Kilen Ad Kõjerbal Katak ko Kar Rekooti
1. Ijello̦kun bok ko kar jei, ta wãween eo juon em̦õj kõm̦m̦ane ñan jipañ kõj?
1 Elõñ el̦ap aer itoklimo in etal ñan weep jait eo ad jw.org ñan riiti ‘naan ko rem̦m̦an, ko em̦õj jei ilo jim̦we im m̦ool.’ (Ekl. 12:10) Bõtab, kwõnañin ke kortokjãn katak ko em̦õj rekooti? Wãween in ej jipañ kõj ñan roñjake aolep katak im mel̦el̦e ko kar likũti ilo weep jait eo ad. Ewi wãween katak kein me em̦õj rekooti remaroñ jipañ kõj?
2. Ewi wãween katak ko em̦õj rekooti remaroñ jipañ kõj ak baam̦le ko ad ilo iien ad katak?
2 Ñan Katak Ippãd Make ak Ippãn Baam̦le ko Ad: El̦aññe jej roñjake aer kar rekoote Baibõl̦ eo, Naan in Keeañ ko, im bok ko jet ilo iien ad itoitak ak kõm̦m̦ani jerbal ko ad kajjojo raan, men in emaroñ jipañ kõj ñan kõjerbal iien ko ad ilo mãlõtlõt. (Ep. 5:15, 16) Jemaroñ bar kõm̦m̦ane men in ilo iien kabuñ an baam̦le eo ad. Jemaroñ roñjake aer riiti katak eo ilo bok eo jej katak ippãn doon kake im l̦oore aer riiti. Bareinwõt, ñe jej kõjerbale wãween in ilo iien ad katak ippãd make enaaj lukkuun jipañ kõj, el̦aptata ñe jekõn̦aan bwe jen jel̦ãl̦o̦k kilen riit ak ñe jej katak juon kajin.
3. Wõn ro ilo teretore ko ad im remaroñ lukkuun bõk tokjãn jãn katak ko kar rekooti?
3 Ñan Ro Jej Kwal̦o̦k Naan ñan Er: Armej ro ilo teretore ko ad me ejjel̦o̦k iien aer riit kõn aer poub renaaj bõlen m̦õn̦õn̦õ in roñjake katak ko em̦õj rekooti. Ak bõlen jemaroñ iioon jet armej me rej kõnono ilo bar juon kajin im el̦apl̦o̦k aer itoklimo ñe rej roñjake ennaan eo kõn Aelõñ eo ilo ‘kajin eo aer make.’ (Jrb. 2:6-8, UBS) Ilo jet jikin, ej juon m̦anit an aelõñ eo aer ñan kobatok ippãn doon im roñjake an juon bwebwenato. Ñan waanjoñak, ekkã an armej in Hmong katakin ro redikl̦o̦k kõn m̦anit im imminene ko aer ilo aer bwebwenato l̦o̦k ñan er. Rein el̦ap aer keememej mel̦el̦e ko rej roñjaki jãn rũtto ro. Ãindein bar m̦anit ko an jet jikin ilo Africa, el̦apl̦o̦k aer katak jãn aer roñjake bwebwenato ko.
4. Ta kajjitõk ko jemaroñ kajjitõk ippãd make kaki?
4 Ilo teretore eo am̦, enaaj ke em̦m̦anl̦o̦k ñe kwõj kõjo̦e juon katak kar rekoote ilo kajin eo an armej eo kwõj kwal̦o̦k naan ñane? Ewõr ke juon armej enaaj bõk tokjãn jãn bok eo kar rekoote ñe jenaaj jilkinl̦o̦k ñan e-mail eo an? Jemaroñ ke taunl̦outi juon bok rot in ñan juon CD im lel̦o̦k ñan armej eo ej itoklimo? Bõlen jemaroñ bar lel̦o̦k bok eo kar rekoot jãne bwe en lale ilo an roñjake CD eo. Jabdewõt bok, brochure, Naan in Keeañ, ak tũrããk me kar rekoote aolep katak ko ie jemaroñ bwine ñe jej lel̦o̦k ak jilkinl̦o̦k ñan armej ro. Kar kõm̦m̦ane katak ko em̦õj rekooti bwe ren jipañ kõj ilo ad katak ippãd make im bareinwõt ñan kalibwin ine eo kõn m̦ool eo kõn Aelõñ eo ilo bũruon armej ro.—1 Ko. 3:6, UBS.