Jab Pere Kwe Make—Meñe Kwõj Poub
1. Etke jet rejjab kajjitõk ippãn armej ro el̦aññe rekõn̦aan katak Baibõl̦?
1 Jet ri kwal̦o̦k naan ro relukkuun poub ilo mour ko aer. Eñin unin rejjab kajjitõk ippãn armej ro el̦aññe rekõn̦aan katak Baibõl̦. Ebõk iien ñan jipañ im katakin eo me kwõj katak Baibõl̦ ippãn. Ñan waanjoñak, ej aikuj wõr am̦ iien ñan kõpooje katak eo, katak ippãn armej eo, im jipañe ñan kõm̦m̦an oktak ko bwe en maroñ epaake Jeova. Rijjelõk Paul ear ba bwe ear lel̦o̦k an mour ak kamaat an maroñ ñan jipañ ro ilo Tessalonika bwe ren jel̦ã kajjien Jeova. (1 Te. 2:7, 8) Ta ko jemaroñ kõm̦m̦ani bwe jen maroñ katak Baibõl̦ ippãn ro jet meñe jej poub?
2. Ewi wãween an ro me rej yokwe Jeova kõjerbal iien ko aer?
2 Jej Aikuj Kõm̦m̦an Iien ñan Karejar ñan Jeova: Jej aikuj kõm̦m̦an iien bwe jen karejar im kabuñ ñan Jeova. Ñan waanjoñak, ekkã ad kõm̦m̦an iien bwe jen maroñ kweilo̦k, kwal̦o̦k naan, riit Baibõl̦, im jar. Meñe ri pãlele ro rej poub, bõtab rej m̦õn̦õn̦õ in kõm̦m̦an aer iien ippãn eo pãleer. Ekanooj l̦ap ad m̦õn̦õn̦õ ñan “wiaik iien” ñan kabuñ ñan Jeova kõnke jej yokwe e. (Ep. 5:15-17; 1 Jo. 5:3) Ekkar ñan Jijej, el̦aññe jej karejar ñan Jeova ej menin aikuj bwe jen kwal̦o̦k naan im kõm̦m̦an rũkal̦oor ro. (Matu 28:19, 20) Ñe jej kõl̦mãnl̦o̦kjen̦ kõn men in, emaroñ jipañ kõj ñan bõk kun̦aad ñan katak Baibõl̦ ippãn armej ro.
3. Ta ko jemaroñ kõm̦m̦ani bwe en wõnm̦aanl̦o̦k wõt ad katak Baibõl̦ ippãn armej ro meñe ekkã an ukoktak iien kwal̦o̦k naan ko ad?
3 Ewõr jet ri kwal̦o̦k naan ro me ekkã an oktak iien kwal̦o̦k naan ko aer kõn jerbal ko aer, nañinmej, ak kõn eddo ko aer ilo doulul in. Ta ko remaroñ kõm̦m̦ani bwe en wõnm̦aanl̦o̦k wõt aer katak Baibõl̦ ippãn ro jet? Eokwe, jet iien ñe ri kwal̦o̦k rein rej aikuj etal ñan jikin ko jet ikijjeen jerbal ko aer, rej wõnm̦aanl̦o̦k wõt im katak ippãn ri katak ro aer ilo talboon ak computer. Ro me ekkã aer nañinmej rej kajjitõk ippãn ri katak eo bwe en etal ñan m̦oko im̦weer bwe ren katak. Ro jet rej kajjitõk ippãn bar juon ri kwal̦o̦k naan bwe en katak ippãn ri katak eo ilo iien eo me rejjab maroñ.
4. Ta jeraam̦m̦an ko rej wal̦o̦k ñe jej katak Baibõl̦ ippãn armej ro?
4 Paul ear lukkuun m̦õn̦õn̦õ ke ear kõjerbal iien im maroñ eo an ñan jipañ ro jet jel̦ã katak ko rem̦ool. (Jrb. 20:35) Ke ear l̦õmn̦ak kõn aolep ro me ear jipañ er ilo Tessalonika, ear kam̦m̦oolol Jeova. (1 Te. 1:2) Enaaj l̦apl̦o̦k ad m̦õn̦õn̦õ ilo jerbal in kwal̦o̦k naan el̦aññe jej wõnm̦aanl̦o̦k wõt im katak Baibõl̦ ippãn armej ro meñe jej poub.