Ñan Ro Rej Read Magazine Ko Ad

KIMIJ mõnõnõ in kejelãik yuk bwe ilo magazine in Imõniaroñroñ eo jen alliñ in im manlok, enaj wõr jet oktak ko kin jekjekin. Mokta jen ad kamelele kin ta eo enaj oktak, jen konono mokta kin ta eo enaj bedwõt.

Etan magazine in, Imõniaroñroñ Ej Kwalok kin Ailiñ eo an Jehovah, ejamin oktak. Kin men in, Imõniaroñroñ eo enaj wõnmanlok im kautiej Jehovah einwõt Anij eo emol im kainemõn ro rej read kin news eo emõn kin Ailiñ eo an. Katak ko ilo page 5 ñan 9 ilo magazine in ej konono kin ta in Ailiñ eo im ñããt enaj itok. Bareinwõt, magazine in Imõniaroñroñ eo ej kowõnmanlok tõmak eo kin Jesus Christ, rejetake mol eo jen Bible, im kamelele kin melelen men ko rej walok ilo lal in ibben jibañ eo jen kanan ko jen Bible, einwõt an magazine ko mokta kar kõmmane iumin elõñlok jen jibuki yiõ ko.

Inem, ta eo enaj oktak? Jen kamelele jet ian mõttan ko rekãl rekaitoklimo me renaj walok ilo edition ak kein katak eo ilo ran eo kein kajuõn kajjojo alliñ.a

Elõñ wãwen ko rekaitoktoklimo renaj walok kajjojo alliñ. Katak eo “Kwar Jelã Ke?” enaj letok nan in jiroñ ko rekaitoklimo me ej kwalok melelen jet bwebwenato ko me kar kãleti jen Bible. Katak eo “Ruaklok ñan Anij” naj kwalok point ko relap kin ta eo jemaroñ katak kin Jehovah jen eon ko remol ilo Bible. Mõttan katak eo “Ro Rej Readi Book ko Ad Rej Kajitõk” enaj konono kake uak ko ñan kajitõk ko jen Bible me ekkã air kajitõk kake. Ñan wanjoñok, elõñ armij rej lemnak, “Ailiñ in Anij ej bed ke ilo buruõm?” Kwonaj lo uak eo ilo page 13.

Jet ian mõttan ko kar kõmanmani ñan jibañ family ko. Mõttan eo “Men in Aikwij ko ñan Kamõnõnõik Family Eo,” enaj walok emen alen ilo juõn yiõ, im enaj kwalok jet bwebwenato ko remol kin abañ ko an family im kwalok bwe nan in kakabilek ko remaroñ jibañ ñan kamadmõd abañ ko. Katak eo etan “Katakin Ajiri Ro Nejõm,” ej juõn katak emõn ñan ro jemen im jinen bwe ren read ibben ajiri ro. Katak in enaj walok ilo alliñ in April im October. Ilo alliñ in January im July, katak eo etan “Ñan Jodikdik Ro Nejid,” enaj kwalok lajrak eo ñan kõmman juõn Bible study ejejjet ñan jodikdik ro.

Katak ko jet renaj walok emen alen ilo juõn yiõ. Juõn katak etan “Kajeoñe Tõmak eo Air” im enaj rejañ kij ñan anõk wanjoñok ko an armij ro ilo Bible. Ñan wanjoñok, ilo page 18 ñan 21 ilo magazine in, kwonaj read juõn bwebwenato ejelet buruen armij kin ri kanan eo Elijah im kwonaj katak kin ewi wãwen ad maroñ kajeoñe tõmak eo an. Katak eo “Juõn Letter Jen . . . ” enaj kwalok juõn report jen missionary ro im ro rej bed ilo jikin ko jet ibelakin lal in. Katak eo “Men ko Jej Katak Jen Jesus” enaj kwalok kin irinekatak ko ilo Bible ilo juõn wãwen ebidodo melele kake.

Kimij liki bwe magazine in Imõniaroñroñ eo enaj wõnmanlok wõt ñan kaitoklimoen ro rej read im kautiej Bible eo im kõnan jelã kin ta eo book in ej katakin kake. Kimij kejatdikdik bwe bwebwenato in enaj jibañ yuk bwe kwon jab maro kin mol eo jen Bible.

RI JEJE RO

[Kamelele eo itulal]