Kilen bwe En Em̦m̦anl̦o̦k Wõt Ad Kwal̦o̦k Naan—En Em̦m̦an Ad Uwaake Rũm̦weo Ñe Ellu

Unin an Aorõk Kõl In: Elõñ iaan armej ro jej iioone er ilo jerbal in kwal̦o̦k naan rejouj. Bõtab, Jijej ear kanaan bwe jet armej renaaj dike im kõjdate kõj. (Jon 17:14) Kõn men in, jen jab bwilõñ ñe jej iioon juon armej me ej illu. Ñe men in ej wal̦o̦k, jen uwaake ilo wãween eo enaaj kabuñbũruon Jeova, eo jej jutak kõn etan. (Rom 12:17-21, UBS; 1 Pi. 3:15, 16, UBS) Ad uwaake ilo wãween in, enaaj bõbraik an l̦apl̦o̦k apañ eo. Bareinwõt, enaaj juon wãween em̦m̦an jej kwal̦o̦k naan ñan armej eo ej illu im ro jet me rej reitok im kalimjek kõj. Kõnke enaaj kõm̦m̦an bwe ren kõn̦aan roñjake tokãlik ñe juon iaan Ri Kõnnaan ro an Jeova ej kwal̦o̦k naan ippãer.—2 Ko. 6:3.

Kilen Kõm̦m̦ane:

Jen ineem̦m̦an im jouj wõt. Men in enaaj kamedl̦o̦k bũruon armej eo. Jab m̦õkaj im illu kõn an jab em̦m̦an wãween an rũm̦weo kõm̦m̦an im kõnnaantok ñan kõj. (Ekl. 7:9) Bõlen emaroñ illu kõnke ewõr juon apañ ej iioone ak kõnke jej etal ilo juon iien ejjab em̦m̦an an mour. Meñe ej illu im jab kõn̦aan roñjake ad kwal̦o̦k naan, ak jen kwal̦o̦k wõt jouj. Unin an ãindein ej kõnke em̦õj tõlpiloik e kõn katak ko rejjab m̦ool.—2 Ko. 4:4.
En mera im jouj ad uwaak. (JK. 15:1, UBS) Kwaar ke ko̦ruji armej eo? Ear ke poub im kiiõ ellu bwe kwõj ko̦kkure iien ko an? Meñe jejjab jol̦o̦k ad bõd kõn ad kõm̦m̦ane jerbal in, ak jemaroñ baj jol̦o̦k ad bõd kõn ad itok ilo juon iien ejjab em̦m̦an. Rũm̦weo ej ke illu kõnke ear roñ an ro jet kananaik kõj im ba men ko rejjab m̦ool kõn kõj? El̦aññe eñin unin an illu, kwõmaroñ baj ba: “Imel̦el̦e etke kwõj illu im ba men in. Ak men in kwaar roñ ãinwõt ejjab m̦ool. Imaroñ ke kwal̦o̦k etke ejjab m̦ool?” Ak ej ke kwal̦o̦k an jab errã kõn jet men kõn tõmak eo ad, ãinwõt kõn bukwel̦o̦k ak kõn ad jab bõk bõtõktõk? Eokwe, kwõmaroñ ba: “Imel̦el̦e eñjake in am̦. Ilo m̦ool ro jet rar bar kwal̦o̦k aer inepata im jab errã ilo men in. Imaroñ ke kwal̦o̦k tu ia eo ilo Baibõl̦ im men in ej itok jãne?”
El̦aññe armej eo el̦ap an illu, em̦m̦anl̦o̦k kwõn ilo̦k im jab ba jabdewõt ñane. El̦aññe ej ba Ri Kõnnaan ro an Jeova ren jab bar etal ñan m̦weo im̦õn, kwõmaroñ ba ñane bwe ñe eñin kõn̦aan eo an, eokwe jenaaj kautieje.

Kõm̦m̦ane Men in ilo Allõñ In:

Kõmmãlmel kake men in ilo iien kabuñ an baam̦le eo am̦.
Ãlikin am̦ jepl̦aak jãn ippãn armej eo ear illu, bwebwenato ippãn rukwal̦o̦k eo m̦õttam̦ kõn ta wãween eo em̦m̦anl̦o̦k kwõn kar ba ak kõm̦m̦ane ñan uwaake armej eo.