Kwal̦o̦k Naan ñan “Armej Otemjej”
1. Ewi wãween ri kwal̦o̦k naan ro rekapeel rej ãinl̦o̦k wõt ri ekkal ro rekapeel?
1 Juon ri ekkal eo ekapeel elõñ kain an kein jerbal, im ejel̦ã kilen im ñããt enaaj kõjerbali. Ãindeinl̦o̦k wõt, elõñ ad kein jerbal ak bok ko ñan jipañ kõj ilo kwal̦o̦k naan. Ñan waanjoñak, elõñ bok ko em̦õj kõm̦m̦ani kõn elõñ kain katak ko ñan jipañ kõj kwal̦o̦k naan ñan “armej otemjej.”—1 Ko. 9:22.
2. Ñããt eo jemaroñ kõjerbale bok ko ilo jerbal in kwal̦o̦k naan?
2 Ñããt Jemaroñ Kõjerbale Bok Ko: Juon ri ekkal eo ekapeel ej kõjerbale kein jerbal eo ñe emaroñ jipañe ilo jerbal eo an. Ãindeinl̦o̦k wõt ñe jej kwal̦o̦k ippãn armej ro, jabdewõt iien jemaroñ lel̦o̦k bok ko jejel̦ã ke enaaj jipañ er. Ñan waanjoñak, ñe jej kwal̦o̦k naan ippãn juon armej jãn lal̦ ko jet me rejjab tõmak ilo Kũraij, bõlen jemaroñ kõjerbale bok ko jet im ej ekkar ñan aikuj eo an armej eo. Ãlikin jidik iien, bõlen jemaroñ kiiõ kõjerbale bok eo Baibel Ej Katakin ñan ad bwebwenato ippãn armej eo.
3. Etke jej aikuj kate kõj ñan jel̦ã kilen kõjerbale aolep kein jerbal ko ad ak bok ko ad?
3 Baibõl̦ eo el̦ap an nõbare ro im rekapeel aer jerbal. (JK. 22:29, UBS) Innem, ejjel̦o̦k bar juon jerbal rainin el̦apl̦o̦k im eaorõkl̦o̦k jãn jerbal in kwal̦o̦k naan eo ad. (Rom 15:16) Bwe jen maroñ ãinwõt juon ‘ri jerbal eo ejamin jook’, jen kate kõj ñan jel̦ã kilen kõjerbale aolep kein jerbal ko ad ak aolep bok ko ad.—2 Tim. 2:15.