Kõjerbal Web Site eo Ad ñan Katakin Ajri ro Nejũm̦
1. Ilo Web site eo ad, etke kar kõm̦m̦ane juon jikin ñan katakin ajri ro?
1 Kar kõm̦m̦ane Web site eo ad etan www.jw.org, ñan kãitoklimoik im jipañ aolep armej, ro reddik kab ro rerũtto. Ilo Web site in ilo kajin Pãlle, kwõmaroñ etal ñan ijo me ej ba “Children” (etal ñan Bible Teachings, im jipede naan eo Bible Teachings > Children). Jikin in ej ñan jipañ ajri ro im rũtto ro jemãer im jineer bwe ren epaakel̦o̦k doon im bareinwõt bwe en epaakl̦o̦k kõtaan ko aer ippãn Jeova. (Dt. 6:6, 7) Ewi wãween rũtto ro remaroñ kõjerbale Web site in ñan katakin ajri ro nejier?
2. Ewi wãween kwõmaroñ jel̦ã katak ta ko rejejjet ñan joñan iiõ eo an ajri eo nejũm̦?
2 Jel̦ã Ukoktak: Eoktak aikuj ko an kajjojo ajri. (1 Ko. 13:11) Kõn men in, ewi wãween kwõmaroñ jel̦ã katak ta ko rejejjet ñan joñan iiõ eo an ajri eo nejũm̦? Eokwe, kajjitõk ippam̦ make: ‘Ta eo enaaj kãitoklimoik ajri eo nejũ? Ewi joñan an naaj mel̦el̦e? Ewi aetokin an ajri eo nejũ maroñ jijet ilo juon iien katak?’ El̦aññe ajri eo ej jilu an iiõ ak dikl̦o̦k, bõlen kwõmaroñ katak ippãn kõn bwebwenato ko me rej pãd ilo “My Bible Lessons.” Baam̦le ko jet remaroñ katak ippãn doon bwebwenato ko ilo Baibõl̦ me rej wal̦o̦k ilo “Teach Your Children.” Bareinwõt, ewõr wãween ko jet me rũtto ro remaroñ bar katak ippãn ro nejier kaki. Ta kein? Eokwe, pãrokõrããp ko tok ilal̦ renaaj kaalikkari.
3. Ewi wãween rũtto ro remaroñ kõjerbal “Family Worship Projects” ñan jipañ ro nejier?
3 Katak ko ñan Iien Kabuñ an Baam̦le: Ijo me ej ba “Children” ilo Web site eo, kwõmaroñ etal ñan “Family Worship Projects,” im ilo ijin ewõr wãween ko me emaroñ jipañ rũtto ro ñan katak ippãn ro nejier. Jipede button eo me ej ba download, im riiti “Parents’ Guide” me ej wal̦o̦k ilo kajjojo katak ko me ej jipañ rũtto ro ñan jel̦ã kilen kõjerbale bwebwenato ko im kõl ko jet ñan katakin. Kõjerbal pija ko (picture activities) me rej kein katak ãinwõt pija ko me ro nejid remaroñ color i. Jemaroñ kõjerbale wãween in ñan katakin ajri ro reddik. Ak ñan ajri ro rerũttol̦o̦k, jemaroñ jipañ er ñan kadedel̦o̦k kajjojo katak ko (study activities). Aolep wãween kein ilo kajjojo katak rej jitõñl̦o̦k ñan juon wõt bwebwenato ak katak ilo Baibõl̦. Kõn men in, ajri ro reddik ekoba ro rerũttol̦o̦k remaroñ aolep bõk kun̦aaer ilo juon wõt katak ilo iien kabuñ an baam̦le eo.
4. Ta ko rej pãd ilo “Become Jehovah’s Friend”?
4 Erom Jeran Jeova: Jemaroñ bar etal ñan ijo ej ba “Become Jehovah’s Friend,” im ilo ijin ewõr pija ko ñan ajri, al ko, im kõl ko jet ñan jipañ rũtto ro ñan katakin ro nejier reddik kõn Naan in Anij. (Dt. 31:12) Pija in alwõj kein me rekadu rej katakin ajri ro kõn men ko raorõk. Bareinwõt, ewõr kõl ko jet ñan katak me rej kitibuj iukkure ko me rej jipañ ajri ro ñan aer lo aorõkin juon katak. Im kõnke ekkã an em̦m̦an ippãn ajri al, jãn iien ñan iien rej illik al in kweilo̦k ko im al ko jet ñan ajri ro reddik ilo Web site in. Al kein rej jipañ ajri ro ñan keememej men ko rej katak.
5. Etke ro jemãn im jinen rej aikuj kajjitõk bwe Jeova en jipañ er ñan katakin ro nejier kõn m̦ool eo?
5 Jeova ekõn̦aan bwe kom̦ ro jemãn im jinen kom̦win lo tõprak ilo ami katakin ro nejũmi. Kõn men in, kajjitõk ippãn bwe en jipañ kom̦ katakin ro nejũmi kõn m̦ool eo. (Eka. 13:8) Kõn jipañ jãn Jeova, kom̦ naaj maroñ katakin ro nejũmi bwe ren ‘mãlõtlõt’ im bõk “lo̦mo̦o̦r kõn tõmak eo ej ilo Kũraij Jijej.”—2 Ti. 3:15; JK. 4:1-4.