Kwoj Kortokjen ke Aolep Katak Ko?
1 Katak ko jej kwalok ñan armij ro ilo jerbal in kwalok nan rej walok ilo magazine ko jej bõki lokin jilu alliñ. Jet ian katak kein rekkar ñan wãwen ailiñ kein ilo Micronesia, rar kobaiki ilo Imõniaroñroñ eo ilo kajin Majõl. Emwij ke am lo wãwen ko remõn ñan kortokjeir ilo am kwalok nan?
2 “Ta Eo Jej Katak Jen Jesus”: Bõlen kwar lo tokjen ikijen katak in ñan jino katak Bible ibben armij ro. Elañe kwojañin jino kõmmane men in, kajeoñ in readi unin tel in katak eo ñan ri mweo. Inem kwalok ñan e men eo Jesus ear ba kin unin tel in katak eo ilo paragraph 1. Ñe ri mweo ej jino kwalok an itoklimo, kwon kowõnmanlok wõt bwebwenato eo ikijen am kajerbal unin tel ko redik, ko emwij kõlajraki einwõt kajitõk ko rekaitoktoklimo. Rejañ ri mweo ñan kwalok lemnak eo an kin kajitõk ko. Ilo tukadu kameleleik e kin pija ko rej ekkeijaklok ñan paragraph eo im ñe emwij wõnmanlok ñan paragraph eo tok juõn. Kwomaroñ bõk jimettan in katak eo ilo jinoin, inem tokelik ñe kwoj bar jeblak kwon kamwijlok katak eo. Kwon bojak ñan am wõnmanlok wõt im katak ibben kin brochure eo Ta Eo Anij Ekõnan bwe Jen Kõmmõne?
3 “Key ko ñan Kamõnõnõik Juõn Family”: Kar kõmmane katak in ñan jibañ ri belele ro im ro jemen im jinen. Katak in enaj jibañ ir jerbali nan in kaiñi ko ilo Bible eo im kamadmõdi abañ ko me rej kokkure ainemõn ilo family eo. Kwomaroñ bareinwõt kajerbal katak kein ñan jibañ ro rejjab bed ilo mol eo ñan kile meletlet eo ej bed ilo Bible eo.—2 Tim. 3:16, 17.
4 Katak ko ñan Jodikdik Ro Nejid: Katak ko naetair “Ñan Jodikdik Ro Nejid” rej letok juõn lajrak in melele im rej kamaroñ eo ej read ñan melele bwebwenato ko ilo Bible. Kwomaroñ kajerbal katak kein ñan jibañ jodikdik ro kwoj iion ir ilo jerbal in kwalok nan ñan air kile aorõkin katak Nan in Anij. (Sam 119:9, 105) Ñe kwoj kennan ibben ro ewõr nejiir, kwomaroñ jitõñlok ñan katak ko naetair “Katakin Ajiri Ro Nejõm.” Katak kein remaroñ jibañ ajiri ro redik ñan katak jen joñok ko an armij ro ilo Bible. Kwonañin ke etale katak kein ibben ajiri ro nejõm?
5 Katak ko Jet: Katak eo naetan “Ro Rej Readi Book ko Ad Rej Kajitõk” ej etale im uake kajitõk ko im ekkã an ro rejjab Ri Kennan ro an Jehovah kajitõk kaki. Kwomaroñ jitõñlok ñan katak in ñe kwoj lelok magazine ko jen em ñan em. Katak eo “Juõn Letter Jen . . . ” ej juõn ennan jen ro im rar make jelmaik abañ ko me missionary ro ak ro jet rar iioni ilo air kwalok nan. Katak kein renaj maroñ jibañ ro ewõr air itoklimo ñan kile bwe jerbal in kwalok kin news eo emõn ibelakin lal ej jejjet kitien im ej kamol bed eo an Christ.—Mat. 24:3, 14.
6 Bar juõn katak naetan “Ruaklok ñan Anij” me ej bedbed ion lajrak in read Bible eo ilo School in Kwalok Nan eo an Christian, emaroñ kamakit ro emol burueir ñan kõnan kalaplok air melele kin Jehovah. Kar je katak in “Kajeoñe Tõmak Eo Air” ñan jibañ armij ro pijaik ilo lemnak ko air bwebwenato ko ilo Bible ñe rej readi, armij ro ie, jokãlet ko air, men ko rar iioni, im tõmak eo air, bwe ren tõmak bwe men kein remol bwe rar walok.
7 Elap ad mõnõnõ in bõk Imõniaroñroñ ko me kar kõmmani ñan ad kajerbali ilo jerbal in kwalok nan! Inem jen lukkun kate kij ñan bõk melele kin kobban katak ko ie bwe jen kortokjen ilo ien jej kwalok nan.