Kate Kõj ñan Kõm̦m̦an Rũkal̦oor
1. Ta eo armej ro rej aikuji bwe ren maroñ bõk lo̦mo̦o̦r?
1 Ripoot in kwal̦o̦k naan eo an 2014 eo ej kaalikkar an armej ro an Anij kijejeto im kate er kõn jerbal in kwal̦o̦k naan kõn Aelõñ eo. (Matu 24:14) El̦apl̦o̦k ad tõpar armej ro kõn ennaan eo jãn Baibõl̦ ikijjeen ad kwal̦o̦k naan jãn em̦ ñan em̦, leto letak peba in kũr ko im tũrããk ko, kab ilo ad kwal̦o̦k naan ilo̦bwilej. Bõtab ñan an armej ro maroñ bõk lo̦mo̦o̦r, jej aikuj katak Baibõl̦ ippãer bwe ren maroñ erom rũkal̦ooran Jijej.—1 Ti. 2:4.
2. Kajjitõk ta ko jemaroñ kajitũkin kõj make kaki me renãj jipañ kõj ñan aolep iien kajjitõk ippãn armej ro ñe rekõn̦aan katak?
2 Aolep Iien Kajjitõk ñe Rekõn̦aan Katak: Ñe juon armej ej kwal̦o̦k an itoklimo, kwõj ke kate eok ñan jel̦ã atõrej eo an ak nõmba in talboon eo an? Kwõj ke m̦õkaj in jibadekl̦o̦k ñan kajjioñ jino katak Baibõl̦ ippãn? Ñããt eo ãliktata kwaar kajjioñ jino katak Baibõl̦ ippãn juon armej me ej kab kein kajuon in am̦ lol̦o̦k? Ñããt eo ãliktata kwaar kajjitõk el̦aññe juon iaan armej ran̦ kwõj lel̦o̦k aer bok aolep allõñ ekõn̦aan katak Baibõl̦? Em̦õj ke am̦ kwal̦o̦k pija in alwõj kein, Etke Kwõj Aikuj Katak Baibõl̦? im Ta ko Rej Wal̦o̦k Ñe Kõmij Katak Baibõl̦ Ippãn Armej? ñan rijerbal ran̦ m̦õttam, rijikuul̦ ran̦, armej ran̦ rej jokwe iturum̦, ran̦ nukum̦, im ro jet? Ñe kwõj kõjerbal waan bwilbwil ko im kwal̦o̦k naan, innem elõñ armej rej ebbõk aer bok ko me jej katak ippãn armej kaki, kwõj ke ba l̦o̦k ñan er bwe remaroñ bar katak Baibõl̦ ilo ejjel̦o̦k on̦ãn?
3. Ta eo jej aikuj kõm̦m̦ane bwe jen maroñ lo tõprak ilo ad katakin armej ro kõn m̦ool eo?
3 Jipañ jãn Jeova im Jijej: M̦okta jãn an kar Jijej ba naan kein “kõm̦m̦an rũkal̦oora” ear ba “kom̦win ilo̦k.” Naan kein an Jijej rej kaalikkar aorõkin ad aikuj kate kõj im ad aikuj jel̦ã kwal̦o̦k ad itoklimo. Meñe kar letok jerbal in ñan kõj ak jejjab make iaad, em̦õj an Jijej kallim̦ur bwe enãj pãd ippãd. (Matu 28:19, 20) Bareinwõt, Jeova ear letok kajoor eo an im kein jipañ ko jet ñan ad maroñ kõjerbali. Ej bar katakin im kammineneik kõj bwe jen maroñ katakin armej ro kõn m̦ool eo. (Zk. 4:6, UBS; 2 Ko. 4:7, UBS) Jemaroñ bar jar kõn ‘kõn̦aan im jerbal ñan kabuñbũruon Anij’ ilo ad bõk kun̦aad ilo jerbal in eaorõk.—Pil. 2:13.
4. Etke jej aikuj kate kõj ñan kõm̦m̦an rũkal̦oor?
4 Ad kwal̦o̦k naan kõn nuuj eo em̦m̦an ej kõm̦m̦an ad lem̦õn̦õn̦õ. Bõtab el̦apl̦o̦k ad m̦õn̦õn̦õ ñe jej katakin jabdewõt kõn m̦ool eo im jipañe bwe en kobatok ilo “ial̦ eo ej tõll̦o̦k ñan mour.” (Matu 7:14; 1 Te. 2:19, 20) Men eo eaorõk ej bwe ñe jej kate kõj ñan kõm̦m̦an rũkal̦oor, jej kabuñbũruon Jeova, eo ejjab “kõn̦aan bwe jabdewõt en jako, a bwe ren otemjej itok im ukel̦o̦k.”—2 Pi. 3:9.