Kõjparok Maroñ eo Am̦ ñan Jel̦ã Em̦m̦an im Nana
1. Etan kweilo̦k eo el̦ap me enaaj wal̦o̦k ipel̦aakin lal̦ in jino jãn Jeptõmba 1, 2012? Ta unin kweilo̦k in el̦ap?
1 Kajjojo raan, jej iioone wãween ko me remaroñ kõm̦m̦an bwe en bõd ad kõjerbale maroñ eo ad ñan jel̦ã em̦m̦an im nana. Eñin unin jino jãn Jeptõmba 1, 2012, enaaj wal̦o̦k juon kweilo̦k el̦ap (special assembly) ipel̦aakin lal̦ in im etan ej “Kõjparok Maroñ eo Am̦ ñan Jel̦ã Em̦m̦an im Nana.” (1 Ti. 1:19) Kar kapoje aolep katak ko ilo kweilo̦k in ñan jipañ kõj aolep bwe jen lukkuun kõjparok wãween ad kõjerbale maroñ in ad me letok in Ri Kõm̦anm̦an eo ad.
2. Ta kajjitõk ko raorõk jenaaj loe uwaakier ilo naaj iien kweilo̦k eo el̦ap?
2 Roñjake Katak ko im Uwaake Kajjitõk Kein: Katak ko ilo iien kweilo̦k eo el̦ap renaaj uwaake kajjitõk kein jiljilimjuon kõn maroñ eo ad ñan jel̦ã em̦m̦an im nana:
• Ta eo el̦ap an kauwõtata im emaroñ jelõt wãween ad kõjerbale maroñ eo ad ñan jel̦ã em̦m̦an im nana?
• Ta ko jemaroñ kõm̦m̦ani bwe en jim̦we wãween ad kõjerbale maroñ eo ad ñan jel̦ã em̦m̦an im nana?
• Ta ko jemaroñ kõm̦m̦ani bwe en ejjel̦o̦k ruõd kõn mour ko an armej ro?
• Ñe jej l̦õmn̦ak kaki im jerbali naan in kakapilõk ko jãn Baibõl̦, ta eo menin ej kaalikkar kõn kain armej rot kõj?
• Ñe jej kõm̦m̦ane juon ad pepe im emaroñ oktak jãn ro jet, ta ko jemaroñ kõm̦m̦ani bwe jen jab kal̦õkatip armej rein me eoktak wãween aer kõjerbale maroñ eo aer ñan jel̦ã em̦m̦an im nana?
• Ajri ro, ta ko kom̦ maroñ kõm̦m̦ani bwe kom̦win wõnm̦aanl̦o̦k wõt im kõm̦m̦ane men eo ejim̦we meñe epen?
• Ta jeraam̦m̦an ko rej wal̦o̦k ñan ro me rej l̦oore l̦õmn̦ak ko an Anij ñe rej kõjerbale maroñ eo aer ñan jel̦ã em̦m̦an im nana?
3. Ewi wãween katak ko ilo kweilo̦k eo el̦ap remaroñ jipañ kõj?
3 Jeova ekõn̦aan jipañ kõj bwe jen jutak pen n̦ae aolep men ko me Setan ej kajjioñ kõm̦m̦ani ñan ko̦kkure maroñ eo ad ñan jel̦ã em̦m̦an im nana. Jemed ilañ me el̦ap an yokwe kõj ej kõjerbale Naan eo an im doulul eo an ñan jipañ kõj. Ej ãinwõt ñe ej ba: “Eñin ial̦ eo, kom̦win etetal ilowaan.” (Ais. 30:21) Kweilo̦k el̦ap ej juon iaan wãween ko me Jeova ej kõjerbale ñan letok naan in tõl. Jouj im kate eok bwe kwõn pãd ilo aolepen kweilo̦k in el̦ap. Kwõn lukkuun roñjake katak ko, im lale ta ko kwõj aikuj kõm̦m̦ani ñan jerbali katak kein. Bwebwenato ippãn baam̦le eo am̦ kõn men ko kwaar katak. El̦aññe jej kate kõj aolep iien bwe jen jerbali katak ko jej bõki, men in enaaj jipañ kõj bwe en jim̦we ad kõjerbale maroñ eo ad ñan jel̦ã em̦m̦an im nana. Enaaj bareinwõt jipañ kõj bwe jen jab kõtl̦o̦k an jabdewõt men ko ilo lal̦ in an Setan m̦on̦e kõj ñan kõm̦m̦ani men ko me renaaj ko̦kkure jem̦jerã eo ad ippãn Jeova.—1 Pi. 3:16.