“Kom̦win Aenõm̦m̦an Ippãn Armej Otemjej”
1. Ñe jej iioon armej ro me rej illu ak inepata ippãd ilo jerbal in kwal̦o̦k naan, ta naan in kakapilõk eo jãn Baibõl̦ jej aikuj l̦oore?
1 El̦ap an aorõk aenõm̦m̦an ippãn ro doon Jeova. Ennaan eo jej bõkl̦o̦k ñe jej kwal̦o̦k naan ñan armej ro ej naan in kaenõm̦m̦an. (Ais. 52:7, UBS) Bõtab jet iien armej ro rej inepata ak illu ñe jej jãdel̦o̦k ñan m̦oko im̦weer im kwal̦o̦k naan ñan er. Ta ko jemaroñ kõm̦m̦ani bwe en wõr wõt aenõm̦m̦an ñe jej iioone men in?—Rom 12:18.
2. Etke eaorõk bwe jen mel̦el̦e kõn armej ro?
2 Jen L̦õmn̦ak im Mel̦el̦e kõn Armej Ro: Jet rej illu ñe jej kwal̦o̦k naan ñan er kõnke rej jum̦ae katak ko rem̦ool. Ro jet remaroñ illu kõnke ewõr men en̦ rej inepata kake. Bõlen enana iien eo jaar etal ñan m̦weo im̦weer ak emaroñ inepata kõn jet apañ ko ej iiooni. El̦aññe ej illu kõn wõt ad bõktok nuuj eo em̦m̦an ñan e, eokwe jen keememej bwe ewõr juon ear pinej l̦õmn̦ak eo an jãn katak ko rem̦ool. (2 Ko. 4:4, UBS) Jekdo̦o̦n ta eo rej illu kake, ak ñe jej kajjioñ in mel̦el̦e kõn armej ro, men in enaaj jipañ kõj ñan aenõm̦m̦an wõt im jab bõk ñan bũruod naan ko aer.—JK. 19:11.
3. Ta ko jemaroñ kõm̦m̦ani ñan kwal̦o̦k ad kautiej ñan ro me jej kwal̦o̦k naan ñan er?
3 Jen Kwal̦o̦k Kautiej: El̦ap an armej ro pen wõt ñan tõmak ko aer. (2 Ko. 10:4) Jen keememej bwe ewõr aer maroñ ñan jab roñjake kõj el̦aññe rejjab kõn̦aan. Jen kõjparok bwe jen jab kõm̦m̦an aer l̦õmn̦ak bwe jej kajjirere kõn tõmak ko aer ak bwe jej kakõl kõn ad jel̦ã l̦o̦k kobban Baibõl̦ jãn er. El̦aññe rej jiroñ kõj bwe jen etal, eokwe jen kwal̦o̦k ad kautiej ilo ad etal jãn m̦weo.
4. Ta mel̦el̦ein ñan kõnono ilo jouj?
4 Jen Kõnono ilo Jouj: Jej aikuj kõnono wõt ilo jouj meñe enana im eddo an armej ro kõnnaantok. (Kol. 4:6; 1 Pi. 2:23) Jen jab akwããl ippãer. Em̦m̦anl̦o̦k ñe jej kate kõj ñan bwebwenato kõn juon men me emaroñ errã ie. Ak, ilo jouj jemaroñ kajjitõk ippãn armej eo kõn unin an jab errã ippãd. Bõtab jet iien, bwe en jab l̦apl̦o̦k wõt an illu, em̦m̦anl̦o̦k ñe jejjab ba jabdewõt.—JK. 9:7, UBS; 17:14, UBS.
5. Ta tokjãn ko rej wal̦o̦k ñe jej kõm̦m̦an bwe en wõr wõt aenõm̦m̦an ñe jej kwal̦o̦k naan?
5 El̦aññe jej kõm̦m̦an bwe en wõr wõt aenõm̦m̦an, armej eo enaaj keememeje men in. Bõlen tokãlik enaaj roñjake ñe juon enaaj kajjioñ in kwal̦o̦k naan ñan e. (Rom 12:20, 21) Meñe emaroñ lukkuun jum̦ae kõj, ak juon iien bõlen emaroñ oktak im juon iaan ri tõmak ro m̦õttad. (Ga. 1:13, 14, UBS) Jejaje el̦aññe armej eo enaaj m̦õn̦õn̦õ in katak ak jab. Jekdo̦o̦n ak ñe jejel̦ã kõmmaanwa im kwal̦o̦k aenõm̦m̦an ñan armej otemjej, jej kwal̦o̦k ad kautiej Jeova im jerbale katak ko an.—2 Ko. 6:3.