Box in Kajitõk

◼ Emõn ke bwe Dri Kennan ro an Jeova ren kajededi katak ko rar kani ak jei?

Katak ko jen Baibel rej men in kakajur im rejañ kij. (Jerb. 15:32) Inem, jekõnan kajededi katak ko rej menin rejañ ñõn ro im rar joko jen kwelok ko. Kin an lõñ kein jerbal ko ranin, jemaroñ kane juõn katak im emõkõj ar maroñ kajededlok ñõn ro jet. Jet rar aini elõñ katak ko rar kani, ekoba katak ko me rar walok ilo elõñ yiõ ko remotlok, bwe ro jet ren kajerbali, ak ren kõmõn copy ñõn ro mõtair. Ro jet rar kõmõn Web site ilo internet im kadreloñ katak ko bwe ro rekõnan remaroñ kadreloñi ilo computer ko air.

Ejjab nana elañe jej kane katak ko ñõn kij mõke ak ro uan baamle eo ar. Bareinwõt, elder ro remaroñ karõke bwe ren kane katak ko ñõn ro renañinmij im rejjab maroñ ber ilo kwelok ko. Bõtab, eor un ko remõn bwe jen jab kajededlok katak ko im rar jeje kaki ak kani.

Ñe rej kwalok katak ko, ekkã air lemnok kin aikwij ko an ijo rej ber ie, inem emaroñ bwir ar melele kin katak ko im rar itok jen bar juõn jikin kin ar jab melele kin wãwen ko ijo katak eo ear walok ie. Koba iben menin, emaroñ bin ar kamole kin wõn eo ear kwalok katak eo im ñãt eo, bwe jen liki bwe wãwen kemelele eo ejejit ñõn melele eo ar kiõ. (Luk 1:1-4) Bareinwõt, ar kajededlok katak ko rar jei ak kani emaroñ kõmõn bwe jet ren le jen joñõn air nebare ak bok nebar jen armij.​—1 Kor. 3:5-7.

Dri Korijer eo etiljek im meletlet elap an kate ñõn letok ekan ko ilo jitõb ilo joñõn ekkar im ilo “ien ekkar.” (Luk 12:42, UBS) Menin ekoba karõk eo ñõn kwalok katak ko ilo congregation ko an Dri Kennan Ro an Jeova im katak ko jemaroñ roñjaki jen computer ilo jw.org Web site. Jemaroñ liki bwe dri korijer eo etiljek im meletlet im Kumi in Tel eo an enaj letok men ko jej aikwiji bwe jen bin ilo ar tõmak.​—Jerb. 16:4, 5.