Ilo ad kõmmane menin, jej kwalok “tiriamo an ar Anij,” eo ejjab “kõnan bwe jabrewõt en joko, a bwe ren otemjej itok im ukwelok ibeir.”—Luk 1:78; 2 Pit. 3:9.
6 Bõk Tokjen Ko Remõn ilo Ad Mour: Ñe jej boub ilo jerbal eo an Jehovah, ej juõn men in kejbãrok kij. Ej jibañ kij ñan kõtmene kin “an ran in [Jehovah] itok” im ñan kejbãrok bwe jukjuk im bed in en jab katton kij. (2 Pit. 3:11-14; Tait. 2:11, 12) Kin men in, “en rim buruemi, im kibria, im en eor tokjemi ien otemjej ilo jerbal an Iroij,” ilo ad jelã bwe jibadbad ko ad ilo jerbal in kwalok nan ejjab jettokjen.—1 Kor. 15:58.
[Kajjitõk ko]
1. Ewi wãwen an Jehovah watõk jerbal in kwalok nan eo ad, im ta uak eo an armij ro?
2. Ta eo jerbal in kwalok nan eo ad ej kamaroñ kij ñan kwaloke?
3. Etke eaorõk bwe jen wõnmanlok im kwalok kin etan Anij im karõk ko an?
4. Ewi wãwen jerbal in kwalok nan ej jerbal einwõt juõn bedbed in ekajet?
5. Ewi wãwen jerbal in kwalok nan eo ad ej kwalok tiriamokake eo an Anij?
6. Ilo ad boub ilo jerbal eo an Jehovah, ewi wãwen an wõr tokjen ñan kij?