Ekijkan Air Naj Roñ?
1. Etke jerbal in kwalok nan emaroñ bin, im etke jejjab ebwer?
1 Ke ran eo an Jeova emõkõj an itok, eor juõn aikwij elap bwe jen jibõñ elõñ ñõn air bõk jelalokjen eo emol kin Anij im karõk ko an kin armij. (Jon 17:3; 2 Pit. 3:9, 10) Jet ien emaroñ juõn men ebin, ke elõñ ejelok air kea ak remaroñ kajirere kake kij kin ar kwalok nan. (2 Pit. 3:3, 4) Mekarta, jej tõmak bwe ilo territory eo ar, eor wõt ro im renaj mõnõnõ in bõk ennan eo emõn ñe rej roñ. Ekijkan air naj roñ ñe ejelok dri kwalok?—Rom. 10:14, 15.
2. Ewi wãwen joñok eo an dri jilik Paul ej rejañ kij?
2 Wõnmaik Jumae: Jen jab ebwer ñõn jibõñ ro im rej mõnõnõ in eoroñ ennan kin Ailiñ eo. Pilippai kar jikin kwelok eo moktata im armij ro ie rar eoroñ dri jilik Paul ke ear kwalok kin nan eo emõn. Ak ro ie rar riõp im naruõn e kab Sailas im rar dreñlok irro jimor kin alal ko im jolok ir na iloan prisõn. (Jerb. 16:16-24) Ijoke, jorran in im ekõmetak ear jab kabwer Paul ñõn an jenliklik kin mijõk. Ke ear lolok jikin kwelok eo juõn ilo Tessalonika, ear ‘beranlok ilo an Anij.’ (1 Tes. 2:2) Joñok in an Paul ejjab kalikar ke unin bwe jen ‘jab ebbwer’?—Gal. 6:9, UBS.
3. Ta men ko remaroñ kamakit jet bwe ren oktõk, meñe ilo jinoin rar jab mõnõnõ in eoroñ ennan?
3 Elõñ ian ro rar jab mõnõnõ in eoroñ ennan iomin elõñ yiõ ko rar ukot lemnok ko air. Abañ ko kin mõnni, nañinmij, mij ilo baamle, ak kõjelã ko an lõl im elap air kainebataik armij, men kein remaroñ kamõkit juõn bwe en oktõk. (1 Kor. 7:31) Meñe jemeir im jineir rar jumae mol eo, kiõ, jet ilo air ridtolok, rej mõnõnõ in eoroñ ennan. Ar wõnmanlok wõt im kwalok nan ej lelok maroñ bwe rein ren ‘kir etan Jeova’ mokta jen an itok jemlokõn.—Rom. 10:13.
4. Ta eo ej kamakit kij bwe jen “wõnmanlok wõt” ilo jerbal in kwalok nan?
4 “Wõnmanlok Wõt”: Ar yokwe Anij im ro dri turid enaj kamakit kij bwe jen “wõnmanlok wõt” ilo ar jerbal in kwalok im kõmõn dri kalor, einwõt dri jilik ro ilo ebeben eo jinoin. (Jerb. 5:42) Elõñ ro ranin ‘re inebata im buk buruer’ kin men ko rej lo kiõ. (Ezek. 9:4) Joñõn an emõn kejatrikrik im ainemõn eo emol ewalok ñõn rein ñe rej eoroñ ennan kin gospel eo! Meñe enañin aolep armij renaj makoko in eoroñ ennan, emwij an Jeje ko kalikar bwe e buñburuen Jeova kin jerbal ko ar.—Hib. 13:15, 16.