Katak eo me Enaaj Jipañ Kõj Ilo Jerbal In Kwal̦o̦k Naan
1. Ta un ko ruo unin kar kõm̦m̦ane katak eo “Bwebwenato kõn Baibõl̦”?
1 Ejjabto jãn kiiõ, enaaj wõr juon katak ilo Naan in Keeañ ko im n̦aetan “Bwebwenato kõn Baibõl̦.” Ewõr ruo unin kar kõm̦m̦ane katak in. Kein kajuon, ej bwe jen kaitoklimoen armej ro kõn katak ko jãn Baibõl̦ eo. Kein karuo, ej ñan jel̦ã kilen kõmel̦el̦eik armej ro kõn kajjitõk ko aer. (1 Pi. 3:15, UBS) Ewi wãween jemaroñ kortokjãn katak kein?
2. Ewi wãween jenaaj kõjerbal katak in ilo kwal̦o̦k naan?
2 Kõjerbali Ilo Kwal̦o̦k Naan: Kwõmaroñ kakon̦ jet Naan in Keeañ ko me ewõr katak in ie “Bwebwenato kõn Baibõl̦.” Emaroñ wõr juon eo ej m̦õn̦õn̦õ in roñjake ak bõlen eo kwõj katak ippãn ej kwal̦o̦k juon kajjitõk ak juon men me ejjab errã kake. Ñe men eo ej bõkm̦aantak ejejjet ñan juon iaan kajjitõk ko ilo katak eo ilo juon iaan Naan in Keeañ ko, eokwe kwõmaroñ lel̦o̦k bok eo ñane im etale ippãn doon. Ñe ejjel̦o̦k am̦ bok eo, kwõmaroñ downloadi jãn jw.org.
3. Ñe jej kõmel̦el̦eik armej ro kõn juon iaan katak kein, ta eo jemaroñ kõm̦m̦ane?
3 Ewi wãween kwõmaroñ etale juon iaan katak kein ippãn armej ro ilo am̦ kwal̦o̦k naan? Jet rar ãinwõt ñe rej armej ro ilo katak kein. Rej kõtl̦o̦k bwe armej eo rej kwal̦o̦k naan ñane en bõk naan ko an ‘armej eo’ im ri kwal̦o̦k naan eo ej bõk naan ko an ‘ri kwal̦o̦k eo’. Em̦m̦anl̦o̦k wãween in kõnke armej ro rel̦ak riiti naan ko an bar juon armej ekõm̦m̦an bwe en ejjel̦o̦k kõbauwe kõn Baibõl̦. Im wãween in ekõpel̦l̦o̦k ial̦in aer make etale tõmak ko ad.—Dt. 32:2, UBS.
4. Ta ko jemaroñ kõm̦m̦ani ñe jej riiti katak ko ñan kammineneik kõj ilo jerbal in kwal̦o̦k naan?
4 Kammineneik Kwe Make im Ro Jet: Ñe kwõnaaj riiti katak ko, kõl̦mãnl̦o̦kjen̦ kõn eoon ko, waanjoñak ko im wãween rej kõmel̦el̦e im kwal̦o̦k kajjitõk ko. Kajjioñ in l̦õmn̦ak kõn wãween an rein ilo katak ko kõnono. Innem, kajjioñe men in ñe kwõj kwal̦o̦k naan. (JK. 1:5; 9:9) Juon jeid im jatid kõrã ear ba, “Ke iar riiti katak kein, ej ãinwõt ñe ij katak jãn juon pioneer ‘etijem̦l̦o̦k’ im aolep iien ejel̦ã ta ko rejejjet ñan an ba.”
5. Ewi wãween jemaroñ kõpooj ri katak ro ad ñan kwal̦o̦k naan?
5 Kwõmaroñ bar kõjerbale waanjoñak eo kar je ilo katak eo ñan kõpooj ri katak eo am̦ ñan jerbal in kwal̦o̦k naan. Komiro maroñ riiti katak eo ippãn doon im kwõn kõtl̦o̦k bwe ri katak eo am̦ en e eo ej ri kwal̦o̦k naan eo. Ilo wãween in, ri katak eo am̦ emaroñ jino katak kilen kõmel̦el̦eik armej ro kõn men ko ej tõmaki ilo wãween eo jouj. (Kol. 4:6) Katak kein rej jet iaan men ko Jeova ej kõjerbali ñan jipañ kõj bwe jen “kajejjet jerbal” in kwal̦o̦k naan.—2 Ti. 4:5.