“Ewi Wãwen Kwo Naj Uak?”

1. Ta abañ ko elõñ iad jej jelmaiki?

¹ Kwoj yokwe ke nan in Anij ak kwoj kile bwe ebin ñan am kememej ilo tibdikin kin bwebwenato ko ilo Bible ak ia eo rej bed ie ilo Jeje ko? Kwokõnan ke bwe ajiri ro nejõm ren bõk melele eo ejimwe kin mol im katak ko ilo Bible? Mõttan eo “Ewi Wãwen Kwo Naj Uak?” me ej walok iloan magazine in Awake! (Ruj!) eo ilo kajjojo alliñ ilo peij 31 emaroñ jibañ ro redik im ritto ro jimor ñan air jelã kin kobban Nan eo an Anij.​—Jerbal 17:11.

2. Ewi wãwen jemaroñ kajerbal mõttan ko kajjojo in “Ewi Wãwen Kwo Naj Uak?”

² Ewi wãwen kwomaroñ kortokjen menin? Awake! (Ruj) in January 2006 eo, ear letok nan in rejañ kein: “Bõk jidik ien im lale peij 31  . . Jet ian mõttan ko ilo peij in renaj kaitoklimoin ro redik, ko jet renaj melejoñe maroñ in kememej eo an ro reritto ilo katak ko ilo Bible. Mõttan eo ‘Ñããt ilo Bwebwenato?’ enaj jibañ yuk jelã kin ien im tõre ko me armij ro ilo Bible rar mour im ien ko wãwen ko relap rar walok. Meñe uak ko ñan mõttan eo ‘Jen Magazine in’ jemaroñ lo iloan magazine in, uak ko ñan enañin aolep kajitõk ko jet renaj walok ilo juõn ian peij ko iloan magazine eo, kwonaj lo uak ko rej jitlallok. Etke kwo jab kõmman etale ko mokta jen am readi uak ko emwij kwaloki inem bwebwenato kaki ibben ro jet kin ta eo kwar katak? Kwomaroñ bareinwõt kajerbal mõttan in ekãl ‘Ewi Wãwen Kwo Naj Uak?’ einwõt bedbedin bwebwenato eo an family eo kin Bible ak einwõt juõn kumi.”

3. Ewi wãwen jet family ko rar bõk tokjen jen mõttan in, im mõttan et eo elap an emõn ibbam?

³ Emol, elõñ family ko rej mõnõnõ ilo air kajerbal wãwen in einwõt juõn bedbed ñan ien katak eo an family eo. Juõn jinen ear jeje: “Ña im leo ibba kimar lemnak bwe enaj juõn men emõn ñan am kobaiktok mõttan eo ‘An Ajiri ro Bukõt Pija’ ñan ien katak eo an family eo ñan am kõmman bwe katak eo en emmourur im kaitoklimoin ledik eo nejimro jilu yiõ dettan. Elap an menin mõnõnõ ñan am lale an ledik eo nejim ilo elap lañliñ ej bõk copy in Awake! (Ruj!) magazine eo an im eliklok ñan kajjojo peij mae ien ej lo men eo ej bukõte.” Juõn jemen ilo Brazil ej ba: “Ña im ladik eo nejiõ jiljilimjuõn yiõ dettan kim kanuij yokwe wãwen in ilo Awake! (Ruj!) magazine eo. Elap an jibañ Moises ñan an lukkun roñjake, jelã bukõt eon ko ilo Bible eo, bareinwõt jelã ta melelen pija ko, im melele kin tõre im ien ko.” Ashley, eo rualitõk yiõ dettan ear jeje: “Kommol kin ‘Ewi Wãwen Kwo Naj Uak?’ ilo jemlokin Awake! (Ruj!) eo. Ij katak elõñ men ko kin Bible eo jen menin.”

4. Ewi wãwen juõn family emaroñ kajerbal wãwen in einwõt mõttan katak kin Bible eo an family eo?

⁴ Etke kwoj jab kajeoñ kajerbal mõttan eo “Ewi Wãwen Kwo Naj Uak?” jen ien ñan ien einwõt mõttan ien katak eo an family eo am? Kwomaroñ kajerbal Index eo ak Watchtower Library ilo CD-ROM ñan am bukõt uak ko ñan kajitõk ko rebin. Ilo am kõmmane menin, kwonaj katakin ajiri ro nejõm kilen kõmman etale ko. Elañe ewõr ro nejõm reritto lok jidik, etke kwojjab jitõñ ir ñan air kõmman etale ko rebinlok ñan air bukõt uak ko ñan mõttan ko “Wõn Ña?” ak “Ñããt ilo Bwebwenato?” mokta jen ien katak eo an family eo? Inem remaroñ kwalok tokjen etale ko air ilo ien katak eo. Kajerbal peij in ilo wãwen eo ewõr tokjen ej juõn wãwen ro jinen im jemen remaroñ katakin ro nejiir Nan in Anij, jibañ ir ñan air jelã “jeje ko rekwojarjar” jen ien rej niñniñ wõt.​—2 Timote 3:15; Duteronomi 6:7.