Uwaakin Kajjitõk Ko

◼ Ta ko ajri ro rej aikuj katak bwe kõtaan eo aer ippãn Jeova en kajoorl̦o̦k?

Rũtto ro me ewõr nejier el̦ap aer kate er ñan katakin ajri ro nejier bwe ren rũttol̦o̦k ilo “katak ko an Irooj.” (Ep. 6:4) Ñan waanjoñak, ekkã an rũtto ro lo bwe el̦ap tokjãn ñe rej etale unin tõl in raan eo ippãn ajri ro aolep jibboñ. Ilo iien kabuñ an baam̦le im iien ko jet, baam̦le ko remaroñ alwõje juon iaan pija ko ad im bwebwenato kake. Remaroñ bar kããlõt juon iaan katak ko jãn bok ko an jo̦dikdik ro (Young People Ask). Ñe ejjab, remaroñ kõm̦m̦ane juon tieta jãn bwebwenato ko ilo Baibõl̦, ak kõmmãlmel ippãn doon. Bõtab, bwe ajri ro ren rũttol̦o̦k “ilo mour in Kũrjin,” rũtto ro rej aikuj katakin er kõn katak ko rem̦wilal̦l̦o̦k ilo Baibõl̦.​—Hi. 6:1, UBS.

L̦õmn̦ak kõn wãween ad kwal̦o̦k naan ñan armej ro. Ilo iien en̦ m̦oktata jej jepl̦aak ippãn juon armej, ekkã ad kate kõj ñan jino katak Baibõl̦ ippãer kõn bok eo Katak ko Rem̦ool jãn Baibõl̦ Eo. Ãlikin an jem̦l̦o̦k, jej kõjerbal “Pãd Wõt ilo Yokwe eo an Anij.” Etke? Kõnke bok eo Katak ko Rem̦ool ej jipañ rũkkatak ro ñan mel̦el̦e kõn Baibõl̦ eo. Ak bok eo “Yokwe eo an Anij” ej katakin er ñan l̦oore naan in kakapilõk ko jãn Baibõl̦ ilo mour ko aer. Aolep bok kein rej jipañ ro rekããl ñan kajjioñe Kũraij im bwe ren ‘pen wõt ilo tõmak.’ (Kol. 2:6, 7) Jemaroñ bar l̦oore laajrak in ñe jej katak ippãn ajri ro nejid. Eaorõk ñan katakin ajri ro kõn mej eo an Jijej, Aelõñ eo an Anij, im ta eo ej wal̦o̦k ñe juon ej mej. Ajri ro rej aikuj jel̦ã etke Anij ej kõtl̦o̦k an wõr eñtaan im ta kakõl̦l̦en raan kein ãliktata an jukjukun pãd in enana. Rej aikuj bar tõmak bwe Ri Kõnnaan ro an Jeova rej Kũrjin ro rem̦ool. Ajri ro rej aikuj bar mel̦el̦e kõn naan in kakapilõk ko ilo Baibõl̦ im ñan jel̦ã kilen kõjerbal maroñ eo aer ñan “jel̦ã ta eo em̦m̦an im ta eo enana.” (Hi. 5:14, UBS) Rũtto ro rej aikuj lel̦o̦k katak ko ñan ajri ro nejier ekkar ñan joñan iiõ im jel̦ãl̦o̦kjen̦ eo an ajri ro. Bõtab, elõñ ajri ro me remaroñ mel̦el̦e kõn katak ko rem̦wilal̦ meñe rej dik wõt.​—Luk 2:42, 46, 47, UBS.