Kwõn Jab Ãliklik
1. Ta eo kwõj aikuj peran in kõm̦m̦ane, im etke?
1 Kwõnañin ke kar ãliklik in kwal̦o̦k naan ilo jikuul̦ kõnke kwo mijak ñe renaaj kajjirere kake eok? Alikkar bwe kwõj aikuj peran in kõnono el̦aptata ñe kwo jookok. Ta eo enaaj jipañ eok?
2. Ñe ej itok ñan kwal̦o̦k naan ilo jikin jikuul̦ eo, ewi wãween jemaroñ kõjerbal lol̦o̦kjen̦?
2 Kõjerbal Lol̦o̦kjen̦: Meñe jikin jikuul̦ emaroñ jikin eo em̦m̦an ñan am̦ kwal̦o̦k naan, keememej bwe kwõjjab aikuj kwal̦o̦k naan ippãn aolep ãinwõt am̦ kwal̦o̦k jãn em̦ ñan em̦. Kõjerbal lol̦o̦kjen̦ ñan jel̦ã ñããt kwõmaroñ kwal̦o̦k naan. (Ekl. 3:1, 7) Katak ko ilo juon kilaaj ak homework ko remaroñ kepel̦l̦o̦k juon iien ñan am̦ kõnono kõn tõmak eo am̦. Ak juon iaan ri jikuul̦ ro emaroñ kajjitõk ippam̦ kõn unin am̦ jab bõk kun̦aam̦ ilo jet m̦akũtkũt ko an jikuul̦. Jet Kũrjin jodrikdrik ro rar kõmel̦el̦eik ri kaki ro aer ilo jinoin jikuul̦ bwe rej Ri Kõnnaan ro an Jeova im lel̦o̦k bok ko me rej kõmel̦el̦eik kõn tõmak ko ad. Ro jet rar likũti bok ko ad n̦a ioon tebõl̦ ko aer bwe ri jikuul̦ ro jet ren loi im kõn̦aan kajjitõk kõn bok ko.
3. Ewi wãween kwõmaroñ kapojakl̦o̦k im̦aan ñan kwal̦o̦k naan ilo jikuul̦?
3 Kwõn Pojak: El̦aññe kwõnaaj pojak, enaaj l̦apl̦o̦k am̦ peran. (1 Pi. 3:15) Kõn men in, kajjioñ l̦õmn̦ake kajjitõk ko me renaaj bõkm̦aantak im wãween eo kwõmaroñ uwaake er. (JK. 15:28) El̦aññe kwõmaroñ, em̦m̦an bwe kwõn bõk Baibõl̦ eo am̦ im jejjo bok ko ad ñan jikuul̦ eo am̦ bwe kwõn maroñ kõjerbali ñe kwõnaaj aikuji. Kajjitõk jipañ ippãn jemam̦ im jinõm̦ ñan kõmmãlmel ippam̦ ilo iien kabuñ eo an baam̦le eo.
4. Etke kwõj aikuj wõnm̦aanl̦o̦k wõt ilo am̦ kwal̦o̦k naan ilo jikin jikuul̦?
4 En Em̦m̦an Am̦ L̦õmn̦ak: Jab l̦õmn̦ak bwe ri jikuul̦ ro jet renaaj aolep iien kajjirere kake eok ñe kwõnaaj kwal̦o̦k naan kõn m̦ool eo. Jet iaaer remaroñ lukkuun nõbar eok kõn am̦ peran im remaroñ kõn̦aan roñjake eok. Bõtab jab ebbeer ñe ejjel̦o̦k en̦ ekõn̦aan roñjake eok. Enaaj lukkuun buñbũruon Jeova kõn am̦ kate wõt eok. (Hi. 13:15, 16, UBS) En jab bõjrak am̦ kajjitõk ippãn Jeova bwe en kakajoor eok bwe kwõn “peran” ñan kõnono. (Jrb. 4:29; 2 Ti. 1:7, 8) Baj l̦õmn̦ak m̦õk kõn am̦ naaj lañlõñ el̦aññe juon enaaj roñjake eok. Armej eo emaroñ tokãlik erom juon iaan Ri Kõnnaan ro an Jeova!