MOURIN KŨRJIN
Bõk Kun̦aam im Jerbal ilo Teretore ko Elõñ Kain Kajin ko Ie
Ekkã an l̦apl̦o̦k an armej ro kõn̦aan roñjake nuuj eo em̦m̦an ilo kajin eo aer make. Bõlen eñin unin ilo Pentekost 33 C.E., Jeova ear karõk bwe ri-Ju ro “jañ aelõñ otemjej” ren roñ kõn nuuj eo em̦m̦an ilo ‘kajin eo aer make’ meñe aolepeer rar maroñ kõnono ilo kajin Grik ak Hibru. (Jrb 2:5, 6, UBS) Rainin, ewõr jikin ko me elõñ armej ro rej kõnono elõñ kajin ko. Kõn men in elõñ eklejia ko me eoktak kajin im iien kweilo̦k ko aer jãn doon ak rej jerbal ilo juon wõt teretore. Innem ewi wãween an ri-kwal̦o̦k naan ro ilo eklejia kein jerbal ippãn doon bwe en lõt aer jerbale teretore eo, im kõjparok bwe en jab juon wõt iien aer jerbale ejja jikin eo wõt im kõm̦m̦an an armej ro ie inepata?
Pepe (JK 15:22): Em̦m̦aan ro ilo kajjojo eklejia me rej loloorjake jerbalin kwal̦o̦k naan remaroñ pepe ippãn doon im kõm̦m̦an juon karõk kõn wãween an eklejia ko maroñ kwal̦o̦k naan ilo teretore ko. El̦aññe ejabwe teretore ko an eklejia eo ej kõnono kajin eo an armej ro ilo m̦õko jej bar kwal̦o̦k naan ie, em̦m̦an jen likũti wõt ñan er. Ijoke, el̦aññe rejjab maroñ jerbale aolepen teretore ko aer aolep iien kõn aer jeplõklõk jãn doon, remaroñ kõn̦aan bwe kwõn kwal̦o̦k naan ñan armej ro rej kõnono kajin eo aer, ak ñe ewõr rej kwal̦o̦k aer itoklimo kwõmaroñ kõjjel̦ãik er. (od-E 93 pãr. 37) Ak remaroñ kajjitõk jipañ jãn eklejia eo am̦ ñan pukot armej ro rej kõnono ilo kajin eo aer im jikin ko rej jokwe ie. (km 7/12 5, bo̦o̦k) Keememej bwe jet iien armej ro ilo m̦õko remaroñ kõnono elõñl̦o̦k jãn juon kajin. Ak el̦aññe aelõñ eo am̦ ej kamo an juon doulul, peejnej, ak ej kakien ñan jab kajeeded mel̦el̦e ko kõn ro jet, ãinwõt kõn aelõñ eo rej itok jãne, kabuñ eo aer, im men ko ãierl̦o̦kwõt, jej aikuj l̦oore kakien eo.
Ippãn doon (Ep 4:16, UBS): Em̦m̦an kwõn l̦oor karõk ko jãn em̦m̦aan eo jeid im jatid me ej loloorjake jerbalin kwal̦o̦k naan. Kwõj ke katak Baibõl̦ ippãn juon eo ej kõnono ilo juon bar kajin me eoktak jãn kajin eo ilo eklejia eo am̦? Emaroñ m̦õkaj an ri-katak eo kõm̦m̦an wõnm̦aanl̦o̦k ñe juon jãn eklejia ko repaak ak kumi me ej kõnono ilo kajin eo an ej katak ippãn.
Pojakl̦o̦k im̦aan (JK 15:28 UBS; 16:1, UBS): Ñe armej eo kwõj kwal̦o̦k naan ñane ej kõnono bar juon kajin, kate eok joñan wõt am̦ maroñ ñan kwal̦o̦k kõn nuuj eo em̦m̦an ñane. Kwõmaroñ pojakl̦o̦k im̦aan ilo am̦ taunl̦outi Baibõl̦ eo im pija ko ilo kajin ko an armej ro ilo teretore eo am̦. Kwõmaroñ bareinwõt kõjerbale JW Language app eo bwe kwõn katak ñan yokyokwe armej ro ilo kajin ko aer.