Kwo Pojõk ke ñõn Jikuul?
1. Ebellok ien ko remõn ñõn ta ilo ami jino jikuul?
1 Meñe kwoj kab naj jino jikuul ak emwij am jino, kom jodrikdrik ro ian Dri Kristian ro, komij jelmaik abañ ko im ijjibed ko rekãl. Ak ebar bellok ñõn kwe ien ko rekãl ñõn am “kennan kin mol eo.” (Jon 18:37, UBS) Emõn ke am pojõk ñõn bõk kwonam in kennan?
2. Ilo wãwen it ko kwo pojõk ñõn jikuul?
2 Ñõn jibõñ yuk lo jerammõn ilo men otemjej ilo mour eo am, kwar bõk elõñ katak ko jen Jeova, jen jemõm im jinõm, im jen dri korijer eo e tiljek im meletlet. (Ken. 1:8; 6:20; 23:23-25; Ep. 6:1-4; 2 Tim. 3:16, 17) Kin menin, kwojela ta abañ ko rej ber imam ilo am jikuul. Inem kajerbal katak ko kwar bõki kin Anij im melele eo am ilo jikuul eo bwe kwon pojõk in kwalok nan. (Ken. 22:3) Lukkun etale katak ko im nan in kakabilek ko jen Jeje ko ilo buk ko ruõ Jodrikdrik ro Rej Kajitõk (ejelok ilo kajin Majõl) im bar katak ko eierwõt im ilo Ruj! (ejelok ilo kajin Majõl)
3. Ta wãwen ko renaj bellok ñõn kennan kin tõmak eo am?
3 Jikin jikuul eo am enaj kebellok ien am kennan ilo elõñ wãwen ko. Ñe ro jet rej lo wãwen am karbõp, mwilõm im wãwen am kennan, am koutiej dri jikuul ro mõtõm im dri kaki ro am, im bareinwõt grade ko am, im rej kile bwe elukkun emõn wãwen mour eo am, jet remaroñ kajitõk, “Etke elap am oktõk?” (Mal. 3:18; Jon 15:19) Emaroñ bellok juõn ien emõn ñõn am kennan im kemelele kin tõmak eo am. (1 Tim. 2:9, 10) Iloan yiõ eo, kwomaroñ ion abañ ko kin jekjek ñõn flag ak al kin ailiñ eo im ran in kwojkwoj ko an lõl. Elañe rej kajitõk kin etke kwojjab bõk kwonam, kwon ba ke, “Ej nae kabuñ eo aõ, Ij juõn ian Dri Kennan ro an Jeova,” ak kwon ke kajerbal ien in ñõn kennan kin Jeova, Jemõm eo ej yokwe? Am pojõk karere iomin tel eo an Jeova enaj jibõñ yuk ñõn kennan ilo juõn wãwen emõn ñõn, dri kaki ro, dri jikuul ro mõtõm im ro jet.—1 Pit. 3:15.
4. Etke kwomaroñ liki bwe am jikuul ilo yiõ in tok enaj jerammõn?
4 Meñe emaroñ or am ikũmkũm jidrik in jikuul, kwon jela bwe elõñ rej rejetake yuk im rekõnan lo am jerammõn ilo am jikuul. Bar juõn, kimij lõñliñ ibõm kin ien am naj maroñ kwalok nan ñõn ro jet ilo jikuul eo am. Kin menin, kwon beran im pojõk ñõn jikuul!