Kwalok Am Itoklimo—Ikijen Am Kwalok Nan Ilo Ejelok Kalijeklok
1 Ilo juõn vision, ri jilek Jon ear lo juõn enjel ej ekãke ilo mejatoto ñan kwalok kin gospel eo ej ñan indio “ñõn ailiñ im bwij im konono im driloabjen otemjelok.” (Rev. 14:6) Jej lor ke wanjoñok eo an enjel in ilo ad kwalok nan ilo ejelok kalijeklok? Meñe jejjab lukkun kile, jemaroñ bok lemnak ko rej kwalok kalijeklok. Ad lemnak kin armij ro jej iion ir emaroñ jelet wãwen ad kwalok nan kin news eo emõn ñan ir. Kin men in, jej aikwij kwalok ad itoklimo im yokwe ñe jej kwalok nan ñan armij ro rar itok jen ailiñ ko jet ak eoktak kiliir.
2 Etale Territory Eo Am: Ewõr ke ri ailiñ ko ak ro me rar emmakit jen ijoko jikiir im rej jokwe ilo territory eo am? Emaroñ bidodo ad jab lolok ir. Jen bõk eddo eo ñan bukõt armij rein, im kajeoñ in jelã kajjiir. Ta aikwij ko im inebata ko air, men ko rekõnan im jab kõnan, mijak ko im kalijeklok ko? Kate yuk ñan ukõt wãwen am kwalok kin news eo emõn kin Ailiñ eo bwe en ekkar. (1 Kor. 9:19-23) Einwõt ri jilek Paul, en wõr ad eñjake kin aikwij eo ñan kwalok kin news eo emõn ibben armij otemjej ilo territory eo ad, koba ro me rej itok jen bar juõn kabijuknen, ro me eoktak air manit, ro me rej konono kajin ko jet, im ro me remweie.—Rom. 1:14.
3 Ak, ewi wãwen kwomaroñ kwalok nan ñan juõn armij ej konono bar juõn kajin? Kõmman juõn ien emõn ñan kajerbal booklet in Good News for People of All Nations (News eo Emõn ñan Armij ro Jen Ailiñ Ko Otemjej). Kwomaroñ bareinwõt bõk jet tract ko ak brochure ko ilo kajin ko ekkã air konono kaki ilo territory eo am. (Lale ilo July 2003 Ad Jerbal Ñan Ailiñ Eo, p. 4, par. 2-3) Bareinwõt, jet ri kwalok ro rar kate ir ñan katak jet nan in yokyokwe im jet ennan ko rebidodo ilo kajin ko jet. Ekkã an armij ro bwilõñ im mõnõnõ kin air roñjake an juõn kajeoñ in konono ñan ir ilo kajin eo air make, meñe jidik wõt air jelã, im men in emaroñ kareel ir ñan news eo emõn.
4 Kajeoñe Jehovah: Ikijen ad jibadõk armij ro eoktak manit ko air jen don, jej kajeoñe Anij eo ad me ejelok kalijeklok ibben, Jehovah, “Eo e kõnan lomoren armij otemjej, im bwe ren item jela mol.”—1 Tim. 2:3, 4.