Web Site eo Ad im Kar Kõm̦m̦ane ñan Jipañ Kõj im Ro Jet
Jijej ear kakien kõj bwe jen kwal̦o̦k kõn nuuj eo em̦m̦an kõn Aelõñ Anij “ijoko otemjej ilal̦ in ãinwõt juon menin kam̦ool ñan armej otemjej.” (Mt. 24:14, UBS) Bwe jen maroñ ‘kajejjet jerbal in ad’ em̦õj kobaik watchtower.org, jw-media.org, im jw.org bwe ren juon wõt. Kiiõ Web site eo ekããl me ej kobaik aolepen Web site kein jilu ej jw.org.—2 Ti. 4:5.
“Ijoko Otemjej”: Ewõr tarrin in 2.5 bilien armej ipel̦aakin lal̦ in me rej kõjerbal Internet. Elõñ armej ro, el̦aptata jodrikdrik ro rej kõjerbal Internet ñan kapok mel̦el̦e ko. Ilo Web site eo ad, armej ro remaroñ lo uwaak in kajjitõk ko jãn Baibõl̦. Bareinwõt ej kwal̦o̦k kõn doulul eo an Jeova im ej kõm̦m̦an bwe en pidodo an armej ro jejel̦o̦k im kajjitõk bwe juon en katak Baibõl̦ ippãer ilo ejjel̦o̦k on̦ean. Wãween in ej kõm̦m̦an bwe nuuj eo em̦m̦an en jeededl̦o̦k ñan jikin ko me emaroñ jeja aer roñ kõn ennaan eo kõn Aelõñ eo an Anij.
“Ñan Armej Otemjej”: Bwe “armej otemjej” ren maroñ jel̦ã kõn katak ko rem̦ool ilo Baibõl̦, katak kein rej aikuj wal̦o̦k ilo elõñ kajin ko. Ilo Web site eo ad etan jw.org, ewõr kõmel̦el̦e ko ie ilo enañin 400 kajin ko, elõñl̦o̦k jãn jabdewõt Web site ko jet ilo Internet. (Ejjab aolep men ko ilo Web site eo ad rej wal̦o̦k ilo jet kajin ko.)
Kortokjãn: Kar kõm̦m̦ane Web site eo ad ekããl etan jw.org ñan kwal̦o̦k naan ñan armej ro. Kar bar kõm̦m̦ane ñan jipañ kõj Ri Kõnnaan ro an Jeova. El̦aññe ewõr am̦ Internet, kõmij rõjañ kom̦ ñan lale jw.org bwe kwõn jel̦ã kobban. Eñin kilen am̦ kõjerbale Web site eo.
[Pija eo ilo peij 3]
(Ñan lale pija eo, jouj im lale ilo bok eo.)
Kajjioñe Men In
1 Kwõn taip www.jw.org ilo Internet jãn computer eo am̦.
2 Etale kobban im lale katak ko, menu im link ko.
3 El̦aññe ewõr Internet ilo cell phone eo nejũm̦ ak men ko ãierl̦o̦k, kwõmaroñ lale Web site eo jw.org. Em̦õj aer kõm̦m̦ane bwe en jejjet im em̦m̦an an wal̦o̦k ilo men kein meñe remaroñ dik. Eban oktak mel̦el̦e ko ie.