Kein Jerbal ko Ad ilo Kwal̦o̦k Naan
1. Ewi wãween an Kũrjin ro maroñ ãinwõt rijerbal ro rekapeel?
1 Rijerbal ro rekapeel rej kõjerbal elõñ kain kein jerbal ko. Ewõr jet kein jerbal ko me rej kõjerbali wõt ñan kõm̦m̦ane juon kain jerbal eaorõk. Ak kein jerbal ko jet enañin aolep iien rej kõjerbali. Erkein kein jerbal ko me rijerbal ro rekapeel rej likũti ilo nien kein jerbal ko aer aolep iien im el̦aptata aer tijem̦l̦o̦k kaki im jel̦ã kõjerbali. Baibõl̦ ej rõjañ kajjojo Kũrjin bwe en juon rukwal̦o̦k ekapeel ilo jerbal in kwal̦o̦k naan im bwe en juon “rijerbal ejãmin jook im ejim̦we wõt an katakin kõn naanin m̦ool.” (2 Ti. 2:15) Ta kein jerbal eo eaorõktata ilo nien kein jerbal eo ad? Ej Naanin Anij. Kein jerbal eo in el̦aptata ad kõjerbale ñan ‘kõm̦m̦an rũkal̦oor.’ (Matu 28:19, 20) Kõn men in, jen kate kõj bwe jen juon eo ekapeel im ‘ejim̦we wõt an katakin kõn naanin m̦ool’ ak Baibõl̦ eo. Bõtab, ebar wõr kein jerbal ko jet ilo nien kein jerbal ko ad im aolep Kũrjin ro rej aikuj katak kilen kõjerbali ilo jim̦we ñan aer maroñ katakin armej ro kõn m̦ool eo.—JK. 22:29, UBS.
2. Ta kein jerbal ko ad ilo kwal̦o̦k naan?
2 Kein Jerbal ko ilo Kwal̦o̦k Naan: Ijello̦kun Baibõl̦ eo, ta kein jerbal ko jet jemaroñ kõjerbali? Kein jerbal eo el̦ap ad kõjerbale ñan katakin armej ro ñan jel̦ã m̦ool eo ej bok eo Katak ko Rem̦ool jãn Baibõl̦ Eo. Ãlikin ad kõjem̦l̦o̦ke bok in ippãn rũkkatak eo ad, jej wõnm̦aanl̦o̦k ñan bok eo “Pãd Wõt ilo Yokwe eo an Anij.” Bok in enaaj jipañ rũkkatak eo ñan l̦oore naanin kakapilõk ko ilo Baibõl̦ ñe ej kõm̦m̦ani pepe ko kajjojo raan ilo mour eo an. Kõn men in, jej aikuj tijem̦l̦o̦k ak lukkuun jel̦ã kilen kõjerbali bok kein ruo. Ebar wõr jet bok ko jemaroñ kõjerbali ilo kwal̦o̦k naan. Ñan waanjoñak, juon iaan bok ko ekkã ad jino katak ippãn armej ro kake ej Juon Ennaan Em̦m̦an Jãn Anij! El̦aññe elõñ armej ro ilo teretore (territory) eo ad me rejjab lukkuun jel̦ã riit ak rej kõnono bar juon kajin me jet wõt ad bok ilo kajin ko aer ak bõlen ejjel̦o̦k ñan jidik, eokwe jemaroñ kõjerbal bok kein, Roñjake Anij im Roñjake Anij im Kwõnaaj Mour Indeeo. Juon kein jerbal me jej kõjerbale ñan jitõñl̦o̦k doulul eo ñan rũkkatak ro ad ej bok eo Wõn Ro Rej Kõm̦anm̦an Ankilaan Jeova Rainin? Bareinwõt, ewõr jet pija in alwõj ko rekadu me renaaj jipañ kõj ilo ad kõm̦m̦an rũkal̦oor ãinwõt pija kein Etke Kwõj Aikuj Katak Baibõl̦?, Ta ko Rej Wal̦o̦k ilo Im̦õn Kweilo̦k ko Ammim? im Ta ko Rej Wal̦o̦k Ñe Kõmij Katak Baibõl̦ Ippãn Armej? Jej aikuj bar katak kilen kwal̦o̦k naan kõn men kein.
3. Ta eo Ad Jerbal ñan Anij ko tok jet renaaj jipañ kõj ñan kõm̦m̦ane?
3 Enaaj wõr katak ko ilo Ad Jerbal ñan Anij ko tok jet me renaaj jipañ kõj ñan lukkuun jel̦ã kõjerbal bok ko jej kwal̦o̦k naan kaki. El̦aññe jej kate kõj ñan jel̦ã kilen kõjerbali men kein, jenaaj kwal̦o̦k ad pokake naanin kakapilõk eo an Anij me ej ba: “Kwõn kõjparok eok, im menin katakin ko am̦. Kwõn pãdwõt ilo men kein, bwe ilo am̦ kõm̦m̦an ãindein, kwõnaaj make lo̦mo̦o̦ren eok, kab ro rej roñjake eok.”—1 Ti. 4:16.