Al ko Rekããl Jenaaj Kõjerbali ilo Iien Ad Kabuñ!
1 Ilo kweilo̦k eo an doulul in ad (Watch Tower Bible and Tract Society of Pennsylvania) me rej kõm̦m̦ane kajjojo iiõ, kar kõjjel̦ã bwe jenaaj bar kõm̦m̦ane juon bokin al kããl. Nuuj in ear l̦ap an kam̦õn̦õn̦õ! Kweilo̦k in ear kõm̦m̦an ilo Oktoba 4, 2014. Kar kakeememej aolep ro rar pãd ilo kweilo̦k in bwe al ko rej bar aorõk ilo iien ad kabuñ.—Sam 96:2.
2 Kwõmaroñ kajjitõk ippam̦ make im ba, ‘Etke eaorõk bwe en wõr ad bokin al kããl?’ Ewõr jejjo un ko. M̦oktata mel̦el̦e ko ad kõn eoon ko ilo Baibõl̦ rej kããl jãn iien ñan iien, im men in enaaj bar jelõt naan ko ilo al ko ad. (JK. 4:18) Bar juon un ej kõnke naan ko kar kõjerbali ilo bokin al eo m̦okta kar bõki jãn ukokin Baibõl̦ eo m̦okta an doulul in (New World Translation). Kõn men in, jenaaj aikuj ukoti naan ko ilo bokin al eo ad ekkar ñan naan ko ilo Baibõl̦ eo ad kiiõ me em̦õj kõkããle. Kõnke enaaj l̦ap jerbal ñan kõm̦m̦an oktak ilo al ko, kar pepe ñan bar kobaik jet al ko rekããl ilo bokin al eo.
3 Jej ke aikuj kõttar an m̦õj aer bũriini bok in ekããl ñan ad al kake? Ejjab. Jej m̦õn̦õn̦õ in kõjjel̦ãik kom̦ bwe ilo allõñ kan̦i im̦aan enaaj lõñ al kããl renaaj wal̦o̦k ilo Weep jait eo ad, jw.org. Ñe enaaj wal̦o̦k juon al kããl ilo kajin eo am̦, naaj likũti ilo jem̦l̦o̦kin jikejuul̦ eo ñan Kweilo̦kin Ad Jerbal ñan Anij eo ad im naaj je im ba, “al kããl.”
4 Kilen bwe Jen Jel̦ã Al ko Rekããl: Emaroñ pen ñan katak juon al kããl. Jekdo̦o̦n ñe ãindein ak jen ãinwõt rijeje sam eo ilo ad al ilo iien kweilo̦k ko im “jab kejakl̦ọkjeṇ” ak ikõñ wõt. (Sam 30:12) Bwe kwõn jel̦ã al kããl kein, kwõmaroñ kõm̦m̦ani men kein itulal̦.
Kwõn keini am̦ roñjake kõjañjañ ko ñan al kein ilo Weep jait eo ad. Ñe eokkutkut am̦ roñjaki kõjañjañ kein enaaj pidodol̦o̦k am̦ keememeji.
Katak naan ko ilo al kein im kajjioñ keememeji.
Al ilo an kõjañjañ eo jo̦. Kwõn keini am̦ kõm̦m̦ane men in m̦ae iien kwõj kiili al eo.
Kõmmãlmel elõñl̦o̦k jãn juon alen ilo iien Kabuñ an Baam̦le eo am̦ m̦ae iien em̦m̦anl̦o̦k an baam̦le eo al kaki.
5 Ilo allõñ kan̦e im̦aan, ñe em̦õj likũti ilo jikejuul̦ eo bwe jen al kõn juon iaan al kããl kein m̦õjin Kweilo̦kin Ad Jerbal ñan Anij eo, eklejia eo enaaj m̦okta roñjake kõjañjañ eo an al eo me enaaj jo̦. Ãlikin, aolep renaaj al ãinwõt ad kõm̦m̦ane ñe jej al kõn al ko jet an doulul in.
6 Baj l̦õmn̦ak m̦õk kõn men in, el̦ap an kajoor kalañlõñ ñe kõj aolep jej al ippãn doon im nõbar Jeova kõn ainikien ko rel̦l̦aaj. Kõn men in, jen jab kammineneiki kõj diwõj ñe ejjab men in aikuj ilo iien eo jej pojak in al.
7 Ewõr bar juon wãween jemaroñ kwal̦o̦k ad kam̦m̦oolol kõn al kein rekkwõjarjar. Ilo iien kweilo̦k ko rel̦l̦ap, ewõr kõjañjañ ej jo̦ m̦okta jãn an jino iien kweilo̦k. Ruo alen ilo juon iiõ jet iaan ro jeid im jatid jãn kona ko emãn ilo lal̦ in, rej m̦õn̦õn̦õ in kõl̦l̦ã on̦ãer make ñan Patterson, New York, bwe ren kõm̦m̦ani al ko rem̦m̦an im aiboojoj me jenaaj al kaki ilo iien ad kabuñ. Kõn men in, el̦aññe chairman eo ad ilo iien kweilo̦k ko rel̦l̦ap rej ba jen jijet ilo jea eo ad im roñjake kõjañjañ eo em̦õj kõpooje, eokwe jej aikuj pokake. Ad kõm̦m̦ane men in enaaj jipañ kõj bwe jen kõpooj bũruod ñan katak ko jenaaj pojak in roñjaki.—Ezra 7:10.
8 Juon iaan taitõl̦in al kããl ko ej, “The Kingdom Is in Place—Let It Come!” Kar kwal̦o̦k al in ilo kar kweilo̦k eo an doulul in ilo iiõ eo ej kab jem̦l̦o̦k. Kar kine al in ñan kwal̦o̦k bwe em̦õj an jejjet 100 iiõ in an Aelõñ eo an Anij jutak.
9 Al kein rekããl rej jet iaan “men ko rem̦m̦an” jãn Jeova. (Matu 12:35) Jen kõm̦m̦an bwe en juon ad mejãnkajjik ñan katak al kein rekããl im al kaki jãn bũruod im lel̦o̦k aiboojoj im nõbar ñan Anij eo ad!—Sam 147:1.