Katakin Ro Ettã Burueir ñan Air Etetal ilo Ial eo an Anij
1. Kõmman ri kalor ro ej kitibuj ta?
1 Ri kalor ro an Christ ilo ebeben eo kein kajuõn rar mõttan “Ial eo.” (Jerb. 9:2) Mour in Christian eo emol ej kitibuj aolepen wãwen mour an juõn armij. (Ken. 3:5, 6) Kin men in, ñe jej kõmman katak ko kin Bible, elaplok ad aikwij kõmmane jen baj lelok wõt jelãlokjen eo ejimwe kin katak ko ilo Bible. Jej aikwij bareinwõt jibañ ri katak Bible ro ñan air etetal ilo ial eo an Jehovah.—Sam. 25:8, 9.
2. Ta eo emaroñ kamakit juõn ri katak Bible ñan an bokake kien ko an Anij?
2 Jibañ Ri Katak Ro ñan Kaddeklok Air Yokwe Jehovah im Jesus: Emol bwe ebin an armij ro rejjab wãppen ñan kõmman bwe lemnak ko air, konono, im mwiliir ren burukuk ibben ankil an Anij! (Rom. 7:21-23; Ep. 4:22-24) Bõtab, yokwe eo air kin Anij im Nejin ej kamakit ro ettã burueir ñan air kõmman men in ebin. (Jon 14:15; 1 Jon 5:3) Ewi wãwen jemaroñ jibañ ri katak Bible ro ad ñan air kaddeklok yokwe in?
3. Ewi wãwen jemaroñ jibañ ri katak ro ñan kaddeklok air yokwe Jehovah im Jesus?
3 Jibañ ri katak eo ñan an jelã kin kadkad ko kadkadin Jehovah. Juõn brother ear kamelele, “Armij rejjab maroñ yokwe juõn armij rejaje kajjiir, inem jen jinoin aõ katak ibbeir, ij kajerbal Bible eo ñan katakin ir kin etan Anij, im ij bukõt ien ko remõn ñan kalikar kadkad ko kadkadin Jehovah.” Kalikar kin joñok eo an Jesus ej juõn wãwen emõn ñan kõmmane men in. (Jon 1:14; 14:9) Bareinwõt, kwon kortokjen box in elij eo ilo tujemlokin kajjojo katak ilo book in Jelãlokjen ñan jibañ ri katak eo ñan an kalmenlokjen kin kadkad ko raibujuij kadkadin Anij im Nejin.
4. (a) Etke elõñ ri katak ro rej lo bwe jerbal in kwalok nan ej juõn jerbal ebin kõmmane? (b) Ewi wãwen jemaroñ jibañ ri katak ro ad ñan air jino bõk kunair ilo jerbal in kwalok nan?
4 Katakin Ri Katak Ro Ikijen Joñok eo Am: Einwõt ri katakin im ri tel ro, jej kwalok ñan ro jet kin ta melelen ñan etetal ilo ial eo an Anij ikijen kõmman ko ad. (1 Kor. 11:1) Ñan wanjoñok, enañin aolep ri katak Bible ro rejjab iminene in kebak ruwamaejet ro ñan kwalok kin tõmak ko air. Kin men in, jej aikwij kwalok meanwõd im kabel ñan jibañ ir kaddeklok yokwe, tõmak, im beran eo rej aikwiji ñan bõk kunair ilo jerbal in kwalok nan im kõmman ri kalor ro. (2 Kor. 4:13; 1 Tes. 2:2) Kõnan eo ad ñan tel ri katak ro ad enaj kamakit kij ñan etal ibbeir ñe rej jino bõk kunair ilo jerbal in kwalok nan.
5. Ewi wãwen juõn joñok emõn emaroñ jibañ ri katak ro ñan air lo ta eo ekoba ilo air bokake kien ko an Anij?
5 Joñok eo am emaroñ katakin ri katak ro kin wãwen ko jet raorõk kin mour in Christian. Ñe kwoj lolok ro renañinmij ak kwalok yokyokwe eo emãnãn ñan ro jet ilo kwelok ko an congregation eo, rej lo wãwen air aikwij kwalok yokwe. (Jon 15:12) Ñe kwoj bõk kunam ñan karreo Kingdom Hall eo ak kõmman men ko ñan jibañ ro jet, kwoj katakin ir kilen karejar ñan ro jet. (Jon 13:12-15) Ñe rej lo bwe elamwan wãwen mour eo am, rej kile ta melelen ñan ‘bukõt mokta Ailiñ eo.’—Mat. 6:33.
6. Ta eo ej walok ñe kwoj jibañ ro ettã burueir ñan air karejar ñan Jehovah?
6 Elap am aikwij kate yuk ilo jerbal in katakin ro jet jen Nan in Anij im ñan kõmman ri kalor ro. Ak kwonaj lukkun lañliñ ñe kwoj lo ro ettã burueir rej “etetal ilo mol.”—3 Jon 4.