Jen Anõke Ri Kanaan Ro—Hoseia
1. Ta kajjitõk eo kwõmaroñ kar kajjitõk ippam̦ make kake?
1 Ke kwaar kõl̦mãnl̦o̦kjen̦ kõn joñan an l̦ap an Jeova jouj im tũriam̦o, bõlen kwaar kajjitõk ippam̦ make kõn kajjitõk in, ‘Ta men ko ikõn̦aan kaarmejjeti ñan jerbal eo an Jeova?’ (Sam 103:2-4; 116:12) Hoseia ear m̦õn̦õn̦õ in kõm̦m̦ane men eo Jeova ear jiroñe bwe en kõm̦m̦ane, meñe ear mel̦el̦ein bwe ej aikuj kaarmejjete kõn̦aan im l̦õmn̦ak ko an make. Ta eo jemaroñ kõm̦m̦ane ñan l̦oore joñak eo an Hoseia?
2. Ewi wãween jemaroñ ãinwõt Hoseia ilo ad kijenmej wõt ilo kwal̦o̦k naan?
2 Kwal̦o̦k Naan Ilo Juon Iien Enana: Ennaan eo Hoseia ear itõn kwal̦o̦ke ear lukkuun ñan bwij ko joñoul bwijjin Israel. Etke? Kõnke Enañin aolepen armej rein rar ilo̦k jãn Jeova. Kiiñ Jeroboam eo kein karuo ear kõm̦m̦ani men ko relukkuun nana im̦aan mejãn Jeova. Ear bareinwõt kowõnm̦aanl̦o̦k kabuñ ñan ekjab in koon eo me kiiñ Jeroboam eo kein kajuon ear jino kajutake. (2 Kñ. 14:23, 24) Kiiñ ro tokãlik an bwij ko joñoul rar bar kajekdo̦o̦n kabuñ eo em̦ool an Jeova m̦ae iien eo kar ko̦kkure aelõñ in ilo iiõ eo 740. Meñe Hoseia ear mour ibwiljin kabuñ kein reriab, ak ear tiljek wõt ilo jerbal eo an ãinwõt juon ri kanaan ium̦win 59 iiõ. Jej ke ãinwõt Hoseia ikijjeen ad kate kõj ilo kwal̦o̦k naan ium̦win elõñ iiõ, jekdo̦o̦n ñe armej rejjab m̦õn̦õn̦õ in roñjake im ñe rej jum̦aeik kõj?—2 Ti. 4:2.
3. Mour eo an Hoseia ej kaalikkar ta kõn Jeova?
3 Kaalikkar kõn an Jeova Tũriam̦o: Jeova ear jiroñ Hoseia bwe en pãleek juon kõrã me e ri l̦õñ. (Hos. 1:2) Ekar wõr juon nejin Hoseia im Gomer l̦addik. Ak tokãlik ear wõr ruo nejin kõrã in make. Bõtab, Hoseia ear m̦õn̦õn̦õ in jol̦o̦k an bõd. Men in ear kaalikkar kõn joñan an kar Jeova tũriam̦okake ri Israel ro ke rar ukel̦o̦k. (Hos. 3:1; Rom 9:22-26) Jej ke m̦õn̦õn̦õ in kõjekdo̦o̦n eñjake im l̦õmn̦ak ko ad bwe jãn kaalikkar ñan aolep kõn joñan an Jeova tũriam̦okake aolep armej ro?—1 Ko. 9:19-23, UBS.
4. Ta jet iaan men ko jemaroñ kaarmejjeti ñan jerbal eo an Jeova?
4 Jet ri karejar ro an Jeova rar kam̦õj er jãn jerbal ko aer el̦ap on̦aer bwe ren kal̦apl̦o̦k aer iien ilo jerbal in kwal̦o̦k naan. Ro jet rar kããlõt ñan jab pãlele ak bwe en jab wõr nejier kõnke ren jibadek jerbal ko jet ñan kowõnm̦aanl̦o̦k jerbal in kwal̦o̦k naan. Ñe jej l̦õmn̦ak kõn mour eo an Hoseia, bõlen jemaroñ kar l̦õmn̦ak im ba, ‘Elukkuun naaj kar pen ñan aõ kõm̦m̦ane men eo ear kõm̦m̦ane.’ Bõtab, el̦aññe el̦apl̦o̦k ad kam̦m̦oolol Jeova kõn jouj eo an el̦ap ñan kõj, im atartar wõt ioon kajoor eo an, eokwe emaroñ kõjerbal kõj ilo jerbal ko me ejjel̦o̦k ad kar kõtmãne kaki, ãinwõt kar Hoseia.—Matu 19:26; Pil. 2:13, UBS.