Wõnmanlok Im “Jebar Elõñ Leen”
1 Ilo nan in kõkkar, Jesus ear keidi e make einwõt vain eo emol, im jemen einwõt Ri Kallip eo, im ri kabit ro an einwõt ra ko in vain eo me rej jebar elõñ leen. Ilo an kamelele ilo kõkkar kin jerbal eo an Ri Kallip, Jesus ear kameleleik kin aorõkin air lukkun eddeblok ñan vine eo. (Jon 15:1-4) Katak eo jej bõke ej bwe aolep ro ewõr ibbeir juõn kõtan ebak ibben Jehovah, ren aikwij jebar leen einlok wot ra in “vain emol,” Jesus Christ. Jej aikwij kate kij ñan wõnmanlok im lukkun jebar “leen Jitõb” eo im leen Ailiñ eo jimor.—Gal. 5:22, 23; Mat. 24:14; 28:19, 20.
2 Leen Jitõb eo: Jemaroñ joñe ad rittolok ilo jitõb kin ewi joñan an lap ad kwalok leen jitõb eo ilo ad mour. Kwoj kate yuk ke ñan kaddek leen jitõb eo an Anij ikijen am keini in katak ibbam make im bõk ien ñan kalmenlokjen kin Nan in Anij? (Pil. 1:9-11) Kwon jab ãliklik ilo am jar ñan bõk jitõb kwojarjar. Enaj jibañ yuk ñan ejaak kadkad ko me rej kaibujuij Jehovah im remaroñ jibañ yuk ñan wõnmanlok ilo jitõb.—Luk 11:13; Jon 13:35.
3 Ilo ad ejaak leen jitõb eo enaj jibañ kij ñan kalaplok ad kijejeto einwõt ri kwalok ro. Ñan wanjoñok, kadkad in yokwe im tõmak renaj kamakit kij ñan kalaplok ien ilo schedule eo ad make meñe jej boub, ñan ekkeini ad bõk kunad ilo jerbal in kwalok nan. Kadkad ko einwõt ainemõn, meanwõd, joij, inemõn, im jatõr rej jibañ kij ñan jelã kilen emmakit ilo juõn wãwen ekkar ñan ri jumae ro. Kadkad in lañliñ ej kamaroñ kij ñan lo juburu ilo jerbal in kwalok nan, bareinwõt ilo ien eo armij ro rejjab itoklimo.
4 Leen Ailiñ Eo: Bareinwõt jekõnan jebar leen Ailiñ eo. Men in ekoba ad “wijtak ien otemjej, eñin leen tier ko rej kwalok ñõn [Jehovah] etan.” (Hib. 13:15) Jej kõmmane men in ikijen ad kijejeto im kijenmij ilo jerbal in keañ kin news eo emõn. Kwoj kate yuk ke ñan jebar elõñ leen Ailiñ eo ikijen am kõmanmanlok wãwen kilen jerbal in kwalok nan eo am make?
5 Jesus ear kwalok bwe joñan leen Ailiñ eo ri kalor ro an retiljek renaj jebare renaj oktak jen don. (Mat. 13:23) Inem, jen jab keidi kij make ñan ro jet ak aolep ien jen lelok ñan Jehovah aolepen ad. (Gal. 6:4) Juõn etale emol ibbed make kin bed eo ad ekkar ñan Nan eo an Anij, enaj jibañ kij wõnmanlok im kaibujuij Jehovah ilo ad “jebar elõñ leen.”—Jon 15:8.