Jen Anõke Ri Kanaan Ro—Jona
1. Etke jemaroñ ba bwe Jona ear juon armej em̦m̦an?
1 Ta eo ej jiktok ilo l̦õmn̦ak eo am̦ ñe kwõj roñ kõn Jona? Jet armej remaroñ ba bwe ear mijak armej im pen bũruon. Bõtab, ilo m̦ool Jona ear ettã bũruon, peran im ear kaarmejjeteik kõn̦aan ko an make. Ewi wãween jemaroñ anõke wãween kein rem̦m̦an kõn Jona?—Jem. 5:10.
2. Ta eo jemaroñ kõm̦m̦ane ñan kwal̦o̦k ettã bõro ãinwõt kar Jona?
2 Ear Ettã Bũruon: Ilo jinoin, Jona ear ko im jab etal ñan jikin eo me en kar kwal̦o̦k naan ie. Jemel̦el̦e unin an kar ãindein. Ear ko kõnke Ri Assiria ro rar tarjen joñan aer lãj im nana. Joñan, kar n̦aetan Nineva, “jikin kweilo̦k eo ebõtõktõk.” (Na. 3:1-3) Jekdo̦o̦n ak Jeova ear kajim̦weik Jona. Innem Jona ear kwal̦o̦k an ettã bũruon ilo an kar m̦õn̦õn̦õ in etal ñan Nineva ke Jeova ear bar kajjitõk bwe en etal. (JK. 24:32; Jona 3:1-3) Meñe Jona ear ko ilo jinoin, ak tokãlik ear kõm̦anm̦an ankilaan Jeova. (Matu 21:28-31) Ak ta kõn kõj? Eokwe, jen peek ilo bũruod ñan kwal̦o̦k naan wõt meñe juon ear kajim̦weik kõj. Im el̦aññe elukkuun pen kwal̦o̦k naan ilo bukwõn eo me jej jerbal ie, jen wõnm̦aanl̦o̦k wõt im kwal̦o̦k naan.
3. Ñe kwõj kwal̦o̦k naan, iien ta eo kwõj aikuj kwal̦o̦k am̦ peran? Ta ko ippãd im jemaroñ kõjerbali ñan jerbal in kwal̦o̦k naan?
3 Ear Peran im Kaarmejjeteik Kõn̦aan ko An: Ke Jona ear kile bwe jel̦a ro rar pãd ilo kauwõtata jãn wõt kar pepe eo an, ear m̦õn̦õn̦õ in kaarmejjeteik mour eo an ñan lo̦mo̦o̦ren er. (Jona 1:3, 4, 12) Tokãlik, Jona ear etal ñan Nineva bwe en kajejjet jerbal eo an. Ke ear tõkãkl̦o̦k, ear deblo̦ke ãne eo bwe en pukot juon jikin em̦m̦an ñan keeañ kõn naan in ekajet eo an Jeova ie. Men kein me Jona ear kõm̦m̦ani rej kaalikkar bwe ear juon ri kanaan ekanooj peran! (Jona 3:3, 4) Ak ta kõn kõj rainin? Eokwe, ñe armej ro rej jum̦ae kõj, jej aikuj peran in kwal̦o̦k naan ñan er. (Jrb. 4:29, 31) Im jej aikuj kaarmejjeteik kõn̦aan ko ad bwe jen maroñ kõjerbal iien im jããn kab men ko m̦weied ñan jerbal in kwal̦o̦k naan.—Jrb. 20:24, UBS.
4. Etke eaorõk ñan bõk iien ñan kõl̦mãnl̦o̦kjen̦ kõn joñak ko rem̦m̦an an ri kanaan ro an Jeova?
4 Ñe jej riiti bwebwenato ko kõn ri kanaan ro an Jeova, em̦m̦an bwe jen l̦õmn̦akel̦o̦k ad mour ilo tõre eo. El̦aññe kwõj kõm̦m̦ane men in, enaaj lõñ men ko kwõnaaj katak im bũki jãn bwebwenato kein. Innem, kwõmaroñ kajjitõk ippam̦ make: El̦aññe en kar ña armej eo, in kar ta? Ewi wãween imaroñ kajjioñe armej in? (Hi. 6:11, 12, UBS) Katak ko jet ilo Ad Jerbal ñan Anij ñan allõñ ko tok renaaj jipañ kõj ñan katak elõñ men ko rem̦m̦an kõn joñak ko an ri kanaan ro an Jeova.