Juon Katak Ekããl kõn Kilen Ad Kwal̦o̦k Naan Ippãn Armej

Ilo Naan in Keeañ eo Nõm̦ba 2, 2016, ewõr juon katak ekããl kar je itulik im ej ba “Ta eo Baibõl̦ Ej Ba?” Kar je katak in ñan jipañ kõj jel̦ã ta eo jen kõm̦m̦ane ñe jej jino kõnono ippãn armej ro ilo jerbalin kwal̦o̦k naan. Wãween kar kõm̦m̦ane katak in ej ãinl̦o̦k wõt tũrããk ko. Ewõr juon kajjitõk me em̦õj kõllaajrak jet uwaak ko ñan an rũm̦weo kããlõt men eo ej errã kake, im itulal̦in kajjitõk in ewõr juon eoon ej kwal̦o̦k uwaak eo jãn Baibõl̦. Bareinwõt ewõr jet bar kõmel̦el̦e ko me jemaroñ bwebwenato ippãn armej eo kaki.

Ñe elukkuun em̦m̦an ad bwebwenato ippãn armej ro kõn Baibõl̦, ekkã an men in kõm̦m̦an bwe en pidodo ad jino juon rũkkatak. Innem jen kõjerbal katak in ekããl ñan jipañ elõñ armej ro me el̦ap aer kwõle kõn m̦ool eo.​—Mt 5:6.

MEN KO JEMAROÑ KÕM̦M̦ANI:

1. Kajjitõk ippãn rũm̦weo ewi iaan uwaak ko ñan kajjitõk eo im ej errã kake

2. Roñjake an uwaak im kam̦m̦oolole

3. Riiti eoon eo ium̦win unin tõl jidikdik eo ej ba “Ekkar ñan Baibõl̦,” im kajjitõk ta l̦õmn̦ak eo an kõn eoon eo. El̦aññe ewõr an iien, komiro maroñ wõnm̦aanl̦o̦k im etale kõmel̦el̦e ko ium̦win unin tõl eo tok juon me ej ba “Ta Men ko Jet Baibõl̦ Ej Ba?”

4. Lel̦o̦k Naan in Keeañ eo

5. Karõk ñan bar jepl̦aak bwe komiro en etale kajjitõk eo tok juon