Beran, ak ilo Ainemõn
1 Elõñ armij ro me jej kwalok ñan ir rej kwalok juõn tõmak ekajur kin katak ko rej jumae mol eo ilo Bible. Meñe jej aikwij kwalok ilo beran, jekõnan bareinwõt bwe jen “ainemõn iben armij otemjej” im jej aikwij kejbãrok bwe jen jab kaillu armij ro. (Rom. 12:18; Jerb. 4:29) Ewi wãwen jemaroñ beran im ilo ejja ien eo wõt ainemõn ñe jej kwalok kin ennan eo an Ailiñ eo?
2 Bukõt Men ko Komij Errã Kaki: Juõn armij eo eainemõn enaj kejbãrok bwe en jab akwel. Ad aitwerõke tõmak eo ekajur an ri mweo ejamin kõmman bwe en mõnõnõ in roñjake. Elañe ej kwalok juõn uak ebwid, bõlen jemaroñ ilo kabel kwalok juõn lemnak me jej jimor errã kake. Ikijen ad kalikar kin ta eo jej jimor tõmak kake, jemaroñ jolok jabdewõt eñjake ko renana im maroñ kareel buruen.
3 Ñe jej kõtlok wõt im jab kajimwe lemnak eo ebwid an ri mweo, jej kajekdon ke ak kadiklok aorõkin mol eo? Jaab. Jerbal eo ad einwõt juõn Christian ri kwalok, ejjab ñan kajedmatmat aolep lemnak ko rejjab jimwe, ak ñan kwalok kin news eo emõn kin Ailiñ eo an Anij. (Mat. 24:14) Jen ad jumae ilo wãwen eo ekajur kin juõn lemnak ejjab jimwe me armij ro rej kwalok, jemaroñ watõke bwe ej juõn ien emõn im ebellok ñan ad jelã kin ta lemnak eo an armij eo.—Ken. 16:23.
4 Kwalok Ad Kautiej: Ewõr jet ien jenaj aikwij beran ñan ad kajedmatmat katak ko rebwid. Bõtab, einwõt armij ro re ainemõn, jej kejbãrok bwe jen jab kajirere, bareinwõt kajerbal nan ko renana kin ro me rej tõmak im katakin kin katak ko rebwid. Ad kwalok juõn mejatoto in kautiej kij make enaj kõmman bwe armij ro ren jab kõnan roñjake, ak juõn wãwen ettã im joij enaj kabellok lemnak ko an ro rej yokwe mol. Ad kwalok kautiej ñan ro rej roñjake kij im kin tõmak ko air, enaj kõmman bwe en bidodo air kõnan eoroñ ennan eo ad.
5 Ri jilek Paul ear lemnak kin tõmak ko an ro ear kwalok nan ñan ir im bukõt ñan an kwalok kin news eo emõn ilo wãwen eo enaj kareel burueir. (Jerb. 17:22-31) Ear mõnõnõ in erom “men otemjej ñõn armij otemjej” bwe en “lomoren jet.” (1 Kor. 9:22) Jemaroñ kõmman ejja wãwen dein wõt ikijen ad ainemõn ke jej beran in kwalok kin news eo emõn.