Katak Baibel Iben Baamle eo Elukkun Aurõk!
1. Ta eo Governing Body eo elap air kõnan kõmõne ñõn kij ilo ran kein, im etke?
1 Einwõt ilo ebeben eo kein kajuõn, Governing Body eo elap air kõnan kabwe aolep aikwij ko an armij ro an Jeova ilo men ko lor jitõb. (Jerb. 15:6, 28) Einwõt an ebaktok iñtan elap, ekanuij aurõk bwe aolep dri kwalok ro kin Ailiñ eo en or air jimjera ebin iben Jeova. Ien ko kwar ber ilo Buk Study eo mokta, ewi wãwen kwonaj kajerbali kiõ? Aolep rej bõk rejañ ñõn kajerbal ien in ilo jota ñõn katak Baibel einwõt juõn baamle im kabuñ ñõn Anij. Ar kajerbale ien in ilo meletlet, enaj kõmõn an let ar katak kin Nan in Anij im jenaj bõk tokjen jen katak ko ie.—Sam 1:1-3; Rom. 11:33, 34.
2. Ewi wãwen jemaroñ karõk iben baamle eo ar ñõn kabuñ ikijen ar katak Baibel iben dron ilo jota?
2 Katak Iben Baamle Eo In Jota: Bõran baamle eo eor an erro iman mejen Jeova ñõn lale bwe en kõmõn katak iben baamle eo an. (Dut. 6:6, 7) Lõmaro im limaro jeer im jãter me ejelok rejetair im ejelok air erro kin baamle, remaroñ kajerbal ien in ñõn katak ibeir mõke im kõmõn etale ko remũlallok ñe rej katak. Eaurõk ñõn kij aolep bwe jen “wiaik ien” ñõn katak im kalomõnlokjen bwe jen maroñ kakajur mour in jitõb eo ar meñe jej ber ilo ‘ran kein renana.’—Ep. 5:15, 16.
3, 4. Ta nan in rejañ eo kin kein jerbal ko jemaroñ kajerbali ñõn katak, im etke jej kõmõne men in?
3 Ta Eo Jemaroñ Katak Kake: Lajrõk in buk ko jet an rolul in (Watch Tower Publications Index) ak Laibrãre eo ilo computer remaroñ jibõñ yuk lo melele ko me remaroñ kõmõn bwe katak eo an baamle eo en kaitoktoklimo. Baamle ko remaroñ bareinwõt etale katak ko ilo Imõniaroñroñ ko einwõt “Key ko ñõn Kamõnõnõik juõn Baamle,” “Katakin Ajiri Ro Nejõm,” im “Ñõn Jodrikdrik Ro Nejid.”
4 Ro uan baamle eo renaj kememej wõt nan in kaiñi ko im jerbali ilo mour ko air ñe rejjab ekaiuriur ilo air riiti Baibel eo iben dron. (Hib. 4:12) Ilo ien ko jet, kwomaroñ aluiji pija ko jen rolul eo an Jeova im bwebwenato iben dron kaki. Kwon ilo kabel, kãlet ta katak eo kwonaj katak kake iben baamle eo ak kwomaroñ kajitõk iben baamle eo am ta katak eo rekõnan katak kake.
5. Etke katak Baibel iber mõke im iben baamle eo elukkun aurõk ñõn mour ko ar ranin?
5 Etke Eaurõk Kiõ: Kakajur kõtan eo ar iben Anij enaj keboj kij ñõn “tõt wõt, im lo lomor an Jeova.” (Ex. 14:13) Ro jemen im jinen rej aikwij nan in tel jen Jeova ñõn air kakajiriri ajiri ro nejiir ilo ‘ebeben in e ankeke im bõt.’ (Pil. 2:15) Jodrikdrik ro rej aikwij jibõñ ñõn air anjo ion mõnit ko rebwir ilo jikuul ko ranin. (Ken. 22:3, 6) Dri belele ro ren kate ir ñõn kabin kõtan eo air iben Jeova einwõt juõn “ekwoljil” ikijen mour in mare eo air. (Ekk. 4:12) Jen aolep kiõ kajerbal ien in ilo meletlet ñõn kakajur ar “tõmak ekwojarjar”!—Jud 20.